[المنتدى الاستشاري]

فكرة: سندريلا الهلال اعداد وتصميم : الهنوووف + عسيريه لنا من كل عام شهر فضيل .. أعاده الله علينا وعليكم وجميع المسلمين بالخير واليمن والبركات وكل عام وانتم بخير **][يوميات رمضانية 1431 هـ ♥][ ** لقد عدنا اليكم .. تحملنا الاشواق للقياكم .. ونسعد ان نعيش معكم . في سلسلة تحمل بين طياتها يوميات الأعضاء الرمضانية من كل عام هذه السلسلة أنتم أهل بيتها ونحن ضيوفا في حضرتكم ،،، ♥ أهلا وسهلا بكم أحبتنا ودعونا نرحب سوية بالضيف" الرابع المتميزة شوق الكويت لكي تحكي لنا احداث يومها مع شهر رمضان المبارك ماهو رمضان بالنسبه لك ..؟ رمضان شهر الخير والبركه فيه تقوى علاقتي بربي واتقرب منه اكثر تصفي فيه النفوس وتبدا صفحه يديده لي مع ربي ومع الناس . رمضان بالنسبه لي : صفحه يديده بحياتي برنامجك اليومي في رمضان ؟ انام بعد صلاة الفجر واقعد الظهر اقوم اصلي وبعدها افتح النت اشيك اشووف المنتدى والفورم اقعد تقريبا الى العصر اذا في شي يستاهل وبعدها اصلي العصر وانزل عند اهلي واشوف بعدها اي شي مع اهلي بالتلفزيون .. وقبل المغرب بساعه اقوم اقرا قرآن الى وقت الفطوور بعد الفطوور وقت جمعة اهلي الى العشاء وبعدها اقوم اصلي التراويح واذا فيه زيارات ابدي بالتبدل والمكياج واذا مافيه اقرا قرآن او اسوي اي شي . ماهي اكلتك ومشروبك المفضل في رمضان ؟ اكلتي المفضله السمبوسه ومجبوس دياي مشروبي المفضل دايب بيبسي متى اول مره صمت فيها .واذا عندك مواقف مع الصيام اذكرها ؟ اول مره صمت فيها بثالث ابتدائي وكنت اتميرض علشان افطر اما الموقف : والله برمضان تحصل مواقف واايد بس بذكر منها واحد : سنه من السنين ويوم من الايام كنت مو صايمه لاني مريضه المهم ان محد بالبيت يدري غير اختي وامي وطبيعي ماراح اقول لاخواني ... المهم حسيت اني ميته من اليووع وشفت الكل بغرفته ومسكر عليه قلت بروح المطبخ بسرعه باكل لي شي من اللي مسوينه للفطور .. وهالكلام بعد صلاة العصر يعني بقى تقريبا ساعتين ونص على الفطور المهم دخلت المطبخ واشوف الخدامه واقفه ويمها صحن سمبوسه حاااااار وشكله يشهي هو خلقه يشهي بس اذا حسيت بالمغامره وانك بتاكله بالسر يصير يشهي اكثر توني ماسكه السمبوسه بيدي .... ولا يدخل اخوي المطبخ بيسأل شنو الفطوور ... انا كان بامكاني اني ارجع السمبوسه للصحن بكل بهدووء بدون مايحس لكني من الخرعه دخلتها كلها بفمي فجأه حسيت ان عيني يطلع منها دخااان من الحراره وحسيت كل فمي من داخل تشقق من قوة الحراره وتسلط علي اخووي لازق بظهري يقوولي شفيييج المهم ان الخدامه كانت فاطسه ضحك على شكلي وانا طلعت غرفتي بسررعه واخوي حس وسكت نصيحه للشباب : إذا شفت اختك تحووس بالمطبخ لاتحرجها وتخرب جوها موقف لاينسى حصل لك بـ رمضان..؟ امممم بتكلم عن احلى حدث مو موقف احلى شي صارلي برمضان هو قراري للبس الحجاب اللهم لك الحمد مع اني كنت صغيره وتو الناس علي بس قررت اتحجب بأول ايام رمضان علشان يكون الأجر مضاعف طبعا هذا القرار كان قبل 9 سنين لاتحسبون اني توني متحجبه طبعا هذا احلى شي صارلي برمضان . كيف نظامكم واجوائكم في رمضان ونظامكم بالفطور والعشاء والسحور.؟ احلى شي برمضان واللي جد افقده في بيتنا هو جمعتنا طول السنه نادر جدا وبالصدفه نتجمع على وجبة بطاوله وحده ونسوولف مع بعض . لكن برمضان الحمدلله كل يوم متجمعين تقريبا كل يوم ننزل قبل الفطور بساعه وامي تكون بالمطبخ مع اختي وابوي يقرا بالمصحف قبل الفطوور واخواني قاعدين يسولفون وانا افضل دايما اني اقعد اسولف مع اخواني او اقرا قرآن بدل لا احووس بريحة الطبخ بالمطبخ . بعد الفطوور احلى فتره ناكل ونقعد نشوف اي شي بالتلفزيون ونشرب شاي وقهوه وحلو الى صلاة التراويح وبعدها كل واحد يرووح للصلاة او شغله . تقريبا نتجمع فقط بالفطور واما السحور كل واحد بروحه . هل ترى اختلاف بـ رمضان في السنين الماضيه عن السنوات الاخيره واذا نعم وش الاشياء الي افتقدتها.؟ أي احس بفرق لكن مو كبير وايد مثل مانسمع بالعكس احس ليلحين في جو ايماني بكل بيت . اللي يضايقني كيف الناس تهتم فقط بالمظاهر يعني تشوف قبل رمضان بشهر الناس تستعد للرمضان بالاكل واللبس والزيارات ... ليتنا نستغل هالشهر للعبادات ونخلي الزيارات والرسميات لباقي شهورالسنه .!! لكن بشكل عام رمضان له رونقه الخاص بين باقي الشهوور وله مكانته بقلوب المسلمين هل تفضل الصلاه في المسجد القريب من بيتكم او تميل للتنويع ومن القاريء الذي تحرص على الصلاه خلفه في رمضان؟ رغم ان الافضل للمرأه الصلاة في بيتها لكني احب برمضان اصلي بالمسيد لان ماادخل المسيد الا بهالشهر واحس جوو غيرر ومشاعر ثانيه وروحانيااات لكن من نص السنه اللي طافت بديت اصلي التراويح في بيتنا ولكن القيام احررص انها تكون بالمسيد خاصه ان المسيد قريب من بيتنا وايد . واروح له مشي حتى المشي للمسيد له احساس غير . ما احرص ولكن احاول اصلي خلف الشيخ مشاري العفاسي , ومرات اغير على حسب يعني .. ماني من النوع اللي يدقق على القارئ المهم اي بيت من بيوت الله وإمام أجمل رمضان عشته حتى الآن , متى ولماذا ؟ اجمل رمضان عشته قبل 4سنين تقريبا , كنت بالثانويه وتعرفت على شلة بنات متدينات وملتزمات واثروا فيني حيل . وتطبعت باطباعهم وايد ... وكنت متقربه من ربي اكثرر ومن فروضي اكثر واحرص على كل النوافل ... فكان هذا الرمضان بالذات اللي استغليته خير استغلال .. وماضاع هدر .. ( اللهم لاتشغلنا الا بطاعتك ) المشكله اني تركت هالبنات الحين ويالييت ارجع لهم .. مافي ابرك من صداقه وحب خالصه لله .. الله يذكرهم بالخير رسالة في هذا الشهر المبارك .. لمن تبعث بها وماذا تقول فيها .؟ اي شخص متزاعل مع امه او ابوه او اخوه او صديق عمره خله يستغل هالشهر الفضيل ويصالحه ماهو ضعف لو انت اللي بديت بالعكس بيضل طول عمره منحرج من نفسه لانك انت اللي بديت الصلح . واي شخص منشغل بالبرامج والتلفزيون اقوله يمكن هذا اخر شهر لك برمضان استغله خير استغلال لو عرفت قيمة رمضان مافكرت تضيعه بتفاهات اليوميات الرمضانية بسم الله الرحمن الرحييم السلام عليكم ورحمة الله وبركاته بداية اشكر المنتدى الاستشاري على اختيارهم لي بهالفعاليه المميزه وان شاءالله نكون عند حسن ظن الجميع . بسم الله نبدا يوومي بداية الصبح كنت مواصله وقاعده عالمسن اسولف الى الساعه 9 وتذكرت ان اخوي بيفطر معنا مع مرته وبناته فقلت لازم انام علشان يمديني اصحي ويمديني اصحي اسوي اكشن العصر حق يومياتي نمت وخليت المنبه على الساعه 3 العصر ... انا اخبر اني خليتها 3 العصر بس ماحسيت فيه الا بعد ساعه الا ربع صحيت قمت غسلت وبدلت .. واول مانزلت ابوي كان واقف بس انا مندمجه بالبيبي وماسلمت عليه ولا صبحت عليه قالي محاضرته اليوميه عن البيبي وعن اني لازم انزل اسلم وابوس راسه بعدين اشوف اشغالي بالبيبي والنت وقررت قرار نادر بحياتي الا وهو اني ادش المطبخ علشان اسوي اكشن يعني المهم اني دخلت المطبخ وقلت بسوي طبق السويت اللي اسويه كل سنه برمضان وغثيت اخواني فيه لاني ماعرف اسوي غيره هذه صوره للأشياء اللي بستخدمها بالطبق : وهذا شكله بعد ماسويته : وبعدها طلعت من المطبخ ورحت الصاله قعدت اقرا قرآن شووي .. قلت بشبك اشيك على المنتدى واسولف شوي بالمسن . عندي واحد من اخواني من يمر علي ويشوفني فاتحه منتدى الهلال يقعد يتكلم سعوودي ويقعد يقلد صوت الشلهووب فقالي يالله قومي قرب يأذن طبعا بصووت الشلهووب ودخل علينا اخوي وبناته وماشاءالله عليهم الييوم فيهم طاقه مو طبيعيه كنت بصورهم بس خفت عليهم من العين وقعدت اصب شاي وقهوه لاهلي وكانت قعده عائليه ممتعه على التلفزيون وبعدين اذن العشاء وقمنا نصلي . انا رحت غرفتي وكنت افكر شنو البس لان عندي باجر عزيمه كبيره ومتوهقه شنو البس المهم خذاني الوقت وانا اجرب اقيس ثلاث ارباع ملابسي وصارت الساعه 9 وشوي.. قلت ببدي اصلي العشاء والتراويح توني واصله الركعه الرابعه من التراويح دخلت علي امي وقالتلي يالله بدلي ابيج توديني ابارك على عمامي وخالاتي بالشهر قلتلها يمه شفتي الزحمه برا !! وبعدين ماخلصت من الصلاة المهم ماقدرت اردها وقفت صلاة ووديتها تسلم عليهم طبعا انا نزلت اول بيت والباقي قعدت بالسياره انطر اكره شي بحياتي الرسميات والتسليم والتبريكات وكل حرمه نبوسها مليون بوسه يعني خلاص درينا رمضان بدا لازم نفتر على العالم كلهم ونبارك لهم خاصه ان العيد بعد شهر بس يعني يمدينا نبارك بالمناسبتين مره وحده هذه صووره صورتها للزحمه بالشارع << توهقت مالقت شي تصوره لكم بيومها وبس رجعنا البيت وانا تعبانه وقلت شكلي بسحب على اليوميات بس قلبي ماطاوعني والله قلت بكتب وبعدها اريح احس برااحه بعد ماخلصت اليووم مع انه مو عاجبني بس ان شاءالله يعجبكم اشكر المنتدى الاستشاري على مجهودهم الجبار اللي اعاد للمجلس لمعانه بعد ان فقده لفتره طويله وشكرر خاص للهنوووف لانها من تخرجت ماذاقت طعم الراحه ... فعاليه ببطن فعاليه ماشاءالله تبارك الله بس ليش مايصرفون لكم معاشات ؟ ان شاءالله عقب رمضان ترتاحين وتحسين بمعنى التخرج والبطاله اللي ليلحين ماحسيتيه اخر كلمه: اتمنى من اي شخص زعلان مني او شايل بخاطره يسامحني احنا بشهر الخير اي اساءه او كلمه ضايقت احد تأكدوا انها من غير قصد واعتبر الكل اخواني وخواتي عساكم من عواده يارب اختكم شوق الكويت كل الشكر لـلمميزة **][ " شوق الكويت " "♥][ ** وانتظرونا غداَ مع المصوّر الفوتوغرافي MaLik74 . أرق التحايا وأطيبها من مشرفي واستشاريي المجلس العام