[هدف تسلل]

يقولك ياطويل العمر ........

فيه اثنين اصدقاء ...

واحد اسمه ( لالي ) .. والثاني اسمه ( راوي) ..

سبحان الي خلق وفرق بينهم ..

لكن ربك بقدرته وحكمته خلاهم اثنين ملازمين بعض من سنين ماينفكون عن بعض مهما كانت الظروف ..

المشكلة (راوي) دايم يغاااااار من (لالي) ومنقهرررر منه قهرررر لايوصف..

(راوي) كل ماشاف (لالي) لابس شي زين أو شاف معه شي زين امتر (راوي)

وضاق صدره وطقته الغلقه .. شوي الا يذبح (لالي)..

بدا (راوي) من الغيره يحقد على (لالي) ويكرهه أعوذ بالله كره العمى ..

كان يقول في نفسه هين يا (لالي) اما نكدت عليك ونغصت عليك عيشتك ما كون (راوي) ..

بدى اخونا (راوي) الله يهديه من الحسد الي في قلبه يشتغل للالي ويدبر له المكايد

و يختلق له المشاكل حتى شكك أهل (لالي) في ولدهم الله لايبلانا ..

أهل لالي عارفين ولدهم زين انه مؤدب لايسرق ولايكذب ومتربي تربية صح ..

لكن بدى يدخلهم الشك من كلام راوي وتأثيره عليهم ..

(لالي) بدى يحس بتغير اهله عليه لدرجة انهم صاروا يعاقبونه ويحرمونه وهو صابر ومحتسب

كل الي يقوله لاحول ولاقوة الا بالله .. انا لله وانا اليه راجعون ..

مرت الايام قام (لالي) فتح له مؤسسة يسترزق منها ..

وقام (راوي) فتح له مثلها في الشارع المقابل له ..

(لالي) ماشاء الله تبارك الله صار عنده زباين وعملاء اكثر من (راوي) لدرجة صار مجموع دخل

(لالي) من الخيرات والارزاق وصل50 مليون ريال .. ماشاء الله تبارك الله ..

أكثر من راوي الي حصل بس 20 مليون ..

انتوا عارفين طبعاً ان راوي بحكم حسده وغيرته من صديقه (لالي) ماراح يسكت ..

اخونا (راوي) جن جنونه خصوصا بعد ماشاف الفرق الكبير والشاسع الي بينهم ..

وشاف الناس كلها طايحه مدح في لالي وفي مكاسبه وفي سمعته الطيبة ..

وهو مهمشينه.. !!

تدرون وش سوى (راوي) .. ؟

قال طيب طيب ..!! أوريك ( يالالي ) اما نكدت ونغصت عليك هالخمسين الي جمعتها

ونغصت عليك عيشتك كلها ماكون (راوي ) ؟

ويقوم (راوي) وربعه يشتغلون ل (لالي) في وزارة التجارة والبلديه وفي كل مكان

ويشككون في بضاعته وانها مغشوشه والفلوس الي جمعها كلها غش في غش..!!

ومن هالكلام .. !!

بعض اصحاب القلوب الضعيفة والي من شلة راوي انطلت عليهم الكذبه وصدقوا ..

وللأسف مشوا مع (راوي) وهم في غيهم يعمهون ..

واصحاب العقول السليمة الي عارفين نزاهة (لالي) وصدقه وحسن نيته قالوا ..

قاتل الله الحسد المعمي للبصر والبصيرة ..!!

ومانقول الا :

الله يعينك يالالي على هالبلوى الي بلاك الله بهم ..

اصبر عليه يالالي وخذه على قد عقله ..

جارك وربعه ماراح يتركونك في حالك ..اصبر عليهم وعلى بلاويهم ومثل مايقولون

(الحقران يقطع المصران ) ....

اذا كانوا ماهم راضين بالي قسم لك ربك واعطاك من فضله وش بيدك تسوي ..؟؟

الله يزيدك يالالي ويبارك لك ويفكك من راوي وربعه ..

رح الحين واستعد يالطيب وخل عنك هلوستهم وحكيهم الفاضي ..

قدامك صفقتين دسمة تنتظرك وتحتاج مخممخة .

وان شاء الله تكون كلها من نصيبك

وتحصل 52 مليووووووون ..

وكلنا معك دعاء ان الله يوفقك ويزيدك من فضله ..

-----------

طبعا عرفتوا مضمون الحتوته ومصطلحاتها..

راوي المقصود به (نصراوي ) ...

ولالي المقصود به (هلالي ) ...

هي حتوته تصور حال الزعيم وحال الفريق النصراوي

من خلال الانجازات والاحداث التي نشاهدها على الساحة ..

--------------

دمتم بود ..