[lawyer_9]

كوارث شبابيه .. كانت في الدائـري الشمالي !! ..

كـأي شخص طبيعي كـنت احد الشباب اللي راجع للبيت اليوم الساعه 3 الفجر ، وللاسف اتفاجئ بموكـب كبير وتجمهور اعداد كبيره من الشباب وسيارات في تصوري قرابة 500 سياره والسبب تفحيط !! ..

المصيبة ان هـالكارثه وهالتـجمع في الدائري الشمالي ! .. وسـيارات تعكس الخط بشكل خيالي وبسرعه جنونيه ، واللي يحاول يصدم الشبك الفاصل بين الخدمة والطريق الرئـيسي ! .. ومجموعـه تركض في الحواري هروباً من الشرطه ! ..

كارثه بحـق ، وللاسف انهم اعدد كبيره ! .. منظر غريب ، جموع من الشباب ، في تصوري اغلـبيتهم من الطبقة الضائـعه ، اخر الحلول .. اغلاق الدائـري ، وعمل نقطة تفـتيش من هنـا بدا الـشبـاب في الاختراعات ، اللي يحاول يصدم الشبك بسيارته ، واللي يعكس الدائـري .. والشرطه وراهم ..

للاسف انتظرنا قرابة الساعه ، وكل واحد على اعصـابه لا احد يصدمك ، او يركبـونك الشرطه وانت مالك ذنب ! .. واللي بكل برود يفحط قدامك .. والحل الانتظار ! ..

ولكن احقاقاً للحق ، كان هناك تواجد كثيف من المرور ،ولكن قابـله موكب واعداد من السيارات كانت في تصوري فوق المتوقع .. ! اللي ودي اعرفه على هالموكب وش بيسوي سـاهر معهم ، احس علق النظام !! ..

بس مدري وين تفكير هالشـباب عن حالـنا اللحين 2010 ، كيف الشخص زي هذا يفكر بكره يتخرج من الجامعه ويدرس ماجستير ويرجع ويتوظف وظيفة محترمه ! ..

وكيف زي هذا الشباب ، بكره بيتزوج وبيكون عنده عيال !! .. ومدري وين اهلـه عنه ! ،، زي هالاشكـال المفروض في البيت وما يطلع ولا شبر ! .. شـبابـنا .. كيف الحال وبس ! ..



على طاري سـاهر ،،،

محدثكم كان احد ضحايـا بلاك بيري ! .. للاسف البلاك بيري مشكله ، ولازم نلقى له حل ، يا يمنعونه والا يحطون غرامه ويشغلون ساهر عليه ..

لان بكل بساطه تغفل وتقرا وترد والا انت صادم ! .. هذا اللي صار يوم امس للاسف ! ..
والحمدلله على كل حال ، واشـوا ان الرجال اللي صدمته ما جاه شي ..


دمـتم بخير ،،

تحياتي ..