[طلال عبد العزيز]

هارد لك لكل الزعماء هذه الخسارة التي أتمناها تكون ( رب ضارةٍ نافعة )

تابعت اللقاء أمس بعد الصلاة العصر مباشرة عند الدقيقه 17 وكنت أقول مازحاً 1/0 للنصر

فتحت التلفزيون وتفاجأت أن النتيجه صحيحه

وأنا أتابع مجريات اللقاء لاحظت 3 أشياء

تدارك المدرب واحدة ونسي أو تناسى اثنتين

*** النقطه الأولى

صح أنت المدرب ونعرف أنك صارم واللي ما يحرق نفسه لأجل الزعيم فلن يجد له مكان أساسي والدليل عزيز

لكن تجي في مباراة مصيرية وديربي مهم وللتاريخ وأنت المتصدر وتلعب خيرات بدل المرشدي ( صعبه )

لأن التفاهم مهم جداً ( طبعاً يمكن أحد يقول أفرض المرشدي مطرود ) بقول هنا غير لأنه مو موجود على دكة

البدلاء ولأن اللي موجودين في الملعب يخشون من الوقوع في الأخطاء وهذا السبب في الانفرادات والأهداف اللي

صارت ولأن اللاعب المتواجد في الملعب بيخاف من ردة فعل المدرب في حالة الوقوع في الخطأ .

**** النقطة الثانية

مستحيل نادي كبير وزعيم آسيا أنه يشتري لاعب أو يسجل لاعب في درجة الناشئين أو الشباب في أي مركز من

مراكز اللعب إلا إذا كان لاعب من طراز نادر

سؤالي ليش يتم تنسيق اللاعبين وفي خانات مهمه يعني

الزوري لا يوجد لديه بديل في الملعب وفي الاحتياط وفي أي مكان في نادي الهلال وهذا السبب في الثقة المفرطه

الموجودة عند اللاعب إذا في مستواي أو في غير مستواي راح ألعب وبس

في بداية الموسم تم عمل مخالصة مالية مع اللاعب عبد العزيز الخثران وهو اللاعب الأول لدى كوزمين وله نزعه

هجومية جبارة ولاعب مهاري من طراز عالي ( وين راح ) للوحده

سمعنا الأيام الماضية سيتم تنسيق مجموعه من اللاعبين وفي مقدمة الأسماء سعد الذياب ( والمعروف ) أن سعد

يحتاج إلى فرصة ( لا أحد يجي من النادي أو من خارج النادي) يقول مطلوب عدد معين من اللاعبين نظاماً من

الاتحاد السعودي

يا أخي ردي راح يكون إعارة فقط واستفد من اللاعب مادياً و بس

لو كل سنه راح أعير 10 لاعبين بـ ( 500 ألف للنادي ) راح يكون عندي 5 مليون سنوياً من الإعارات

( صدقوني ) كل الأندية وحتى الكبيرة منها تراقب و تبحث عن لاعبي الهلال

في لاعب اسمه بندر العنزي ( صفقه بمليون ريال ) أين هذا اللاعب ؟

وإذا كان النادي يشتري ( عطوني مليون وشوفوا وش أسوي في الملعب ) أقصد مفروض اللاعب دامه وقع بمبلغ

يرضيه ليش ما يحرث الملعب طول التسعين دقيقه

يا أخي في جمهور يدفع فلوس يجي يتفرج وفي جمهور يحرق دمه من أجل الزعيم وفي الأخير برود ورفعة ضغط

طبعاً هذا مو زعل من هزيمة النصر لأن من حصل الشيء يستاهله ولكن هذا من ملاحظات على بعض اللاعبين اللي

ضمنوها أساسيين ( ما نبغى كامل المر ولا كامل الحلو ) نبي درس للإدارة بعدم الأستتغناء عن أي لاعب

يا أخي أنت ما سجلت عشان تنسق ( نبي تنافس بين ) الزوري .. الذياب .. شافي الدوسري ) والأفضل يلعب

**** النقطه الثالثة

هذي المباراة من الصبح نقول مباراة الفريدي والنصر ناقص يا أخي ليش أحسسه بأنه أقوى مني وألعب بمحورين

والدقيقه 30 أطلع الغنام وأدخل الفريدي ليش أخسر تغيير من لاشيء ( هذي النقطه اللي تداركها جيرتس )

ليش ما بدية المباراة بضغط هجومي وحققت اللي تطمح له ونطمح له احنا كجمهور وبعدين أغير وأنزل الغنام .

سؤال مهم

إلى متى يعاقب المحور الأول في السعودية والتي كان أجدر أمس باللعب من الغنام ( خالد عزيز ) ؟

أتمنى من جيرتس يجاوب عليه ( دامك تبي اللاعب ينضبط ) أبشرك تراه أنضبط طيب ليش ما يلعب ؟

نحن نحترمك يا جيرتس ولا نتدخل بعملك ولكن نعاتب معاتبة الجمهور الذي يحترق لأجل فريقه

إلى لقاء جديد فيه يعيد الزعيم البسمة للشفاة بعد أن سرقت يوم الخميس ...

أتمنى أن يفعلها الأهلي ويبقي الفارق كما هو بين الزعيم والشباب ( 5 ) نقاط

وللجميع تحياتي