[hadeel alyahya]

السلام عليكم ورحمة الله وبركاته ..

مدري اقول مبروك ولا هاردلك ؟؟ هاردلك على المستوى المخجل .. ولا مبروك بآخر الدقايق ونحمد ربنا ونشكره مليون مره لآن فريق الغرافه كانت هجماته وتسديداته وخطورته على المرمى الهلالي اكثر وضيع اهداف كثيره

لكن الحمدلله والشكر .. الله مايضيع حق .. الهلال عمل واجتهد طول الموسم .. لكن مع الثقه العاليه والزايده في لاعبين الهلال .. اللي متى ما بيتعلمون الدرس هذا ..؟

حسيت بلحظه ان سيناريو مباراة النصر يعيد نفسه .. ثقة الهلاليين وتهاون اللاعبين وتخاذل المدرب . ودروب كبير في مستوى الفريق الهلالي ككل .. عليه اكثر من علامة استفهام

اللاعب الوحيد اللي يستحق الشكر والثناء واثبت نفسه بإنه لايصح اان يجلس على مقاعد البدلاء هو اللاعب عيسى المحياني .. من دخل عيسى اشعل الهجوم الهلالي شكرا عيسى المحياني شكرا طلق المحيا شكرا شكرا شكرا


بالنسببة للاعبين الاخرين ..


ياسر القحطاني : صدق سجلت هدف بس جماهير الهلال ماراح تنسى الفرص الضائعه اللي ضيعتها [ قرصتين ] سانحه للتسجيل عند الباب وانت تتصرف بحماقه غريب امرك .. لكن نتمنى منك افضل من ذلك والقادم احلى ياياسر

احمد الفريدي : بسألك سؤال واحد فقط .. لمتى هالبرود .. لمتى لمتى ؟؟

حسن خيرات : انت اليوم نكبة الدفاع الهلالي بكل صراحه .. متى يرجع المرشدي ويعيد لنا الثقه في دفاعنا

محمد نامي : اليوم مانت في مستواك ابد ابد ابد .. مدري وش جاك لاباصات زي العالم والناس لا تغطيه دفاعيه صح بالعربي .. اليوم انت لادور هجومي ولا دور دفاعي .. مدري وينك ؟

محمد الشلهوب : مالعبت الا باخر ربع ساعه من المباراه . ولا طول المباراه غايب

اسامه هوساوي : صخرة الدفاع الهلالي .. ولا زلت .. المباراه هذي انت تدافع لوحدك

لي يونج بيو : لمتى هاللاعب مظلوووم من الجماهير .. بس تطبلون لولي ولنيفيز ولرادوي ؟ هاللاعب فنان ومبدع

نيفيز : اشوى انك طلعت .. لآن هذا مو بيومك .. كوراتك كلها مقطوعه ولا فيه تمريرات وصناعة لعب صح

نواف العابد : توقعت انك لادخلت بتكون ورقه رابحه .. بالعكس طلعت ورقه خاسره ماسويت شي بالمباراه وفوق ذلك ضيعت هجمه سانحه كانت بتخلي النتيجه النهائيه 4-3

الغنام : ماقصرت .. محور واحد .. ماهو ذنبك ذنب جيريتس .. لانك تحملت ضغط كبير من وسط الغرافه

سلطان البرقان : ماشالله عليك .. مستوى حلو منك بأول مباراه لك ومباراه مهمه ومادخلت اجواء المباراه الا انك اديت دورك

حسن العتيبي : طبلنا لك بالشوط الاول ومدحناك وبعدها مدري وش صارلك ؟ اربعه اهداف كبيره ياحسن .. بس صراحه مالومك دام الدفاع عندك تعبان .. حسن خيرات .. محمد نامي .. مدري وينهم مافيه بالتغطيه الا اسامه بكثير من الهجمات


اريك جيريتس : شكلك تفكر بمنتخب المغرب .. ولا وش سالفتك ؟؟؟ وش هالتهاون .. لا وبعد كل هالاهداف اللي جت على المرمى لهلالي .. ماشفته معصب ولا متنرفز جالس بالكرسي ويفكر وعلى قولة فيصل ابو اثنين
ياتلبس قبعه الهلال ولا تلبس قبعة المغرب .. اختار واحد من الاثنين !!!!! ؟



عيسى المحياني : انت افضل واحد بالمباراه .. اتمنى ان الهلاليين يصوتون له كأفضل لاعب هلالي

الجماهير الهلاليه : انتم من زفيتو فريقكم للمباراه ماقبل النهائيه بحضوركم وتشجيعكم وموآزرتكم لفريقكم حتى وانتم خسرانين بالاربعه ,, لأن ثقتكم بفريقكم كبيره


بالاخير مبروك الفوز .. صدق اننا خسرنا .. ومعصبين ومتنرفزين .. بس لاتنسون ان الهلال فرحكم كثير واللاعبين اشوى انهم تداركو وقت المباراه وسجلو وبالنهايه بالتوفيق للهلال في مشواره الاسيوي

وعلى قولة بعض النقاد [ هذي المباراه راح تكون لقاح للاعبين الهلال ] عشان مايتهاونون مره ثانيه ويتخاذلون .. ولقاح ايضا لمدرب الهلال اذا استمر

(( وماتفهم الدرس الا اذا نجحت في اختباره )) واللاعبين نجحوا وبإذن الله انهم فهمو الدرس ,,


بالاخير احب ابارك للأمير عبدالرحمن بن مساعد دفع واجتهد وادى واجبه كرئيس للهلال والحمدلله الله ماضيع جهد الامير وصبره ودعاء الهلاليين , الهلال لديه استحقاقات مهمه بالدوري وبالاسيويه .. اتمنى انه يسستفيد من هالاخطاء اللي حصلت اليوم .. نختلف كلنا لكن يجمعنا شي واحد هو حب الهلال