[leader ksa]

صباحكم مسائكم ورد كويس مثلكم
كل عام وانتم بخير




http://vb.alhilal.com/showthread.php?t=918725
>>يتمصلح يحط مواضيع الاشراف
لاجد الله يقويكم على اللي تشوفونه صح بس عندي شي وحيد ليه تمنعون صورة رابح صقر ومخلي صور هالسواويق مليانة في تواقيع البنات
والله للحين اشوف كم حبه حاطين لي صورة فنان كوري مدري فلبيني طيب ترا رابح مايخقق عشان تمنعونه
جد انا عمري 22 سنة ماقد شفت بنت تحب رابح صقر الا 3 وشاك في انوثتهم
عموما حبينا نسوي شي كويس فالحياة ولااحد يرد على هالنقطة بتاتا طبقوا وبس
وترا اللي يزعل المشرفين كأنه يزعلني -->موب مصلحة ابد ابد صفوا نيتكم تراكم برمضان


وكعادتنا الكريمة نقولكم ماراح تطلعون بفايدة ابدا

ادري تقولون ياليل القروشة بس لاتخافون جاي اليوم اعطيكم بشارتين واروح

الاولى

انه ان شاء الله ماراح تشوفون وجهي بمواضيعي البايخه
لان الهلال اهم منكم انتوا ووجيهكم طال عمركم
وانا للاسف مقصر معاه
لاول مرة من سنوات ماعرف اخبار الهلال
تخيلوا مرت الصيفية كذا مادري وش الطبخة
ليه وش السبب اللي شاغلني عن حبيبي مادري

لذا راح نبدأ في مرحلة المسانده والحضور لكل المبارايات المقدور عليها ان شاء الله
كعادتنا حفظنا الله ورعانا>>> قولوا امين

وتعرفون اذا بدا الموسم وحضرت فالملعب لازم لك يومين تشاور وتاخذ مواعيد وتشوف من اللي بيحضر
وتتهيأ نفسيا وتتغذا كويس لانك بتروح لشي برا يسمونه ملعب مكان تستانس فيه
بس هنا صدقوني اسم على غير مسمى
لذالك يومين استجمام واستعداد ذهني وبدني ونفسي بالاستعانه بالخبير الدكتور سعود الصرامي
وبعد ماتحضر وتحس انك انسان كويس لانك ساندت فريقك الكويس 3 ايام منسدح فالبيت
والسدحة نتيجة لثلاث اشياء
اما1عسكري فاضي >>نفس بثارة قسم العليا
2من كثر منت واقف تسلم >>نفس وقفة العزايم مع اختلاف الاجواء واحتمال ان اللي بجنبك يكون مرتفع
3لما يجيك انسان يقرا للفقراويين 24 ساعه ويتاثر فيهم ويجي يهايط على ياسر وسط المباراة
لازم تتفاهم معاه وتهجده وتخفض نسبة الاتش عندك او اذا كانوا اخوياك معك تستلمونه طقطقة وهذا النوع المفضل لكن بكل الاحوال راح تنسدح ياما بسبب الاتش او بسبب الضحك>>مثل استراحة جماعتنا كل شيبانا اهلاويين ولانصراويين ولا مالهم فالكورة بسبب برستيجهم تعرفون
ويجيك كل واحد فيهم يتفلسف عليك ويهايط وانا تكلمت تخاف يزعل
وازين شي لما يجيك واحد الله يستر عليه نصرواي هذا يقاله من الوفيين للنادي ومع اعضاء الشرف ومدري وشو
دخل له 3 لاعبين للنادي واسطات وقلق وفالاخير كلهم خلال 6 شهور مكروشين


واذا كانت المباراة مش ولابد ونتيجتها شينه تلاقيك في ذاليوم مافيه احد ماصور خشتك وتجلس تحدث فالجمهور
اربع ساعات فالاخير ماينزلونها عشانها هزيمة طيب نزلها بقعاء تصوعك >>عصبي

وتكون قافله معك وترجع تشوف لك احد تسولف معه باي شكل من الاشكال تسلم ويرد تقوله كيف الحال يجيك يرد عليك بأكره كلمه فالحياة (ازقح)
الكلمة الوحيدة من عرفتها ماهضمتها تجيب لك اشياء ماراح اقولها عشان الي ياكلون بس

ازقح وش ازقح سين سؤال وش ازقح تحت أي بند اصرفها ازقح ؟
ولا بعد تجيك بنت وحاطة لها ذاك النك دلوعه عسولة سكورة كيوتة كتكوتة مدري وشو مابقى الا تقول حلاو مصوصة
وفالاخير تقولك ازقح يعني بالاول مسوية انتي التي هي كلها شي كويس ودلع وعسل وسكر وقلق فالاخير ازقح

اسولف مع بنت انا ولا اسولف مع واحد يفر على المعرفة لاويقولون وش فينا نحن الذين هم كويسات
وفالاخير يطلعون لك كلمات انت بنفسك ماتعرفها لاوجيه لاسوالف ولا مدري وشو ولسى يطالبون لهم ذوليك بحقوقهم
ياخي احد قايلكم ان عندنا امرأة مافيه يلعبون عليكم كلها تهيؤات يابشر
ولا من زود ماهم شايفين انفسهم شفت لهم قبل فترة حملة على السناوي او مايسمى لدى البعض بالمقوصر
عاد هنا اقول باعلى الصوت كلش الا السناوي اهم شي في التراث السعودي
يعني وجيه مافيه جسم مافيه ركب مافيه وتهايطون ؟!!
وانا من هنا اطالب بعودة ابو سعيد وابو سعيد طبعا رجل الهيئة اللي كان عندنا زمان
وطبعا ابن ام ام امه بس يشوفه شاطف السوق لا يتله مع اذنه
وبنت ام ام امها يشوفها بس لابسه كتف يهزأها كأنها بنقالي قدامه وتنطم وتقول ان شاء الله ياشيخ
موب الحين تروح السوق وترجع ماتقدر تنام من الاشكال اللي شايفها الله يعافيهم ولايبتلينا بس

والمشكلة في الاعلام السعودي بقيادة القناة اللي فتح لاجلها المجلس العام
يعني جالسين يطالبون بالسماح للشباب بدخول الاسواق وماني عارف ايش

وطبعا لايغركم ياشباب ان هالشي لصالحكم بالعكس ضدكم وهذي اساسا سياسة امريكية
يدرون انكم لما تروحون السوق ترجعون ماتقدرون تنامون من الاشباح اللي تشوفونهم
وبالتالي راح يقل انتاجكم وعطائكم وتنتابكم الكوابيس وبهذا يستطيعون تدمير الامة

لذا اطالب بدعمكم لعودة ابو سعيد ورفاقه

وطبعا انا اتفهم ان كل واحد ممكن يبغى يتميز بكلمة او شي يشوفه كويس بس لازم تعرفون هذا العلم وتدرسونه من جميع اطرافه قبل احد فيكم يخوض في هذا الخوض
يعني انا فاتح مدرستي من ثاني متوسط من اول كلمة انتجتها ونشرتها ولاقت نجاح واسع وباهر

الا وهي الكلمة التي اختصرت الكثير من الكلمات وجعلت من لايرغب في تعلم اللغه العربية يتعلق فيها ويعشقها

من جمال هذه الكلمة ومماترمز إليه من معاني جميلة ورقيقة ولايمكننا وصفها سوا بقصيده

في منتهى الرقة في منتهى الذوق
حبيبتي في كل حاجة عجيبه
ان حكت تعرف تخليني اروق
واذا بغت تجيب راسي تجيبه
وان جيت حطتني على الراس من فوق
محدن اسرني كثر خلي بطيبه

والى اخر القصيدة

والحين قبل لااقولكم الكلمة ياليت تغمضون عيونكم وتنزلون تقرون

الكلمة تحت

تحت

تحت


ارفع

ارفع

ارفع

يعيشون

على قلبي


يذا الليل


لاحد يشره علي بس اخذ راحتي قبل رمضان

المفردة العجيبة هي :

(اللحسة)

هذه الكلمة التي هي تم تعريفي اليها من قبل اخي الاكبر الملقب بالاشعر
وماراح اشرح اللقب عشان لايتم تصنيف الموضوع بالموضوع الاقزز في تاريخ الشبكات العنكبوتية
وهذه الكلمة هي من عرفتني على طبيعه الشباب الكويس وعلى تقبله لمختلف الكلمات وتفتحه على المعرف والعلوم الجديده

وكلامي عن عيال الرياض تحديدا
وانا هنا من خلال هذا الموضوع اذ اطالب
بتسجيل اختراعي ومساهمتي في تنمية الشعب السعودي من خلال نشر هالكلمة من ذاك الوقت لين الحين وانا السبب في انتشارها وصارت الكلمة المعروفة عني طال عمري >>قولوا الله يحفظني


وطبعا لازم اشرح لكم الكلمة بما اني انا اللي نشرتها واتممت نشرها وهاانا اشاهدها يتم استخدامها من الجميع
كانني ارى اطفالي يلعبون امامي >>لله دري على التعبير ياناس

واللحسة هي كلمة تطلق على كل فعل غريب وغير متوقع بالنسبة للانسان الطبيعي وتطلق ايضا على مسبب هذا الفعل بكل تأكيد ومافيه شك ان هذا التعريف منحصر على الانسان وافعاله .
وهذه الكلمة تم أخذها من مصلح لحسة مخ وتم تطوريها وتحديثها لكي تراعي التراث والموروث السعودي

>>هذا التعريف يحفظ وبسمع لكم بكرة


وينطبق على تعريفي عدد من الاشخاص واقربهم نسيبي
وطبعا نسيبي هو شخص لطيف وكويس الا انه يحب يتابع افلام ابيض واسود ويكره رابح صقر وملحوس بكل ماتعنيه كلمة ملحوس انسان يروح فاليوم 600 مليون مشوار سوا وبقية الاسبوع منسدح فالبيت يشكي من هاليوم
وطبعا من غير شطحاته الاساسية واللي تكون ايام السفر اذا سافرت معه الله لايوريكم تلاقي الكل يضحك الا ذا لحاله قافله معه

وفي هالصيف طلع له دورة في القاهرة مع اني مادري عن صحتها لكن راح احسن النية
وفي يوم اتصل علي حوال الساعه 1 في بداية الصيف وقال تعال انا فالرحاب >>هذا مخطط للي مايعرفونه

وانا لين الحين مادري وش وضعه وش يبغى بس قلت اروح واشوف وصلت لقيته جالس فالسيارة
واوقف وانزل الا نزل معاه كيس فيه كود ريد وهولستن فراولة ودوريتوس وليز ملح
وانا اقول في نفسي عزالله بيشربنا فيمتو قبل رمضان

المهم الا يقولي انا جاتني دورة في القاهرة ولازم اروح ومدري كيف وابيك تتابع العمال اللي يشتغلون في البيت
يعني تخيلوا مخليني اسحب على اخوياي واجيه ورايح مخطط وشاري له ليز وكود رد عشان يقردني
ياخي اختصر وبس لكن طول عمره قروشة ونكبه بكل ماتعنيه كلمة نكبه مرة قابلته في مقهى
الا يجيني ثاني يوم وامي موجودة من اللي كان معك امس ؟
طبعا كل شي عند امي الا الدخان والمعسل قدام الناس بس اما اذا ماحد شافك سو اللي تبي
ومرة شطفته وطلعت امي معه الا يقولها شوفي هذا ولدك



واقوى نكبة لما انحاشت خدامتهم قبل كم سنة
اقنع امي تعطيهم الخدامه لين يجيبون وحدة جديدة وفالاخير ماعاد شفناها وسفروها وجابوا غيرها وانا من ذاك الوقت لين اليوم وانا كل سنة الف في هالسمبوسة

وقام يتفلسف بعدين كيف تخلين خدامه مع الاولاد شايفني طالب خدامة تشبه نانسي انت وخشمك
ياخي ابي خدامه لو ماشوفها الا برمضان تجي تلف سمبوسة وتروح والله راضي
ومافيه امل امي تفطر بدون سمبوسة ولو انها ماتاكل منها بس لازم تكون موجودة عالسفره
طيب ابي اعرف انا وش الشي المضر لما نفطر على كبسة مثلا ؟

اكوس اكله فالحياه الاكله اللي كل يوم معاها ولما يجي رمضان نخونها >>بحاول احزنكم وأثر عليكم واقنع المجتمع انه يفطر على كبسه عشان ماالف سمبوسة

يعني ليه وش تبون فيها وش جاب ام السمبوسة للسعودية
ليه لازم تاكلون شي مثلث
وش المتعه فيها
ياخي ارحموني ياخي
مافي قلوبكم رحمة
كل يوم اجلس نص ساعه ولااكثر وانا الفلف فيها
عالاقل على كثر مطاعمكم الخايسه خلوا فيه مطعم واحد يعرف يضبط سمبوسة
بس تصدقون على الاشكال اللي تطلع لي كل يوم للسمبوسة اللي مربع ومضلع ودائري ونجمة لكن سبحان الله طعمها زي العسل


وبهذه المناسبة اقولكم مافيه وحدة تتبرع وتتزوج اخوي وتفكني من لف السمبوسة؟
جد زهقت ياخي نبي طبخ فالبيت غير الكبسة والشوربة والاشياء اللي مااكلها

اه بس يا ميمونة >>خدامتنا لبى والله هيك خدامات
انا ماقدر على الفرقا ولا تقدر على فرقاي ولا غيرك ملى عيني و لا غيري ملى عينك


ونعود الى كلماتنا العجيبة حيث انه تم نشر هذه الكلمة منذ مايقارب 8 سنوات
وبعدها تم نشر بعض الكلمات التي تتعلق بهذه الكلمة والمكلمة له مثل لمسة ولبسة

(اللمسة)
تطلق فقط على فعل الشخص بمعنى لما تلاقي اللي بجنبك بنتفض فجأة
او يطيح طيحة غبيه
أي شي كذا تقدر تسميه ملتمس
وهي طبعا اقل من مرحلة اللحسة لان اللحسة مثل ماشرحنا سابقا تطلق على الافعال والاقوال
وكلمة اللمسة اتت من (التماس في المولد الكهربائي)

اما اللبسة بصراحة استخدمتها لشي واحد فقط لاغير لان بعض الاشخاص تعدوا مرحلة اللمسة واللحسة بمراحل خيالية لذلك لابد من اعطاء كل شخص موقعه الطبيعي
واللبسة تعرفيها نفس تعريف اللحسة لكن الحالة اشد خطورة بمعنى ان هالشخص مايمديك توقف معاه ضحك وهذا الشخص الملتبس
وطبعا الضحك على المواقف الطبيعيه اللي يسويها بدون شعور وبكل رحابه صدر

وفي هالمرحلة عندي عندي شخص واحد لكن بقولكم موقف واحد بس سواه
اتصل على خويه يوم الاربعا قاله تخاوي الشرقية قاله قدام

مشوا الشرقية ووصلوا على صلاة الفجر استاجروا غرفه وناموا لما قاموا رجعوا
ادري كل واحد يفكر طيب ليه راحوا وش يبغون
بس اقولكم الظاهر ان انهم ناويين يجربون المكيفات والله اعلم


خلص موضوعنا ولكن باقي نقطة
انا جاني اتصال قبل يمكن في نص شعبان ممكن وكان الصوت لانثى ولكنها غير عن كل الانثيات
تقول تكفى ليدر الله يخليك انا عندي برنامج في رمضان ومابغاك تنزل مواضيع وتسحب الجو مني
اثاريها طلعت حليمة وطبعا انا كعادتي سحبت عليها لانها نشبة ياعيال مدري وش اقولكم عنها بس
المهم عشان لاتجلس تزعجني طمنتها وقلت لها لاتخافين بنزله قبل رمضان بس الاتصالات خرب مودمهم
وجلست اكثر من 10 ايام بدون نت بس الحقيقة ماقصروا لهم اكثر من سنتين ماجاني اي انقطاع في النت غير مرتين مرة انقطع 6 ساعات لما الكيابل البحرية مدري وشو وهذي المرة الثانية والخرب في المودم كرف معي لين قال امين مسكين
يالله ترحموا عليه الله يرحمه وباركوا لنا في 006 >>اسم المودم الجديد
والحين انزل الموضوع وباقي على حليمة ساعة ونص تقريبا واقول ان شاء الله ان الناس ماتتركها عشان
لاترجع تزعجني

أحبك و أستهين اللي يهينك
و أدافع عنك لو حاضر و غايب

واعذرونا ترا وضعنا موب طيب
تحياتي