[hadeel alyahya]

السلام عليكم ورحمة الله وبركاته ,

اخواني اخوآتي , الكرام , الكل يعلم مالذي يقدمه برنامج الكأس ( هو كفكره مغايره تماما عن البرامج الاخرى ]

لكن مضمونها السرق والاحتيال , والكالعاده الضحيه المجتمع السعودي الغافل

تعريف المسابقات التلفزيونيه

لغة / هي مسابقات مثل حبشه والتيل .. لكن به احتيال ونصب وجلغمه على الناس الغلابه
اصطلاحا / حلم الثراء السريع لكل دلخ يطمح لبناء مستقبل مشرق وكويس . لكن تبطي عظم

المسابقات التلفزيونه .. كما يسميها علماء النفس والاقتصاد
لعنة الفقراء ورصاصه الرحمه لدلوخ <<-- اححلى يالعنوان





ومضمون جميع البرامج واحد هو الكسب ماديا , وجميع البرامج سواء كانت قنواتها او رائدتها عربيه او محليه تطمع في جيوب الشعب السعودي

حتى قناة ابو ظبي الاماراتيه ( الدوله الغنيه ) طمعت بجيوب الشعب السعودي من خلال تصويت افضل لاعب افضل جمهور افضل مدرب افضل تشجيع في
( الدوري السعودي )

والمشكله الجمهور السعودي ينجرف وراء هذه البرامج . رساله وحده منك تكلفك 10 ريال ؟؟ ليش

10 على 10 على 10 = ملايين الريالات السعوديه ,

لو بهالعشره ريال تصدقت فيها ستوازي مئات والاف الحسنات اللي تنفعك يوم القيامه

لو بهالعشره . بدل ماتكسب وتصرف على هالقنوات عطيتها بنتك ولا ولدك فرحتهم فيها اصرف لك

فرحة طفلك بهالعشره ارحم من انها تروح لنصابين وكذابين


اقلقوا روؤسنا بالمسابقات ؛ وين ما نروح يجيك اعلان عن مسابقه

وهذي معآناة شاب سعودي من المسابقات التلفزيونيه يقول فيها :

(حطيت على قناه اخبار .. طلعت لي مسابقه ب700 ؛
طيب وش دخلني بالمسابقات انا .. اتابع اخبار كشمير واشوف من كفخ فلسطين والا اسرائيل والا ادقدق عليكم غصبببب
رحت اتابع الرسوم . لقيت مسابقه على mbc3 .
. والجايزه كورن فلكس ورحله سفاري ( واساسا التصوير باستراحه ماخذين الوغدان له و مكثرين به الزرع وحاطين طش كانه بحر )
قلت ااتابع قناه كوميديه . لقيت حسين عبدالرضا مسوي مسابقه واللي يقدمه الفاهي اشكناني هذاك . ويقول ارسل كلمه تذكره واربح تذكره سفر
ياناس مره رحت دورة المياه( وانتم بكرامه ) لقيت مذيع مسوي مسابقه .
. ابي أخذ راحتي واعيش جو رومنسي بيني وبين نفسي واحلل اوضاعي واشوف خططي بالمستقبل
الا يطلع لي مذيع يعطيني قائمه به ارقام الاتصال وادور رقم السعوديه بسررررعه وعلى طول ارسل رساله به حرف خاء واقوله سكر الباب( ابي المذيع يفارق بسرعه مو وقته )
ياناااااس حتى باوقات الفراغ ما احد ياخذ راحته .. وين حقوق الانسان وين جمعيه الاغاثه الاسلاميه . وين الملك عبدالله <----- الحين يجيب الطامه

ياناس طقت تسبودنا من رسائل الجوال جالس تشرب ماء تجيك رساله . جالس تتابع فلم تجيك رساله .. جالس تفكر بمستقبلك وحياتك بمكان خالي من الانس والكائنات الحيه الا تجيك رساله.. حتى جدتي لقيت بجوالها رساله ( ارسلي كلمه مكياج واربحي طقم مناكير + عمليه تجميل )
الحين خلونا نسدد فواتيرنا وبعده نرسل لكم الكلمات والاحرف اللي تبون ؛ لكن بلاكم والله ما تدرون انه الفاتوره له 3 شهور وانا شاطف الاتصاالات وكل يوم هم يرسلون لي سدد سدد )

’’

اقسم بالله من عذره هههههههههههههههههههه

لا والادهى والامر اذا جاك واحد اسمحو لي وانتم بكرامه نسميه بالعاميه ( غبي )
تلقاه جالس قدام التلفزيون واي برنامج تصويتي يصوت فيه , طبعا الحمدلله جمهور الهلال اغلبهم مايتصفون بهالصفه , لكن انا اعطف على الجمهور الاصفر

ياخي والله حرام نص حلالهم يروح تصويت

ذبحونا ببرامج التصويت , برنامج ستار اكاديمي يخلون السعوديين للمراحل النهائيه عشان بس التصويت , برامج mbc كلها مشتغله على حلال الريالات

لدرجه فيه قنآة اسمها الان , حاطين برنامج خاص للمرأه السعوديه وعليه تصويت

الى متى الشعب السعودي بعضهم وليس الكل يكون ( مغفل ) الى متى والناس تاكل حلالنا ,


في اوربا لو لقوا انك مسوي مسابقه تلفزيونيه فيها نصب
يلعنون جدفك ويخلونك تعوف ابو الدارهم وتقول ياليت ما شفت صوره الملك عبدالله بالريال
تبي تسوي مسابقه خلك رجال وامش سيدا لاتراوغ يمين ويسار
وتحسب الناس مخفات
مو مثل ربعنا .. والله ما اخبر مسابقه كانوا صادزين فيها كل مسابقه اخس من الثانيه

وياليت عاد بهن بركه وفائده الا كلهن اما حاطين صوره حصان وحاذفين ذيله ويبونا تركب الذيل المناسب له ؛ والا تلعب اكس دايره مع المذيع هههههههه

ليه في اوربا يطلعون ريحتك والمسابقات بذمه وضمير وكل شئ يستاهل ترسل
اما هنا الامور سايبه لو تسوي مسابقه عن اكثر واحد يجمع قواطي الببسي
ما احد يقوله شئ


ومن هالمنطلق اناشد الجماهير الهلاليه خاصه والسعوديه عامه على عدم التصويت لآي برنامج او رسائل جوال .. الخ

اهم شي ماياكلون حلالنا يحسبون اننا على بنك , مايدرون ان الشعب السعودي اغلبه مطفر