[T2F]

السلام عليكم يازعماء وهاردلكم التعادل ... واهم شي انه اللاعبين بغض النظر عن النتيجة تجاوزوا الصدمة الاسيوية ورجع المستوى الحقيقي للهلال وان شاء الله القادم احلى ..

المهم .. الكل يعلم ان المدرب قطع الشك باليقين واعلن الرحيل الى المغرب ونقوله شكرا جيريتس وبيض الله وجهك وماقصرت .. المرحلة القادمة هي مرحلة حساسة لأن طريقة التدريب والتكتيك راح يتغير على اللاعبين يعني بالعربي راح يبدون من الصفر .. انا من رأي الشخصي ان المرحلة القادمة الفريق يحتاج مدرب له خبرة بالدوري السعودي عامة والهلال خاصة والمدرب اللي اشوفه مناسب هو كوزمين طبعا انا متأكد ان الكثير منكم بيخالفني الراي .. صحيح انه جيريتس جلب المتعة الكروية المقرونة بالنتائج للهلال ومحد يقدر ينكر هالشي ومن سنين ماشفنا الهلال يلعب بهالطريقة الهجومية الممتعة وطريقته جابتلنا بطولتين وتأهل لدور الاربعة بالاسيوية وادري ان دور الاربعة مو طموحنا + الخمستين اللي لا يمكن ان ينساها الاصفرين. لكن صدقوني الكرة الحديثة تغيرت الكرة الحديثة محتاجة دفاع قوي وتقفيل للملعب زي ماكان يسوي كوزمين يعني نسجل هدف ونقففففففل وراح اذكرلكم عدة امثلة :
1- مورينهو والانتر : مورينهو ماجاب الثلاثية الا بالعب الدفاعي الخالي من اي متعة كان يسجل هدف ويدافع ويلعب على المرتدات واكيد كلكم تذكرون وش سوا مورينهو بالبرشا زهقهههم حتى ميسي ماقدر يسوي شي.
2-مدرب ذوبهان الايراني: الكل يعلم ان هالفريق هو اقل فريق تسجلت فيه اهداف وماكان يفوز الا بفارق هدف يعني اسجل هدف واقفل وبهالطريقة تأهلوا للنهائي.
3-كأس العالم الاخيرة : كل المحللين والنقاد اجمعوا على ان كأس العالم 2010 كانت اسوأ بطولة من حيث الجانب الفني وانها كانت خالية من اي متعة كروية الا ماندر ..تدرون ليش ؟ اغلب الفرق كانت تلعب بطريقة دفاعية .

فيا اخوان والله كوزمين هو الرجل المناسب للمرحلة القادمة ..

طبعا هذي وجهة نظري الشخصية وقلت لازم تشاركوني فيها وان اختلفتوا او اتفقتوا معي الخلاف لايفسد للود قضية ...... تحياتي لكم يازعماء