مبارك عليكم الشهر ( رغم الزحمة ).. وشكشوكة ( طعس التحدي ) غير !!
حيـــــــــــاكم
ارحبوا يالمجلساوية 
... سلّمهم 
كل عام وانتم بخير والشهر علينا وعليكم ومبارك اخوكم الفقير لوجه الله عنده مشوار مهم.. ولازم اروح لموقع معين في مخرج 6 الدائري الشمالي
وقلت خلني استغل الفرصة واروح اخلص هالمشوار الساعة 10 بعد التراويح
على اساس ان اكثر سكان الرياض يكونون في هاللحظة خاشعة ابصارهم مقابل التلفزيون 
وكل واحد ماسك بيده كوب شاهي او كاس توت... بانتظار باب الحارة
وانا زلمه لسني احب الزحمة بتاتاً 
وبناء على جميع هذه المعطيات حددت الساعة 10 موعداً لبدء عملية الزحف باتجاه الهدف
ونقطة الانطلاق بالطبع كانت مركز عصير 50 فاكهة 
اللي توه فاتح عندنا بين الروابي والسلي وبعد ما جرعت كاس المانجا عندهم انطلقت متجهاً نحو مخرج 15 ورحت يمين ومسكت الدائري
وكانت النتيجة اني طلعت مع مخرج 14 من عند سوق الخضره ورجعت لبيتي وانا ( تافل العافية ) والسبب ؟؟
الوقت اللي استغرقته من مخرج 15 الى مخرج 14 كان بالضبط ( 20 دقيقة ) 
رغم ان الوقت الفعلي مايتجاوز ( 20 ثانية ) فقط في الايام العادية
انا ودي افهم وش سر هالزحمة في رمضان ؟؟
هالعالم اللي متكدسة في الشوارع بسياراتها وين رايحين ؟؟
وبعدين بهالتوقيت كل البشر اللي اعرفهم قاعدين ببيوتهم مقابلين باب الحارة
من وين طلعوا كل هالعالم ؟؟؟
اتركوا كل مافات
البارح انا قاعد عند اهلي احتري نسيبي ( زوج اختي ) علشان اسلم عليه
على اساس اننا متواعدين بعد التراويح نتقابل هناك
ومن الساعة 9.30 وانا احتريه.. وكل ماكلمته قال ( هذاي بطريق الملك فهد ) إلييين جت الساعة 11 وتقفل معي واقوم واخلّيه
وهو ماطلع من ( اختناق ) طريق الملك فهد الا الساعة 11.30
ياجماعة الخير وش السالفة ؟؟
مدري وش تاليتها مع هالرياض
زود على الحر القاتل... زحمة مفجعة وحط في بالك ان اغلب سكان المملكة يجون للرياض برمضان علشان يتقضّون للعيد
ويقولون مكة في رمضان فيها 5 مليون... تعالوا شوفوا الرياض فيها 50 مليون 
انا خلاص قررت و نويت اهج للطايف ومانيب جاي لين يقولون باكر العيد .
.
ماهو سر ( الشكشوكة ) في طعس خزام ؟؟
اغرب قضية مرت علي بحياتي 
والقضية الوحيدة اللي مازالت الدولة بجهازيها ( الشرطة والهيئة ) عاجزة عن حلها
من اكثر من 10 سنوات وحتى الآن
كل سنة وفي نفس الموعد ( رمضان ) وفي نفس المكان ( طعس خزام ) او طعس التحدي
الساعة 6 الصباح والمسلمين صايمين ونايمين.. والدشير يفطرون شكشوكة تحت الطعس
تجيهم الشرطة من هنا.. يروحون يزبنون في جهة ثانية 
اكثر من 200 شاب والله يفتح على قلوبهم
ماتشوف الا كل واحد ماسك الساندوتش بيد.. وعصير الربيع باليد الثانية
وطبعاً لاتسأل من وين جابوا الشكشوكة صباح رمضان.. فيه ناس يصلحونها بمخيمات ( بنغالية )
والساندوتش بـ 5 ريال والشغل ماشي حريقه
وعلى جهة ثانية من الطعس.. تلقى خمسة او ستة خاشين جو مع راس المعسل
من يصدق ان هالشيء يصير عندنا ؟؟
نضحك على اللبنانيين وخيامهم الرمضانية اللي كلها ردح وفجور
وشبابنا فالّين امها ( شكشوكة ) كل صبح وعلى عينك ياتاجر !!!
الوضع الشجري
