[4YOU4EVER]

السلام عليكم رحمة الله وبركاته

اخواني الزعماء كل عام وانتم بخير..

سالفة التذاكر هي سالفة تتكرر كثير قبل اي مبارة مهمة للزعيم..غالبا مايفتح النقاش فيها من قبل المثبطين للعزيمة او المندسين بمعنى اخر.. اللي يحرصون انهم ينشرون اشاعة ان التذاكر انتهت والملعب فل وان مافيه اي داعي للجمهور انه يحضر لانه بالعربي مافي مكان..

شفنا في مرات كثيرة راحت ان هالحركة للاسف مشت على بعض الجماهير وصدقوها..وكانت النتيجه انه بعد بداية المباراة يرون باعينهم ان الملعب ما امتلاء وان فيه امكانيه لحضور الالاف من الجماهير..

ياجمهور الهلال الكبير.. يامشجعي نادي القرن..يا نصف عدد سكان المملكة ان لم تكونوا اكثرر..

مستكثر على عبدالرحمن بن مساعد اللي دفع وبذل الغالي والنفيس ليسعدك ويرفع اسم الهلال عاليا انك تحضر؟

مستكثر على نواف بن سعد اللي بالرغم من مرض اولاده الله يشفيهم ويشفي مرضى المسلمين بذل وتعب وضحى بوقته لمصلحتك ومصلحة الفريق؟

مستكثر على جهاز فني واداري بقيادة غيريتس وسامي الجابر اللي خلونا نشوف هلال ممتع.. علم وأدب واهان كل من تسول له نفسه انه يفكر مجرد التفكير انه منافس للهلال بالخمسه؟

مستكثر على اللاعبين اللي تعبوا وبذلوا وماعيدوا مع اهلهم الى يوم واحد علشان هالمباراة علشان لايخذلون جمهور الهلال الكبييير ((المتوقعين)) حضوره!!

مستكثر على ناديك تعب ثلاث او اربع ساعات و 20 ريال؟

مستكثر على نفسك انك تمتع عيونك وترضي غرورك بهلال يحرق الخصوم حررق في الملعب وتكون سبب داعم ورئيسي في ترويض بطولة استعصت كثير وعاندت؟

اذا لم نحضر لفريق مثل هذا.. بالله نبي نحضر لمن؟!!

تبون اسيا!! .. بسيطه.. اسيا مهيب طالبة الكثير.. مهرها 65 الف مشجع هلالي غدا في درة الملاعب.. مهب واجد صح؟؟ سويناها وكنا الوحيدين اللي ملينا استاد الملك فهد عن بكرة ابيه مرتين..ونقدر نعيدها بكره..

جمهور نادي القرن..مشجع الهلال الوفي..بكره يومك..سوو اللي عليك واحضر من بدري قص لك تذكرة واجلس واستمتع .. شجع ناديك وخلك سبب في فوزه بعد توفيق الله سبحانه تعالى .. واحرق قلووووب ناس حاقده تنتظر سقوط ناديك وعدم حضورك ليبدأوا التشكيك في جماهيرية زعيمهم ..


في الختام عندي عدة اقتراحات لموبايلي كمالكة لحقوق التذاكر لنادينا:

-اتمنى قبل اي مباراة اضافة عداد الكتروني في موقعهم يوضح عدد التذاكر المباعة وعدد التذاكر الباقية ودرجاتها..لتفادي اللغط الحاصل دائما قبل اي مباراة للزعيم..

-اتمنى ان يستطيع الجمهور شراء تذكرته عن طريق الرسائل النصية SMS .. يرسل المشجع من شريحته الموبايلي الموج الازرق رسالة نصيه الى رقم معين 5050 مثلا.. فيها عدد التذاكر والدرجة المطلوبة.. ويتم الرد و التأكيد على اتمام العملية من موبايلي برسالة فيها تأكيد لعدد التذاكر ودرجتها وقيمتها .. ورقم العملية لاستلام التذاكر لاحقا من الملعب او اي من فروع موبايلي او حتى ترسل له بالبريد..وتنزل قيمة التذاكر على فاتورة العميل الشهرية او تخصم من حسابة اذا كان يملك شريحة مسبقة الدفع.. بهالفكرة يستفيد النادي وتستفيد موبايلي ويستفيد المشجع الهلالي..

فائدة موبايلي تكون في ان المشجع لازم يشترك في باقة الموج الازرق ويكون عميل لموبايلي لو يبي يستفيد من الخدمة..بالتالي زيادة المشتركين..وايضا بتساعد في سهولة احصاء عدد التذاكر المباعة وتنظيمها..
ممكن الاستغناء عن التذاكر الورقيه العاديه وتوفير قيمتها واستبدالها بجهاز M-PAY المستخدم حاليا في برنامج نقاطي عند بوابات الملعب..وتتلخص فكرته في التالي:

إذا توفرت نقاط من الممكن استبدالها لدى شركاء نقاطي , عندها قم بإتباع الخطوات التالية:
اخبر البائع انك تود استبدال نقاطك بمكافآت.
سوف يطلب منك البائع الاتصال على الرقم 1456 من موبايلك من ثم وضعه على جهاز ( M-Pay ) حتى يتمكن من قراءة رصيدك من النقاط.
سيظهر على شاشة الجهاز رصيدك الحالي من النقاط و خيار الاستبدال من الفئات المذكورة في جدول المكافآت على حسب رصيدك من النقاط المتراكمة.
اختر عدد النقاط المراد استبدالها وسوف يقوم جهاز ( M-pay)، باصدار إيصالين باتمام عملية الاستبدال. واحدة لك والاخرى للبائع.
تخيل عزيزي المشجع سهولة الامر وتميزك كمشجع هلالي عن الباقيين في حال استخدام هالفكرة..

بالنسبة لفائدة النادي ستكون في ارتفاع عدد المشتركين في باقة الموج الازرق للاستفاده من الخدمه وبالتالي الحصول على المكافأة المرصوده من موبايلي عند الوصول لرقم معين من المشتركين..وايضا سهولة الحصول على التذاكر للمشجع وبالتالي ضمان وجوده في الملعب وتفاعله مع الفريق..ومن الممكن جعل مسج الحجز بمبلغ رمزي 5 ريالات مثلا تذهب كلها للنادي..

بالنسبة للمشجع الفكرة بتسهل عليه طريقة الحصول على التذكرة وضمان تذكرته والابتعاد عن الاشاعات وعن وجود التذاكر من عدمه .. كل اللي تحتاجه.. مسج لموبايلي فيه عدد التذاكر والدرجه المطلوبه .. يوصلك مسج تاكيد من موبايلي توصل الملعب تستخدم جهازك مثل ماذكرنا فوق..وبس..حياك في مدرج الهلال
ايضا بتكون فرصه للجماهير الهلالية في المدن الاخرى خارج المدينة اللي تقام فيها المباراة انهم يشترون تذاكر ويدعمون النادي بقيمتها حتى لو ما حضروا..
ومن الممكن ان اخواتنا الهلاليات يدعمون النادي عن طريق شراء التذاكر بدون حضور..
تفيد الجمهور ايضا في حالة عدم توفر مبلغ التذكرة انها تضاف لفاتورته في نهاية الشهر..

وبكذا تكون جميع الاطراف استفادت.. موبايلي.. النادي .. الجمهور..

طبعا فيه العديد من الامر اللي ممكن تضاف .. مثلا ان تذاكر المنصه تكون الاولوية لعملاء راقي في الحصول عليها.. او مثلا اضافة خدمة استبدال النقاط في برنامج نقاطي بتذاكر مباريات والكثير..

عموما هالافكار ممكن مناقشتها لاحقا.. المهم دعم فريقنا غدا والحضور والتشجيع الايجابي .. وان شاء الله الفوز يكن حليف نادينا..نادي القرن الاسيوي..الهلال..