[طيار هلالي]

السلام عليكم ورحمة الله وبركاتة

كل مباراة أشوفها للفريق الأولمبي أقول إن شاء الله بعد المباراه بدخل المنتدى وبفض فض عن التخبطات والفشل الي جالسه اشوفه

لكن بعد مباارة اليوم مع الفتح (( الي محد درى عنها )) قلت لا شكل الوضع ما ينسكت عليه

ياجماعة لاتفوتكم المواهب الفذه

فريق من كثر ماهو مبدع دايم مايجيب التعادل مع الفرق الضعيفه الا بالدقايق الاخيره (( ماشاء الله تبارك الله ))

فريق من كثر ماهو مبدع ماخلينا عزوز ولا العابد ولا الفريدي ولا الزوري ولاشراحيلي ولا خيرات ولا الدوسري عبدالله ولا الكعبي يلعبون فيه (( اتوقع باقي اسماء ماذكرتهم ))

فريق من كثر ماهو مبدع الاعبين قالبينها سوالف بالملعب (( ناااول ياولد .. ياخووي شت زين .. يابن الحلال اوفر اوفر .. وش ذا التمريره .. على الطرف على الطرف )) هالكلمات وش تدل عليه ؟؟

بصراحه من كثر ماهو فريق سيء جدا انا انصح الهلاليين أنهم ما يتابعون مبارياته

أبغى أعرف إدارة الكرة بالنادي يرضيها الي جالس يصير ؟؟

ماسمعناها تعلق على نتائج الفريق السيئه الا يوم فازوا على القادسية اربعه من الجهني طلعوا وقالوا ترى بنوقع مع الجهني عقد احترافي (( يعني شوفونا منتبهين للمواهب ))

تذكرون الفريدي والدوسري والعابد ايام ماكانوا بدرجة الشباب ؟ اذا لمسوا الكوره كل من يتابع المباراه يبصم على مواهبهم (( شوفوا الحين الفريق الاولمبي وانا اتحدى اذا حسيتوا بموهبه أي لاعب فيهم ماعدا شافي الي ابدع السنه الي راحت والسنه هذي بيدمرونه مع الفريق الفاشل الي جالس يلعب معه ))

ياناس والله حررام لاعبين بهالمستوى يمثلون نادي الهلال

بس انا ما الوم الاعبين لأن مالهم ذنب هذي مستوياتهم ومايقدرون يقدمون اكثر من كذا


لكن المشرفين على الفئات السنيه وادارة الكرة هم المسئولين عن الفشل الذريع للفريق الأولمبي والدليل اختياراتهم وتصعيدهم السيء للاعبين وضمهم للاعبين اقل بكثير من انهم يمثلون نادي الهلال


بالرياض والشرقيه والشمال والجنوب 90% من الصغار الي يملكون مواهب يتمنون يلعبون بالهلال

وبالنهايه نشوف فريق سيء مثل هذا يمثلنا

انا ماودي افتح صفحات فشل فريق الناشئين والشباب بالنادي (( لأن معروف درجة الشباب والناشئين ضعيفه لدى جميع الانديه الا من رحم ربي وهالشي هو الي مخلينا دايم ننافس على المراكز الثلاثه )) ولكن يوم كنا نملك مواهب مبدعين كنا نحقق البطوله ونعطي المنافسين نتايج كبيره (( مستحيل انسى عمايل الفريدي بالنصر ))

ماصرنا نشوف إهتمام فعلي بالقاعدة (( صرنا نسمع كلام وتعاقدات مع لاعبين أقل من المستوى ))

رسالـة إلى ادارة النادي :

حنا ما نبي بطولة كأس فيصل ولا نبي ننافس عليها

نبي نشوف مواهب تلعب بأسم الهلال بالفريق الاولمبي

وصدقوني لو كان عندنا مواهب تستحق انها تمثل نادي الهلال ماكنا تعادلنا (( بصعووبه )) مع الرائد والاتفاق والفتح ونجران !!!!

أتمنى اني ماكنت قاسي بكلامي لكن للأسف أن هذا الي جالس اشوفه (( كلامي كله من فوق لتحت يعتبر وجهة نظري تحتمل الصواب والخطأ )) وصدقوني أتمنى لو كنت غلطان


خاتمة (( أو شطحه )) :
أذكريني كل مافاز الهلال .. كان ودك طول عمرك تذكريني ..!!