بسم الله الرحمن الرحيم ..
السلام عليكم ورحمة الله وبركاته
ياهلا والله وغلا .. نبدأ على شكل نقاط ..
طبعاً في نادي الهلال مليون نقطة إيجابية .. لكن هذه السلبيات اراها موجودة في النادي ( من وجهة نظر متواضعه )
<< اللاعب الرمز >>
للأسف الشديد ان الفريق الآن .. يفتقد للاعب الرمز ..
كان قبل سامي وقبله في مليون رمز في الفريق .. الثنيان والتيماوي ووو..
كان فيه لاعبين كبار لهم ثقلهم ..
الآن حتى هوساوي الكابتن .. تحس انه يأدي واجبه وبس ..
دوره مايتعدى مدافع وكابتن ..
شفنا على وقت سامي .. استطاع سامي لوحده انه يصنع نفسه كـ رمز للمنتخب وللنادي ..
بل ووقتها سامي بدا يرحل مدربين ( مثل ادي موس اللي كان واضح ان سامي مايبيه ) ويختار مدربين .. ليش ؟ لانه رمز للنادي ..
انا مايزعلني في قضية غياب الرمز .. هو كثرة برود اللاعبين .. وغياب الروح لديهم ..
وهالموسم بانت كثير .. شفناها قدام الإتفاق .. قدام ذوب آهن اصفهان .. قدام القادسية ..
حتى قدام التعاون .. رغم ان الفريق فاز .. ورغم وجود كوكبة من اللاعبين .. بينهم ياسر !
مافيه قائد حقيقي في الملعب ..
حتى على وقت الدعيع رغم مكابرة الدعيع نفسه ومكابرة الإدارات .. إلا انه واضح عدم وجود اللاعب اللي يقود هوية الهلال في الملعب ..
نريد لاعب غيور على النادي .. غيور على الفانيلة وشعار الفريق ..
كلنا نشوف سامي حتى وهو إداري .. يحترق من أجل النادي .. والدليل لقطات كثيرة .. وآخرها قدام الغرافه ودوره الكبير ..
انا وللأسف الشديد لست من مجانين سامي .. ومالحقت على أيامه وعزه وشبابه .. لحقت على آخر مشوار هالرياضي .. يعني انا لست امجد لسامي .. ولا اعطيه حقه المهضوم .. ولا أذكركم بما فعل ..
انا أريد هلال يتواجد فيه لاعبين رموز للنادي .. يعبرون عن الفريق .. يشيلون الفريق .. يساعدون الفريق في الأوقات الصعبه ..
ياسر ولله الحمد تتواجد فيه هذه الصفات .. لكن بعد عام 2007 وتحديداً بعد ماأنخفض مستواه ..
وجدنا انقسام كبير في الجمهور مابين مؤيد له .. ومابين معارض .. والجميع فقد الثقة فيه .. من كثر ماخذله ياسر واولهم انا ..
حتى ياسر نفسه .. ماهو ياسر الأولاني .. في علاقته مع الجمهور والإعلام ..
لذلك .. أنا أقول انه من مشكلات الهلال الحالية .. هو غياب الرموز ..
شفنا حسين عبدالغني في موسم واحد .. أصبح وكأنه إداري ولاعب ومدرب .. يحث اللاعبين ويشحذ هممهم ..
شفنا حسين عبدالغني كسب إحترام الجمهور والإدارة والمدربين .. واخذ شارة الكابتيه .. بل وحتى طبيب النادي أشاد به وبروحه ..
الروح والحماس لها دور كبير في كرة القدم والكل يشهد بذلك .. والدليل مباراة بونيودكور والهلال 3/0
وانا ترى أكره الناس لقلبي حسينوه .. << -- علشان لا احد يقول اني مندس << -- نتعامل مع العلقيات حسب تفكيرهم ههههههه
انا اتمنى ان تفعل هذه الخاصيه في " أسامة هوساوي - محمد الشلهوب - ياسر القحطاني - خالد عزيز عندما يعود بالسلامة إن شاء الله "
لانهم اذا فعلت فيهم خاصية اللاعب الرمز يبي يأثرون على بقية اللاعبين .. يبي يفيدون الفريق كثير في فرض شخصيته داخل الملعب ..
اما مسأله كل لاعب يأدي دوره وماله علاقة بالفريق مثل ماحصل في مباراة ذوب آهان .. ومباراة ام صلال .. وكل واحد يغني على ليلاه .. لا ..
نبي فريق مترابط متلاحم .. فريق يلعب بروح وبشخصية الهلال نادي القرن بآسيا .. زعيم القارة ومتسيدها ..
ايام قبل نشوف التمياط والثنيان وسامي .. يحترقون في الملعب علشان يفوز الهلال .. هذا يبكي .. هذا يتحسر بألم عندما يضيع فرصة .. هذا يهاوش زملاءه هذا يوجه .. وكانهم مدربين داخل الملعب .. !!
لابد ان ترجع هذه الأشياء لكي نضمن لهلالنا مستقبل جيد ..
وقبل نهاية هالنقطة .. ابضرب لكم مثال .. يلخص كل شي ..
توتي وروما .. وش فيه روما الحين غير توتي ..
لاعب بعد خروج فوسينتش .. يدف اللاعب على الجمهور ويقوله حي جمهور النادي ! شف احترام الجمهور من قبل الرمز الكبير توتي
مابقى في روما غير توتي .. وتوتي يلعب لكبرياء روما وتاريخها وعراقتها .. يلعب للمدينة وبكل اخلاص ..
بل والكل يشهد ان روما توتي وتوتي روما .. لاعب رمز كبير .. يحرك الجمهور .. الجمهور نفسه تعلم حب النادي من هاللاعب ..
وين هالمشهد في الهلال .. ؟؟!!
باختصار .. نبي لاعب يكلم الجمهور .. يحث الجمهور واللاعبين على خدمة الفريق ..
نبي لاعب يمثلنا .. نبي لاعب يشيل هم الفريق وهم الفوز .. نبي لاعب يصير حلقة الوصل بين المدرب والجمهور والإدارة والنادي ..
<< الجمهور الهلالي >>
حضور كثيف .. لكن بدون فائدة
عدد ممتاز .. لكن بدون تأثير
شفنا كلنا مباراة ذوب آهن وحضور خرافي وخيالي .. لكن ماأثرنا على الخصم .. ولا شجعنا فريقنا .. ولا عطينا الأفضلية لفريقنا ..
ليش .. ؟؟ مافيه صافرات استهجان على الفريق المقابل .. مافيه تشجيع وحماس مع فريقنا ..
ياخي قبل كم يوم اتابع مباراة مانشستر سيتي ومانشستر يونايتد .. صراخ وازعاج .. المباراة عاديه .. لكن يميزها الجمهور .. جمهور يساند فريقه بشكل فظيع .. يريد الفوز وكأنه لاعب داخل الملعب ..
وحنا اضعف الإيمان ماأمتعنا المشاهد .. صحيح الجمهور كان ينتظر هدف .. أو ينتظر مستوى علشان يشجع .. لكن حتى وبأسوأ الظروف لابد ان نشجع .. من اجل ان نتاهل ..
ياخي فيه عبارة اتوقع ان الإدارة يبي يطردوني من كثر مارددتها ..
وهي عبارة " جمهور ليفربول خاسر 4/0 مدري 5/0 مدري 6/0 نسيتها من كثر ماأرددها ! قدام أرسنال .. ومازال يشجع ويغني ويهتف لفريقه .. "
شفتوا الجمهور ؟ شفتوا الفرق
والله كل ماتذكرت المشهد أتألم من كل قلبي ..
فريق حارسه يصد ضربتين جزاء .. !!
ولاعب يطرد منه ..
ويسجل هدفين .. واحد هوساوي وواحد نيفيز ( قدام الرائد )
والجمهور بكل برود جالس ومتربع .. وهدوء وصمت .. في تلك المباراة حظر 15 ألف .. اجزم وبكل أريحية ان 10 الاف منهم هلاليين .. 8 منهم في الدرجة الثانيه ..
لماذا الهدوء .. يعني وش تبي أكثر من كذا .. صدوا بلنتين وسجلولك هدفين
وفوق هذا ثالث ورابع .. والجمهور بكل برود يقوم مع كل هدف .. ويصفق له دقيقة بالكثير .. ويجلس ثاني مره ..
ياخي وش جوكم .. وش تبووووون بالضبط ؟؟
اصرخ قوموا لا تجلسون .. والله حرام تجلسون .. والله قهر .. شجعوا الفريق .. وماحد لمي .. !!!
ازيدكم من الشعر بيت ..
في مباراة الغرافه في الرياض 3/0 واقوم واصفق واسوي الزلزال مع الجمهور ..
اللي وراي يقول اجلس .. بعدين يقول اول مره تحظر انت .. ؟؟!!
والله وربي تحطمت .. جايين من القصيم وضرب مشوار وتعبانين واخرتها يقولي كذا .. وكل سنة احظر 3 4 مباريات .. واخرتها يقول كذا بكل برود .. والله من القهر اسكت وطالعت قدام وحاق ام الجو تو مبسوط على طول قلبت منقهر
والله خويي صايم ومواصل .. << -- صايم الست ..
وانا من طلع رادوي للإصابة وانا متعوفس .. يوم جاء الاول والثاني ماصدقت قسم بالله طاير من الفرحه .. ودي اصير هوليكوبتر
يجي هذا ويحوق ام الجو .. جاي الملعب يبي يتكي ويحط رجل على رجل !!
ويحوس على الجمهور أبو جوه .. ياخوي وش تبي بالله .. ماودي أقول لا تجون الملعب
لاني داري لو هالاشكال ماجت الملعب .. مانتب شايف إلا 5 آلاف بس ..
عشان كذا حنا في حاجتهم عشان يمتلي الملعب ههههههههههه
عموماً كلنا هلاليين .. وعلى عيني وعلى راسي طلباتهم ..
بس اللي ابقوله شي واحد .. اذا بدع الهلال وقدم مستوى وقهر ظروفه وفاز واهدى لكم الفوز وفرحكم
عطوه حقه .. عطوه اللي يستاهله .. ترى ياجماعه هذا نادي القرن .. موب فريق ينافس على الهبوط ..
ياجماعه انصفوا الفريق .. وتعلموا من الجمهور الأوروربي .. مانب حاط روابط يوتيوب .. كلكم شايفين وتعرفون جمهور النوادي الأوروبية ..
ليش لا مانصير مثلهم .. why not ???
وإلا لا نزعل اذا سمعنا هذه العبارة " ان جمهور الهلال لم يرتقي حتى الآن ويواكب النادي واحترافيته ومسيرته ومكانته .. "
وانا احس انها صحيحة 100 % لان جمهور الهلال حتى الان اقل كثير من حجم ناديه .. ورجال ناديه .. وتاريخ ناديه ..
واللي يبي يقارننا بالإتحاد والنصر .. رغم ان المقارنه ظالمه ولا فيه اي وجه للمقارنة ..
بقارن يابعدي .. وبمشي معاك للآخر ..
جمهور الإتحاد امام الشباب في آخر مباراة اللي انتهت 2/2
كان الإتحاد متاخر 1/0 وجمهور يردد الاهازيج
تاخر الاتحاد 2/1 ومازال جمهور يغني وارجعوا للمباراة ..
وياقلب لاتحزن ... انا بمباراة الرائد بغيت أطق .. بغيت التفت على الجمهور واسب واشتم ..
بس الحمدلله اللي مسكت نفسي وعدت الليلة على خير " ميزتي خواف والله كان نفسي اعملها " هههههههههههه
<< مابين كوزمين وجيريتس .. >>
الدليل القاطع على ان كوزمين مدرب مميز .. هو تردد اسمه من قبل الصحفيين والهلاليين في الفضائيات وفي الجرايد ..
اي محلل يمسك الهلال ويحلله .. لازم يجيب طاري كوزمين .. لدرجة ان الهلاليون مانسوا هلال كوزمين للحين .. هذا دليل على ان كوزمين مدرب كبير ..
وانا بأشبه هلال كوزمين .. بانتر مورينهو .. اللي جلب دوري أبطال أوروبا للانتر بعد حوالي 40 سنة << -- ان ماخانتني الذاكرة ..
كيف جلبها للانتر ؟ بالطرق الدفاعيه والهجمات المرتدة .. يسكر الدفاع مضبوط يحكم الوسط .. يفكر بالهجوم بأقل عدد 2 احياناً 3 واحياناً 4 ونادراً ان تجد 5 بالهجوم
كوزمين نفس الشي .. نفس الحكاية .. ومع ذلك كان الهلال ينتصر ويتفوق .. وانا أشوف ان الهلال كان يعيش فترة خياليه مع كوزمين .. وكانت موعوده ببطولات .. لكن شاء القدر ان يرحل ..
وأتوقع هذا هو الأسلوب الحديث للكرة .. تأمن دفاعك .. تفعل خط الوسط .. مهاجم وحيد يجد مساندة معينه لينهي الهجمة .. يبقى الدفاع في المقام الأول ..
والدليل على ان كوزمين خسارة كبيرة للهلال .. هي حالة الأمير عبدالرحمن بن مساعد .. بعد فقدان كوزمين .. وماصار للفريق خلال الـ 3 شهور المتبقية في الموسم .. كان الهلال يلعب باسمه فقط ..
شفنا مورينهو مع مدريد نفس الشي .. والدليل تفوقه على ميلان في أرضه ! وكان المباراة في مدريد .. والجميع يشهد ان مدريد أفضل وكان يستحق الفوز ..
ماعلينا .. موب موضوعنا .. وانا اسف على الشحطات الكثيرة .. لكن استدلال علشان توصل الفكرة
مابين وفاء كوزمين .. واستهتار جيريتس بالهلال ..
هنا وقفة .. يامن متأسف على جيريتس .. يامن إلى الآن تحب جيريتس ..
الرجال باعك وباع فريقك .. وتسبب في الخروج الآسيوي لفريقك مع اللاعبين ..
الرجال هو السبب الأول في تدني مستوى الهلال هذا الموسم ..
وأكبر دليل الفضيحة الأخيرة اللي قالها رادوي لمدرب الاتفاق يوم يقوله ان جيريتس ماكان يأدي التدريبات نفس ماكان يأديها الموسم الماضي ..
والهلال مازال يحاول يتخلص من أزمة جيريتس .. والدليل التخبط .. تعادل من النصر - فوز على الرائد - تعادل القادسية - تعادل الاهلي - فوز نجران ..
الهلال نزف نقاط كثيرة .. سببها الاول في وجهة نظري جيريتس .. مع الخروج الآسيوي .. ؟؟!!
فمن الأولى ان نتحسر عليه ونتالم عليه .. ؟؟ جيريتس أم كوزمين .. ؟؟
<< اللاعب القضية ويلهامسون .. >>
أكثر لاعب محير .. هو ويلهامسون .. لاعب يدهش الخبراء وش عاد المشجع العادي ..
الموسم الأول >> موسم عادي ومتواضع ..
الموسم الثاني >> موسم خرافي .. انا اسميت اللاعب فيه " كريستيانو حقنا "
بإستثناء بعض المباريات مثل نهائي كاس الملك .. مباراة السد في الرياض .. مباريات النصر ذهاب وإياب في الدوري فقط واحط على فقط مليون خط
وبعض المباريات مع الفرق الصغيره
الموسم الثالث >> حتى الآن لم يظهر ويلهامسون بمستواه الحقيقي سوى مباراة النصر
حتى مباراة الغرافه بقطر .. رغم انه صنع وشارك في الأهداف ..
إلا انه اذا شفت المباراة بشكل عام تجد انه مستواه اقل من متوسط ..
اللي أبي اصل له باختصار ..
إذا صار اللاعب مايعطيك إذا صار الفريق كله شين ..
وش فايدة الاجنبي ..
الاجنبي = لاعب يعطيك ويصنع الفارق ويداوي الجروح في أصعب الظروف والاوقات ..
نيفيز ميزته انه بتسديدة بفاول بثقله في مركز صناعة الالعاب .. يستطيع بلسمة او تسديدة يجيب لك هدف .. ياثر في النتيجة ..
لدرجة ان اي مباراة يدخلها الهلال .. احتمال تواجد نيفيز في الشاشة اكثر من احتمال تواجد مهاجمي الهلال !
نيفيز هداف ولاعب يدل المرمى .. لكن ويلهامسون .. مشكلته انه يفتقد اللمسة الأخيرة .. ويفتقد ميزة المبادره وحمل الفريق على الأكتاف ..
يعني اذا صار الفريق سيء ويلهامسون يستسلم ويسلم أمره لله ..
ويبدو ان ويلهامسون عاد لموسمه الأول .. مباراتين يبدع .. 4 مباريات الغائب الحاضر .. ومباراتين مصاب ..
تعالوا شوفوا ويلهامسون في مباراة القادسية ولا شي .. واستبدل ! هذا دليل ان اللاعبين المحليين يرجى منهم الهدف .. ولا يرجى من ويلهامسون ..
تعالوا شوفوا ويلهامسون في مباراة ذوب آهن اللي تعتبر اهم مباراة للهلال في 10 سنوات الماضيه .. لعب شوط .. والفريق كله كان سيء .. لكن ؟؟
ويلهامسون كمعدل تهديفي تسجيله حتى الآن لـ 4 اهداف .. جيد وممتاز من لاعب جناح أيمن .. ايضاً في مباراة الرائد استطاع ان يصنع هدفين .. ! فاهم ومعاك ..
لكن هذا المعدل مايعبر عن مستواه ..
لكن ويلهامسون اين مستواه .. ؟؟!!
انا اتفق مع الجميع ان اللاعب مستواه رائع .. لكن متى يطلع مستواه ؟؟!!
ويلهامسون أقدر أقول عليه مثل التايب .. لاعب مميز لكن تغلب عليه بعض الظروف .. مثل تذبذب المستوى .. الإصابات والغيابات .. المزاجيه .. في حال كون الفريق سيء يكون هو سيء
جت المصيبه العظمى .. عندما قرأت في قووول اون لاين .. ان ويلهامسون يتقاضى 22 مليون في السنة .. ويبي يجدد له بعقد أعلى ..
ويقولون عندنا أزمة مالية .. والاعظم ان الأزمة المالية يرافقها أزمه فنيه !
ازيدكم من الشعر ناطحة سحاب ..
الكويت .. لا يقارن عدد شعبنا بعدد شعبها .. ولا تقارن مواهبنا بمواهبها .. ودوريها الممتاز فيه 8 أندية فقط !!
تصنع لاعب مع القادسية .. عبدالعزيز المشعان .. !
اسماعيل الحمادي و محمد الشحي في الإمارات .. على سبيل المثال فقط .. لا الحصر ..
معقولة السعودية كلها مافيه جناح أيمن ينفع للعب في الهلال .. !!
ترى المسأله كلها جناح أيمن .. !!
للأسف الأندية تنتج .. والمواهب في كل مكان .. لكن لا حياة لمن تنادي ..
وأكبر دليل .. لاعبي نادي الرائد موسى الشمري و عبدالمجيد عبدالله الرويلي .. كلهم من نادي العروبة !
ولاعبي نادي التعاون الراشد وبدر الخميس .. مواهب الوطني أبو جابر وعيسى أبو قدعه وحمد أبو ربع
والله ياأبو قدعه وهو أبو قدعه انه يطق ويلهامسون بأصبع .. ( وجهة نظري ) لو وضعت بالإعتبار مايتقاضى ويلهامسون ومايتقاضى أبو قدعه
أكبر عيب وأكبر قهر .. ان ويلهامسون اللي يتقاضى 22 مليون .. يوقفه برناوي !
بخشونة .. بضرب .. أهم شي وقفه .. وخلاه يلزم الصمت ..
ميخالف نزلي مشعل الموري اللي كان على وقت باكيتا يصول ويجول .. وخله يخطي وخله يمطرس موسم .. موسمين ..
وآخرتها يتعلم وتنصقل موهبته .. ويعرف من أين تؤكل الكتف .. عطه فرصه بس .. خله يثبت لك موهبته ..
أجل تبونه من أول مباراة يصير رونالدينهو ..
نفس الشي الكلثم .. الكلثم اللي نزل بدقايق جاب ضربة جزاء قدام الإتحاد .. !
والله عندنا مواهب .. شوفوا مازن الفرج .. مع الرائد وأبها .. والله لاعب خامة ممتازة .. بس مااخذ الفرصة في الهلال ..
ميخالف هاته وخله إحتياطي ماقلنا شي .. يفيدك ..
تصميم يختصر الكلام ..
والله هذا التصميم غريب عجيب .. !
صممته في الموسم الأول .. ندمت عليه في الموسم الثاني وحمدت ربي اني مانزلته في المنتدى ..
رجعت لرأيي الأول في الموسم الثالث ! ولن أندم عليه بعد الآن .. لاننا بنصف الموسم الثالث .. ( وحتى الآن مافيه شي يبشر بالخير )
http://img105.herosh.com/2010/11/17/561972479.jpg
وحتى لو أبدع ويلهامسون .. صدقوني ماراح يسدد اللي صرف عليه ..
22 مليون في السنة .. هذه لحالها ميزانية نادي ..
وحنا ندفع بمئات الملايين .. مو قادرين نجيب كاس آسيا .. والله يستر من الموسم هذا في البطولات المحلية ..
آسيا ليست بالصرف تأتي .. ولا بكم دفعت .. انا ماعلي من اللاعب كم ياخذ أو بكم جلبته .. علي من مستواه داخل الملعب ..
ويكفيني ان رأيي هذا يوافقني فيه الكاتب الصحفي الكبير / أحمد العجلان
اللي أرى فيه انا شخصياً .. كاتب الهلال الكبير محمد الكثيري رحمة الله عليه ..
انا اقول اللي صنع الشلهوب .. يصنع غيره ..
عطوا فرصة لمواهبنا في الجناح الأيمن .. عندك مواهب بالهبل يطلعون من الناشئين والشباب ..
عطهم فرصة .. إذا مانفعوك .. ساعتها جب ويلهامسون ونرضى فيه .. ونحطه على روسنا بعد ..
أقل شي .. خل الشلهوب يلعب جناح أيسر .. ونواف العابد جناح أيمن .. شوي شوي ويبي يتأقلم مع المركز ..
والدليل والتر زينقا مدرب النصر .. يلعب بفيقاروا وعبدالرحمن القحطاني .. وتمشي معاه .. وصدقوني يبي يتعود ..
والله كني أنا اللي أسددها من جيبي هالـ 22 مليون ..
تصميم يختصر كلامي عن ويلهامسون ..
نعم مع الموهبة السعودية .. مع اللاعب المحلي ..
فيه موسم .. أيام الكوري سول كي هيون .. كان موجود ويلهامسون والكوري ورادوي والتايب ..
التايب كان اغلب الموسم مصاب .. ويلهامسون والكوري موجودين .. رادوي جاء في فترة الانتقالات الشتوية ..
الموسم هذاك .. كان الفريدي وياسر هم اللي شايلين الفريق فوق روسهم .. " مع خط الدفاع طبعاً وعزيز "
كان الفريدي وياسر يعملون كل شي .. وكل مباراة يشيلون الفريق فوق كتوفهم للفوز ..
انا اطالب بتسريح ويلهامسون .. لانه يقوم بدور العداء في الجناح الأيمن ..
واظن العداء سهل دوره .. ونستطيع ان نجعل اي سعودي يقوم به .. وعلى قولتهم " لاعب تكتيكي " طيب تكتك في المحليين معقولة المحليين مايطبقون التكتيك اللي يملى عليهم ؟؟!!
انا اتذكر في نفس المركز قاتو سيسيه أيام المدرب الهولندي آدي موس وفترة رئاسة صاحب السمو الملكي الأمير عبدالله بن مساعد
كان قاتو سيسيه كل في الهلال ذاك الموسم .. كان اللاعب رقم 1
يصنع يسجل .. اتذكر في مباراة خرج مصاب وقدم المدرب الغامدي مكانه ونزل لاعب محور ..
ضاع الهلال لان قاتو سيسيه مصاب .. كان تراوري وقتها يضيع ومهاجم أميز مافيه رعونته ..
شوفوا قاتو سيسيه وشوفوا ويلهامسون .. اللي يترك الفريق في اشد الظروف ويروع يتهاوش مثل ماصار في مباراة القادسية وفي مباراة الغرافه الإياب ..
لو شافه الحكم في مباراة الغرافه !!! وهو يدوس اللاعب القطري .. قسم ان تقولون ويلهامسون هو من تسبب في الخروج الآسيوي .. بس ربك ستر ..
المشكلة الجمهور يروح يقول ويلهامسون بكى ويلهامسون صاح .. ويلهامسون يحب الفريق .. وخذ اغاني واهداءات له ..
من عيوب ويلهامسون .. مزاجية القيرل فريند مدري زوجته .. << -- وهذا مو كلامي هذا كلام خلف ملفي
اذا زعلت عليه القيرل فريند .. خلاص وخر عني ماأبي العب .. أبروح دبي
وانتظرها متى ترضى .. ناهيك عن الإصابات والاستدعاء الدولي .. ياعمي ريح بالك وريح ميزانيتك .. وأقرب عرض دزه .. حتى المكسب مانبيه إذا صار من ويلهامسون ..
<< -- ياترى وش هو ظرف الموسم الجاي ؟؟ للمتشائمين فقط >>
http://img105.herosh.com/2010/11/17/198190101.jpg
نقاط على السريع :
* إدارة الهلال تعمل عمل جبآر .. وتقدم أشياء فوق كرة القدم .. واستمرارها لا شك انه مكسب للرياضه السعودية كلها مو بس الهلال ..
لكن تمجيد كل شي في الهلال كما حدث في برنامج مباشر مع الأمير عبدالرحمن بن مساعد .. عندما جلس سموه ساعتين يتحدث بالنقاط الإيجابية .. والسلبيات يحاول التغاضي عنها ..
وكل ماسأله احمد العجلان .. يحاول تمجيد كل شي يتعلق بالهلال .. التمجيد والتطبيل لا نقبله من سموك الكريم .. خصوصاً اننا تعودنا منك يابو فيصل الصراحه التامة في المواسم السابقة ..
لكن الحمدلله اللي استمرت الإدارة .. وحنا بنعمه كبيرة بوجود الأمير عبدالرحمن وطاقم الإدارة .. بس التمجيد مانبغاه ..
* ايضاً قبل ماابعد عن الإدارة .. تكفى يابو فيصل نبي حضورك الدائم مع الفريق في المباريات صدقني حضورك يأثر على المشجع ويكحل عيوننا ويخلينا نبتهج بتواجدك
وش عاد اللاعب اللي يعرفك ويجلس معك ويقضي أوقات معك .. ويوعدك وبينك وبينه أشياء كثيرة .. أرجوك تحظر دائماً ياصاحب السمو .. والله يكحل عيونك في شوفة الهلال دائماً في القمة ..
* انا مستغرب الهجوم على الفريدي .. والله لو كان الفريدي مع نادي آخر ان تجلسون تعضون أصابعكم تبونه ..
الفريدي لاعب كبير وموهبة عظيمة .. المركز هذا اللي هو صانع الالعاب او المحور المتقدم نادر جداً تجد فيه لاعب بإمكانيات الفريدي خصوصاً انه يملك مهارة لا توصف .. وفوق هذا يستطيع يسجل .. عنده مهارة التسجيل ..
صحيح بارد .. صحيح خشن .. لكن إيجابياته تغطي على هالأمرين " مهاري وممتع ومقاتل ويقطع الكورة وتجده في كل مكان " والبرود والخشونه امور تعالج .. ياجماعه الصبر على الفريدي .. مع الفرصة .. ( صبر وفرصة ) صدقوني تبي تشوفون لاعب ينسيكم نيفيز .. والدليل مباراة القادسية قبل خروجه ومباراة ذوب آهن الذهاب ..
* ياليت كل جمهور الهلال يصير مثل اللي يجلسون في الواجهه في كل مباراة آسيوية ..
جمهور يخدم فريقه يشجع .. يهتف .. حتى قبل نزول اللاعبين .. وقبل المباراة بساعتين ..
ياليت يتعلمون بس الجمهور كله .. اخ بس ..
* قاعد ابحث في قوقل عن مقطع لمشجع هلالي
وفجأه وجدت هذه العبارة .. " الاغلبيه اتفقو ان وليهامسون الموسم هذا لديه مشاكل وغير قادر على العطاء "
<< -- يعنني انا صح هههههههه
* تحية الجماهير لرادوي في الدقيقة 8 من مباراة الهلال والإتفاق .. رائعه وجميلة .. ولها اثرها على اللاعب حتى على الرومانيين واعلامهم ..
نتمنى نشوفها كثير .. ومع كل اللاعبين مو بس رادوي .. حتى مع ويلهامسون اللي حاربته في نفس موضوعي هذا .. ( انا مع دعم الفريق بكل لاعبينه الصالح والطالح في الحلوه والمره )
* والله تفقعت عيوني واحولت ويعلم الله اني تعبت وانا ادور المقطع على اليوتيوب ولا حصلته
وهو آراء الجمهور الهلالي بعد الخروج الآسيوي امام ذوب آهان والله ودي أشكر مشجع هلالي قال تكفى يابو فيصل الآسيوية الموسم الجاي ..
قالها بكل أنواع الألم والمعاناة والكآبة والحزن والمأساه .. ودي أقبل راس هذا المشجع اللي أوصل صوت ملايين الهلاليين حول العالم .. كان مشهد خيالي دمعت يوم شفته .. لكن للأسف لم استطيع حفظه لاني كنت مستعجل ذيك المره ( تعرفون اشغال الاهل ماتخلص واشياء تافهه بعد ههههه )
المهم .. اكيد انتم تعرفونها ومايحتاج .. كانت على قناة إماراتيه اتوقع يادبي سبورت ياابو ظبي سبورت .. وياليت اللي عنده الرابط يحطه للأعضاء الأعزاء .. ولي لاني حتى انا وحشني المقطع ومشكورين ..
* توقيع احد العضوات ( اتوقع ماادري ناسي .. ) كان في غاية الإبداع
يقولك :
جريتس شكراً على كل ماقدمته للهلال وشكراً يامن
اعدت لنا هلال لم نرى له مثيل منذ اكثر من عشر سنوات
الفضل بعد الله يعود لك والعمل الذي قدمته للهلال لا
ينكره الى جاحد .. انتهت اسطوانة الهلال هو من يصنع
المدربين فالهلال لم يصنع سيريزو وبسيرو واحمد
العجلاني وجورج ليكينز و ادموس وماتورانا وعبداللطيف
الحسيني الذين فشلوا مع الهلال
بل انت من صنعت فريقاُ لا يقهر فريق اتفق جميع
الرياضيين المحايدين وغير المحايدين على قوته وروعته
وجماله .. كلمة شكراً قليله في حقك يا اسد وبالتوفيق لك
مع منتخب المغرب
وانا معها أكيد واوافقها الرأي ..
* في النهاية .. وبكل انواع المرارة والانهزامية ..
انا رأيي ووجهة نظري ان يعترف كل شخص هلالي بان العالمية صعبه قويه ..
صحيح النصر اخذها بتصويت وترشيح .. يعني بالعامية بالأرزاق ..
لكن انا يؤلمني ان الهلال لم يستطيع المحافظه على القمة بعد ان وصل إليها
فـ بعد 6 ألقاب آسيوية .. لم يستطيع الهلال على مدى 10 سنوات إضافة السابع لأخوانه ..
لذلك .. يجب ان نسعى جاهدين لإستعادة القمة على المستوى الآسيوي .. أولاً ..
ثم نيل شرف المشاركة مع أبطال القارات من الأندية حول العالم .. والله يكتبها لنا قريب ان شاء الله .. والله يوفق الهلال دائماً وابداً .. في كل مكان وزمان ..
لذلك .. نعم اعترف .. العالمية صعبة وقوية .. صدق من قالها ..
وياشماته أبله طازه فيه لو كان الشباب وفق في الوصول إلى النهائي وأحرز الكأس .. يكون وقتها حتى الشباب أصبح عالمي !
في النهاية هذا رأيي .. وكتبته من القهر اللي فيني .. غيرتي على النادي دفعتني لقول أشياء كثيرة منها اللي كتبته ..
وانا اكتب لكم الآن وانا كلي أمل ودعواتي للفريق .. حتى دموعي ظهرت في أكثر من مناسبه آخرها مقطع المشجع الهلالي تكفى يابو فيصل الآسيوية الموسم الجاي قبل كم يوم ..
فلا تلوموني .. وان اصبت فمن الله عز وجل .. وان اخطئت فمن نفسي ..
وشكراً .. وجزاكم الله خير على فتح الفرصة ..
ولا خلا ولا عدم ياجمهور الهلال ورجالاته ..
وعسى الله يخليكم لي ويخلي لنا الهلال .. وفي المدرجات وعلى دروب المنصات نلتقي ..
إبراهيم / بريدة ..
لبى خفوقكم ياجمهور الهلال ..
العذر منك حبيبي والسموح
غار جرح القلب واجبرني ابوح
لا تلومه من عذابه حن نفسه
واختلطت الجد مع بعض المزوح
لو تشوف جروح قلبي وش تقول ؟؟
لو تشوف همومي واثقال الحمول ..
كان صابك من مقاومتي ذهول ..
مافيني شي ..
حبيبي لا تقلق علي ..
فضفضه موجعه بــ زوم آوت مع الصور .. ! 
الوضع الشجري
