09/07/2010, 04:55 AM
|
| الكاتب الساخر | | تاريخ التسجيل: 19/06/2006 المكان: Najd
مشاركات: 1,022
| |
هيله !! ( حرمة رئيس النادي ) !!
اذكر مرة من المرات كان عندنا مباراة مع النادي بالرياض .. وكان مدير النادي بذيك الفترة باقي شوي ويبني له دبلوكس بصالة الطائرة من قوّ الميانة علينا .. وكان ياخذ الباص ويوقفه عند بيته تحت الشجرة .. لأنه يقول الباص مسؤولية ويخاف تنكسر قزازته والا يجيه شي ويبلشونه رعاية الشباب !!
و إذا جت أعياد والا مناسبات .. وإلا صاروا يبي يكشتون هو وعياله وأهله كان يوديـّهم عليه .. بس الحق ينقال كان يستاذن منا .. ولا كنا نقول له شي !! لأنه عصبي و زعول .. وأي واحد يعابط وإلا يناقشه يمكن يطلعه برّا التشكيله !! المهم كانت مباراتنا يوم الخميس .. وكان مواعد عياله يوديهم عشان يتقضوّن للعيد من الرياض وناسي المباراة !!
جينا للنادي وتجمعنا عند السكرتير وكل واحد معه باغه حاط فيها تكميلته وبعض العيال طاق كنادر الحبوب على الثوب ينقال لك أسرع له .. وكلنا ساكتين نخاف نقول شي ما يودونــّا للرياض !!
كان معنا واحد مخربها ويقرب له مدير الدفاع المدني وكان له هيبة شوي .. وهو تقريبا أجرأنا ولا عنده بأحد .. قد جلد مدرب التنس بعصا بلياردو لأنه متهمه إنه سارق بنق !!
المهم كنا متجمعين عند عبدو سكرتير النادي.. مادرينا إلا يوم نط خوينـّا بحلق السكرتير !! قال الحين الباص وينه ؟ و إلا تبونا نروح للرياض رجليه ؟؟ قال السكرتير : هوّ أبو منصور لسـّا ماقاش وانا من الصباح عمــّال بتصل بيه فـ بيته وما بيردش !!
قال خوينا وشلون ما يرد ؟؟ قوموا خلونا نشوف وش سالفته ووينه وإلا فاتتنا المباراة ؟؟
ركبنا ستة بالكريسدا البقس حقة السكرتير وأنا ورى بالدبــّة معي كيس كبير فيه ملابسي وفيه ثلاث جراوه شمـّام و مويه مقري فيها .. و بيقابلني ولد خالي عند محطة المنصورة اللي بمدخل الرياض وياخذهن .. والباقين لاحقينا بـ جيب واحد من العيال .. واللي ماله محل مركبينه بالصندوق !!
المهم رحنا ندّور مدير النادي و نطق عليه نشوف وش سالفة أمه ؟! يوم وصلنا وأثر لمبات الريوس حقة الباص مشتغله وحرمته مطلعه راسها مع القزازة وتقول له أرجع أرجع .. بعد بعد !! وعياله ورى يصفقون ويغنوّن " سواقنا دوس دوس " !!
نزل خوينا مسرع و واصله معه !! قال هيه يالحبيب ووووين ؟؟ خير ؟ عسى ماشر ؟؟ ما درينا إلا يوم نزل مدير النادي من الباص !! قال أنتم اللي خير ؟! قلنا أمـا خير وحنا جالسين نحتريك من الصبح الى الحين .. شكلك ما طقيت خبر للمباراة ؟!
يوم انصفق وجهه !! قال والله يا جماعة إني ناسيها !! و حسوّا عياله إننا بنزّلهم من الباص .. وقفلوا على نفسهم .. أنطلق خوينا ومعه كم واحد .. قالوا لهم أفتحوا بالطيب لا نفرش أبوكم ؟! قالوا طقوّه بس نزله ما حنا بنازلين !!
صار فيه دريشة من الدرايش اللي وراء مفتوحة شوي ودخلت يدي عليهم وسحبت واحد من عيالهم .. قلت شاطر رح لمك لا أسطرك على وجهك و قل لها أفتحي لنا عندنا مباراة مهمة و بيوديكم أبوكم بعدين .. قال طيب فك ! قلت شف أنا ابفك بس ان طلعت نصاب يالسرو .. والله إني لا أحتريك عند باب الباص الين تفتحون ثمين أدخل عليك و أدّس فناخرك بطفاية الحريق اللي وراك الين تنغمت يا وصخ .. يالله رح لها الحين !!
يوم فكيته .. رفسوّا يديني أخوانه ترفيس الله لا يوفقهم .. وأذكر دخل شي حامض بعيني بس ما أدري وشو !!
رحت للعيال ابشوف وش سوّوا مع أبو منصور .. قال أنا بالنسبة لي عادي بس ذي و عيالها حالفين ما ينزلون !! لا حوووول ولا قووووة إلا بالله !! قال عبدو طيب فيه حل دام المباراة بالرياض .. وأنتا عاوز تنزل بيهم للرياض إزن إيه المانع نروح كلنـــا !! قال أبو منصور ما فيه الا هالحل وش رايكم ؟ قلنا الشكوى لله .. المباراة لاعبينها لاعبينها <<-- اللي يشوفنا يقول بيقابلون شيميزو الياباني !!
جبنا جلال صلاة نفس حملات الحج .. وفصلنا المراتب اللي وراء عن اللي قدام .. وخليناه هو وحرمته وعياله قدام .. و تكينا وراء !! كل هذا عادي وأبلعه لكن ما قهرني إلا بزارينه إذا قاموا يطلطون علينا من وراء الجلال الفاصل وخذ يا ذب وتنتيف ويقولون : أحلقوا شنبي إن تأهلتوا دام معكم دونقا !! ويأشرون علي !! وأنا كاتم غيضي و البزر اللي رفس يدي يناظرني وميّت ضحك ويقول لي : تراك ما مسحتها زين باقي شوي !! بس ما أدري وش كان يقصد <<- إيه هين !!
الصراحة ما قدرت أمسك نفسي !! وأنا أزعق لأمهم .. قلت هيه أنتي أمسكي عيالتس وإلا والله الله لا أدخل عليهم وأشوتـّهم وأرجمــّهم مع الدرايش !! قالت أمهم : أص يا حلوين خلاص بابا تعبان !!
وكل ما مشينا 10 كيلو .. وقفنا !! وكل ما شافوا محطة قالت أمهم وقفّ اشتر للعيال تراهم ماتغدوا !! وحنا ساحبين علينا .. والله إني مع الجوع باغي أفشل جروة من اللي معي وناكلها وراء !!
وصلنا الحمد لله للرياض .. ومرينا بحرمته وعياله على حلة القصمان عشان ياخذون أغراضهم .. و حنا كملنا للملعب !!
- ما يستفاد من الموضوع :
1- بعض المسؤولين مستغل منصبه لتسهيل أموره الشخصية على حساب المؤسسة اللي يرأسها !!
2- بعض رؤساء الأندية ماله أي رأي .. ويدار بالكنترول من قبل الأشخاص اللي حوله !!
3- أندية المناطق والدرجات الريفية والمتأخرة .. تحتاج وقفة صاادقة من قبل الرئاسة !!
4- لا أحد يحارش (بزارين) لأنه الخسران بكل الأحوال !! |
الوضع العادي
