[امير الزعيم--20]

السلام عليكم ..

اول شي الف الف مبروووك الدوري والبطوله الـ 49 وعقبال البطولات الجايه .. والله يديم علينا هالأفراح

اليوم الكل شاف التتويج كان رائع .. وبعده ادارة الهلال قررت تفتح مقر النادي للجماهير والاحتفال مع اللاعبين باللقب .. وياليتها ما فتحته ..

بداية الاحتفال كان ماشي صح وكل شي كان أوكي .. لكن اللي صار بعده للأسف شي يفشل ..

جمهور همجي ينزل للملعب ويسبب فوضى كبيره فيه ..!!
ناس شالت الاعمده اللي مغروسه على اطراف الملعب اللي فيها شعار موبايلي والهلال وقام يركض فيها ! واللي قعدوا يلعبون حبشه ويتلاحقون "كانوا أطفال" ! واللي كانوا مندفعين على اللاعبين وقت دخولهم للملعب وينططون عليهم ! وفيه انباء عن هوشه صارت برا الملعب بين الجماهير وشراحيلي وتدخل سامي بحلها !

عارفين انكم فرحانين ومبسوطين .. بس مو بهالشكل نطلع فرحتنا ..

جمهورنا سبحان الله ما يعرف يحتفل .. ما تعرفون تلتزمون وتقعدون بأماكنكم ؟ ما قلنا لا تتحركون بس خلكم راقين بإحتفالاتكم ..

يعني انا مادري تحسون كذا انكم فرحانين بالكاس يوم انكم طبيتوا الملعب وحستوا الإحتفال ؟؟

تذكرون الاصابه اللي جت الدعيع في أحد السنوات بسبب همجية مشجع كان مندفع عليه !! تراكم اقسم بالله تضرون اللاعبين بهالشكل ..

ما راح استغرب لو حصلنا على بطوله ثانيه ان الاداره تخلي الحفل مقتصر على اللاعبين والإعلاميين بسبب هالنوعيه من الجماهير ..

اتمنى تتقبلون كلامي لأني من جد انقهرت على اللي صار واللي شوه الاحتفال من وجهة نظري ..

الشي الثاني للأسف توقعت تغطية الخشبيه تكون حلوه .. وكنت متعشم فيها انها تطلع لنا بلقطات ومقابلات وتغطيه مميزه ..

بس اللي شفناه كان شغل أي كلام .. الكاميرا طول الوقت على الجماهير اللي نازله الملعب .. اللاعبين كلهم دخلوا جوا المعسكر ومع ذلك الكاميرا ما زالت على الجماهير اللي طابه الملعب !

كان مفترض انهم يدخلون المعسكر يورونا اللاعبين وهم يتعشون يورونا الأجواء بين اللاعبين ..

وبعدين فجأه جابوا لقطات اهداف من الموسم الماضي خخخخ ! واسئلة المراسلين لا تعليق عليها .. اسئله سخيفه وبدائيه وتعليقات بايخه ..

نشوفكم على خير وادعولنا بإختباراتنا