اتركوا الشاشات للسيدات...(عليكم بالمدرجااااااات).. تعالوا شوفوا وش سوا فيني الهلال!!!!
السلام عليكم..
(صباح/ مساء) الخير لكل الزعماء الغالييين والزعيمات الغاليااات...
اول شي معليش اخواتي الزعيمات بس ممكن تتكون على جنب شوي؟؟
ههههههه (يمزح) ولا زعيمة تعصب علي
بس احب اخص الزعماء الذكور بهالموضوع
رسالة لجمهور الهلال العريييض..
رساله لكل هلالي عاشق للهلال...
لن احدد الي فالرياض فقط
دعوة لكل من له الاقدرة على الحضور والمساهمة في زف العريس الهلالي لنهائي كاس الملك..
حتى لو كنت فالصين وعندك القدرة عالحضور فلا تبخل على حبيبنا الهلال..
انا بصراحه ازعل كثيييييير من بعض مشجعي الهلال الي يتابعون المباراة في خلف الشاشات حتى لو كانت ضد فريق الجبلين
عاد كيف بمباراة ديربي؟؟؟ ونص نهائي؟؟؟ اوووووه والله قوية
انا عندي بعض الاخوياء هلاليين لاكنهم ما يحضرون للملعب وبصراحه اعذارهم بااايخه..
ممكن يكون التلفزيون امتع بالنسبة لهم بخصوص الراحه والاعادات البطيئة وغيره من الاعذار الي اشوف انها ما تساوي حب الزعيم...
صدقوني الي يحب الهلال راح يحضر ويضحي بهالراحه لعيون
ابو مساعد وعيون
اللاعبين و
جيريتس..
انا ولله الحمد المباريات الحاسمة الي حضرتها كلها فزنا فيها
جمييييييع مباراياتنا الي حضرتها مع النصر فزنا فيها والمبارايات الي فاز فيها النصر كنت غايب عنها باعذار صعبة والله...(
طبعا مو عشاني غبت انهزمنا اكيد هذا قدر)
مبارات ولي العهد حضرت وفزنا وصارلي في هذيك المبارات حاجه ما انساها...
بعد هدف ويلي قمت من الفرحة وحسيت بدوخه وطحت مغمى علي..
كنت ما اقدر اتحرك ولا اتكلم,,,
بس كنت اسمع صياح الجمهور الهلالي يهز الملعب...
كنت اتمنى اقدر اقوم واشاركهم لكني عجزت..
شاركتهم بدموعي...
والله بكييت من الفرحه....وقسم بالله شعووور خيااااالي ما يحس فيه الا الي يحب الهلال من قلب...
رفضت اطلع المستشفى الا لين تنتهي المباراة...
انتهت المباراة وبدا الجمهور يطلع وانا باقي منسدح على الصبة في المدرج ومعي خويي ..كنت صاحي بس ما كنت اقدر اوقف على رجولي لان السكر عندي (طاااااح تحت) لاني كنت صايم هذاك اليوم
جابلي خويي ببسي وفطيرة مدري وش اسمها الي يبيعونها فالملعب..
بعد فترة المدرج تحول الى شبه فاضي كان منظر بااايخ بصراحه..
طلعنا برا وراح خويي يقرب السيارة وبديت اصحصح ويوم رجعت البيت حسيت بالم في راسي ورحت المستشفى طواري ودخلت عالدكتور وقلتله السالفة,,
قالي ان هذا شي طبيعي خاصه اذا تحول الشعور من زعل الى فرحه مفاجئة ونصحني ماعاد احضر...
هههههه
والله انك تسمع بها يادكتور وقلتله يادكتور اذا بيغمى علي فرحاا للزعيم فمرحبا الف بالاغماء من الفرحه..وقلت له انت ما تحب الهلال ولا كان اغمى عليك زيي
(هذي قوية شوي)...
الموقف الثاني كان قريب في مباراة الهلال والسد الاياب راحت علي نومه ذاك اليوم وقمت متأخر وشغلت السيارة وعالدائري(حتى غسلت وجهي فالسيارة من العجلة) وكانوا اخوياي ينتظروني فالملعب ومستغربين تاخري..
المهم وصلت عند الاستاد وباقي ربع ساعة عالمباراة شوي ويدق علي ولحد من اخوياي هلالي
قالي: وينك؟ بعدين قطعني وقال: لا ترد اكيد فالملعب.. قلتله: انت وينك؟
قال: فالبيت قلت: ليش ما تحضر
قال: ماعندي سيارة!! قلت: يالله انا جاي اخذك
ديورت من عند الملعب ورحت ابي اجيبة وبيته ما هو بعيد من الملعب ...المهم وانا ماسك طريق جابر ومقلع ابي اوصل بسرعه دخلت طريق الملك
عبودي وحطيت رجلي عالصاجه.. حسيت الموتر يقول يرحم اممممك بشويش..
شوي يسقط علي راعي هايلوكس وانا الي اسير على ظهر موتره...
وياليل ابو لمبه..الحمد لله سلمت لكن موتري وموتر الرجال انعدمت..
جونا نجم وغلطوني
100 بالمية لان ما عندي رخصه
قالولي وين التامين؟
قلت ما عندي..قالوا طيب بتدفع للرجال وتتصالحون...
فزعولي الشباب وجمعنا 5000 ريال لكن الرجال عيا
يقول ابي
15000 لان سيارته وكاله 2010 وبصراح هشمت ظهرها..
طلبته يرحم امك خفض المبلغ شوي
لكن الرجال عيا (شكله نصراوي)
قال حق نجم ما فيه الا التوقيف؟؟؟
المهم ما اطول عليكم لكن راحت علي ذيك المباراة,,وجعلكم ما تدخلون توقيف مرور الشمال...
خلاصة القول...
انا يوم الاحد ان شاء الله حاضر مع اني طالب فكلية الطب وقسم بالله عندي اختبار يوم الاثنين جاااامد لكني شديت حيلي في هالويكند وحبست نفسي عشان يكون عندي مجال احضر....
طلبتكم يا زعمااء خلوها فل..
حلات الاستاد ممتلىء بجمهور الزعيم..
تكفوووووون نبي نفلل كل المقاعد الهلالية زي مباراة الذهاب واكثر بعد...
اخر شي اختم برسالة موجهة للزعيمات..
خلاص يا زعماء تكوا على جنب انتهى ووقتكم..جاء وقت الزعيمات
ههههههه (يمزح) ولا زعيم يعصب علي
لا تحرمونا من دعواتكن يا زعيمات من خلف الشاشات وهذا الي نبيه منكن ولا تبخلون على الهلال
ختاما.... شكراا لكم..
ويا حلوكم من مشرفين واعضاء
والله لايغير علينا في هالمنتدى.........
محبكم...
احبك..ياهلال..
الوضع العادي
