بسم الله الرحمن الرحيم
نواف الهلالي يعود لكم من جديد 
رادوي فالميدان كم كبد تبردها .:. وكم كبد تطحنها بوافي عزومك
ما كنك إلا فارس القوم سيدها .:. والجن الأزرق خلفك اليوم قومك
يردد الجمهور يا ذيبها قدهـا .:. سدد على صفر النوايا سهومك
لا رددوا رادوي والناس تشهدها .:. الله يلوم اللي بعدْها يلومك
وسلامتكم 
أول شيء اسمحوا لي الموضوع اليوم ( مهايطي ) شوي لكن وش نسوي كله تضامنا مع رادوي طبعا مباراة تحصيل حاصل لا أقل ولا أكثر ولا تعني شيء سوى إن التكرن إلى تكرنو تكرنو ؟؟!!!
أما بالنسبة للخبر اللي شفناه اليوم اللي هو احتمالية إيقاف رادوي من لجنة الانضباط
فهذا يحتاج ( وقفة ) من إدارة النادي لأن عذرهم يوم يوقفونه المره الأولى إن الحكم ما عاقبه
واللجنة تعاقب من لم يعاقبه الحكم ..!! يعني الموضوع ينطبق على نور والرهيب ..!!
لكن ما ندري وش العذر الجديد اللي بيطلعونه عشان يوقفون رادوي ..! عشان كذا أتمنى الإدارة
ما تسكت لأن حنا نبي نصير بالشكل هذا حقل تجارب عقوبات ..!!
وقرار لجنة الانضباط اللي المفروض يصير : هو توجيه رسالة شكر وعرفان لرادوي على اللي سواه
لقيامه بحماية لاعبي المنتخب السعودي من الإرهاب الأصفر والحكم الديكور المنتقى بعناية ..!!!
طبعا أحلى شيء في المباراة اللقطة هذي :
قسم بالله ياهي لقطة تبرد الكبد !! شنب والله يا رادوي قسم بالله شنب !!
يا ناس الولد هذا عنده حميّه غير شكل !! يا ولد بديت أشك إن ما كان هالولد جده عربي
إن خواله عرب !! ولا هب أي عرب إلا عرب من اللي عليهم الكلام 
يا شباب المسألة مهب هوشه ولا مدة يد المسألة صارت كرامه ورجلين تبي تكسر !!
يعني لو الدعوى بس هواش حنا كلنا ضد الهواش لكن هذي تختلف والكلام موجه للي يقول
حنا ضد اللي سواه رادوي .. بالعكس حنا مع اللي سواه رادوي ويا ليت كل اللاعبين سوو مثله
تدرون ليش ..!
لأن نظام الاتحاد على مر السنين ومثل ما صرح مدني رحيمي قبل فتره .. نظامهم إذا فاتتك الكوره
لا تفوتك رجل اللاعب ..!! وزود على هذا يتعمدون إصابة رجل معينه عدة مرات مثل ما سوو مع نواف
ومثل ما ذكر مدني الشيء هذا 
عشان كذا هم يجون من الشوط الأول يسوون اختبار للحكم بانبراشه سريعه على أحد اللاعبين ويشوفون
قرار الحكم إذا هو قوي ولا متساهل ..!!
فإذا صار قوي مثل اللي حكم لنا معهم بالرياض استسلموا للأمر الواقع وانهزموا شر هزيمة !! وإذا شافوا
حكم ضعيف مثل الحكم هذا فـ يا ويل الفريق المنافس ويا سواد ليله ..!!!
وهم سوو اختبار بـ ويلي وطلعوه مصاب وانبرشوا كم انبراشه وشافوا الحكم حبيب ويالله خذ تكسير وتكرنه !!
عشان كذا لعيبة الهلال ما لهم إلا حلّين لا ثالث لهما :
يا أما يرضون بالأمر الواقع ( ويسلّمون مفاصلهم ) للاتحاديه يضربونهم كيف شاؤوا !! وهم يشوفون الحكم لا يحرك
ساكن ويصيرون بالشكل هذا لا عندهم خوف على أنفسهم ولا عندهم حتى كرامه ..!!
وإلا يجي واحد شنب مثل رادوي ويوقفهم عند حدهم لأنه يشوف زملاؤه يضربون والحكم يتفرج - وكلكم شفتوا رادوي
ما طلعت شياطينه إلا يوم شاف الحكم عطى ياسر كرت وترك نور والرهيب - فـ بالشكل هذا ما فيه غير هالحل
للحفاظ على سلامة اللاعبين ولحفظ كرامة اللاعبين (
وأنت أبو الكرامه وأمها يا رادوي 
)
والموضوع ماهو لقطة وحده وبس الموضوع إذا شافوا التكرن هذولاء إنه فيه لاعب مثل رادوي أمامهم بيحسبون
حساب إنهم إذا كسروا أو مدوا يديهم إن فيه أحد يبي ياقف لهم لو ما تكلم الحكم ..!!
عشان كذا اللي صار هذا كان واجب إنه يصير من الشوط الأول
وأكثر شيء تمنيته أمس اللاعب هذا لو كان موجود :
تتوقعون لو كان موجود فيه أحد منهم يبي يهايط 
تذكرون بعد ما هزمناهم ذيك السنة وجاء أبو جمعان يأشر لهم يقول اطلعوا برا الملعب ولا أحد تلكم كلمه 
باختصار ما سوى كذا رادوي إلا لأنه ( كابتن ) بحق وحقيق .. ونترك عننا المثالية الزايدة
اللي ما تنفع أحد هاليومين غير كذا بالنسبة للمباراة أتوقع من أسباب الخسارة التغيير اللي سواه قريتس بإشراك العنبر !!!
يعني لاعب أنت عارف إنه راجع من إصابة ولاهو هاك اللي لاعب وتروح تلعبه ليش !
الثقة الزايدة = غرور !! لكن مثل ما قلنا خسارة النصر جابت لنا البطولة نقول إن شاء الله
هالخسارة تجيب لنا آسيا ..!!
غير كذا لو أشرك أي لاعب غير العنبر تمشي لكن العنبر هذا دائما أول ما يشوفونه لعيبة الاتحاد يتركون
الدفاع ويهاجمون كلهم يعني ما كأنه في أحد ورى !!
وبعدين يا قريتس كنا حبايب من أول الموسم واللاعبين من بعد عودة عزيز كلهم راضي عنهم الجمهور تروح
إلا وتجيب العنبر من الأرشيف بالوقت هذا اللي ما هو وقت مجاملات والجمهور يطالب بآسيا واللاعب هذا ماهو
في مستوى الدوري عشان يلعب في آسيا ..!
عشان كذا أعتقد إنها مطالبة جماهيرية باستبدال العنبر في فترة التسجيل بلاعب معروف يفيدنا
بالآسيوية ولو بنظام الإعارة ..!!
والله يوفق الزعيم على الدوم .. ولكم مني أرق التحايا ،،،
قرار لجنة الانضباط + صورة لأحلى ما في المباراة ..!! 
الوضع الشجري
