[والله احبك ياذيب]

بسم الله الرحمن الرحيم

اخواني الزعماء,, ادعو الله العلي العظيم ان يوفقنا يوم الاربعاء ومنها لطوكيو والعوده بالكأس بإذن اللي ما تنام عينه


انا فاتح الموضوع علشان هالجمله اللي دايم نسمعها بالمدرج ( جلوس يا شباب جلوس )


يعني اسألك بالله جاي من بيتكم ولا جاي من برا الرياض علشان تحط رجل على رجل ؟؟


يا جماعة الخير اكاد اجزم ان الجمهور في كثير من الأحيان يكون هو السبب الرئيسي بعد توفيق الله في انتصارات الكثير من الفرق

هالمباراة يا حياة او موت لنا كمشجعين وللاعبين وللإدارة واللي بيقول غير هالكلام غلطان ,, علشان كذا أتمنى اللي بيحضر يحط في باله انه من يوم يبدأ الشوط مافيه احد يقعد عالكرسي ,, بين الشوطين نبي نسمح لكم بس مع بداية الشوط الثاني برضو مانبي احد قاعد,,

يعني اللي حضر مباراة الغرافه الذهاب وبدون ما يسمع تصريح سامي الاخير,, يدري ان لاعبين الغرافه مستحيل اصلا يقدرون يمسكون كوره في اول ثلث ساعه والسبب الجمهور ,, مع الهجمه قمة التفاعل والتشجيع ومع المرتده علينا كل الجمهور بصوت واحد ( هووووووووووو) على لاعبين الغرافه لين تضيع منهم بكل سهوله.


الكوره في ملعبنا يا زعماء قبل ما تصير في ملعب اللاعبين ,, نبي نشجع ,, نبي نحترق ,, نبي نطلع من الملعب وكأننا لاعبين مباراة



رساله أخيره اتمنى ان تصل الى رئيس الرابطه:

- مواويل
- لاتقولو مقدر اجيبه
- يا منياتي

كلها ما نبيها يوم الاربعاء ,,, نبي اهازيج يتفاعل معها الجمهور بسهوله ويظهر صوت الجمهور جماعي مما يسبب التأثير الأكبر على الفرس

- هلال هلال هو هو
- الزلزال
- الموج الازرق جاكم الموج الازرق

ختاماً أتمنى ترفعون ايديكم للسماء وتدعون ان الله يوفق زعيمنا يوم الاربعاء واعيدها مرارا وتكرارا ,,, نبي الجمهور 90 دقيقه واقف يتفاعل يشجع يحمس وبإذن الواحد الأحد مانرجع خايبين