[The..One]

السلام عليكم ورحمة الله وبركاته



اول شي هارد لك للزعيم وعاشقي الزعيم الخسارة من نادي النصر

ثاني شي وهو الكلام اللي ابي اقول ...
استغرب من الأعضاء اللي انتقدوا وبشدة بعد المباراة
وطاحوا سب في اللاعب هذا وذاك

الان الزعيم المتصدر وكل المباريات اللي لعبها ما خسر ... مانقول الا ماشاء الله وفالنا الدوري ان شاء الله
ومن اول خساره يطلع لنا بعض المواضيع اللي مالها داعي

واحد يقول اللاعب هذا والثاني يقول المدرب والثالث يقول الرئيس
طيب ما فكرت قبل تكتب كلمة وحده... ان الفريق ماشي بالطريق السليم ؟

يعني هل المباراة هذي خسرتنا الدوري ؟

يا عالم هذي مباراة واحدة فقط ... يعني ثلاث نقاط
مو نهائي او خروج مغلوب ..

اللاعبين مو كل يوم بيكون يومهم ...
فرحونا 12 مباراة و قهرونا مباراة فقط
اللاعبين مانختلف انهم قصروا بأدائهم بنسب متفاوته
لكن مايعني هذا انتقادهم وبشدة

طبعا اللي حصل كله من التخدير
سواء بالصحف .. او التوقعات .. او بالشبكة

تعبنا نقول (ياحبيبي لا تجي تكتب موضوع وتقول نبيها تاريخيه او تقول الفوز مضمون او تستهتر بالخصم )
يعني اللي حصل 90% منه بسبب الاستهانة بالخصم
واللي ازعجونا سابقا بالتاريخيه و بالثقة الزائدة هم من يتحمل جزء من التخدير

والمفروض نعرف ان شبكتنا هي الواجهة لنا يعني اللاعب بياخذ انطباع الجمهور الهلالي من هنا
وبيقرا الكلام الفاضي من بعض الاعضاء و ماراح يجد بلعبه ..
والشيء الثاني المدرب ماقصر .. من مباراة واحدة البعض بيحكم عليه بالفشل وهو اللي بكل المباريات نشكره ؟
تقلب ماله مثيل عندنا بالآراء

يكفي انه عامل انضباط بالفريق ماله مثيل بالأندية السعودية كلها
وطريقة لعبه امتعتنا
وكلنا نعرف انه هو مايتقبل الهزيمة ابد حتى لو ما كان عاشق مثلنا للهلال
مدربنا نلاحظه انه يتحمس مع الفريق وانه هو بنفسه مايرضى لنفسه الخسارة
صحيح لنا عتب في بعض النقاط (مثل سالفة عزيز ) لكن يبقى انه ماشي بالفريق صح
ويكفيك انه من افضل المدربين الاوروبيين ... ومطلوب لكثير من الأندية والمنتخبات


والحاجه الأخيره ... الرئيس وما أدراك ما الرئيس

ابوفيصل عسى ربي يحفظه ...

كما يقول ونحن نرى بدون قول .. انه يضحي بماله وصحته واهتمامه وعلى حساب جوانب كثيرة من أجل الزعيم وعشاق الزعيم
أغلب المباريات حاضرها مع الفريق .. مع انه ليس مطالب بالحضور
يكفي وجود الجهاز الفني ومدير الكرة مع الفريق بالملعب
ولكن يحضر من أجل دعم اللاعبين و التفاعل مع الجمهور
لا تتوقعوا انه غايب سياحه او شي من هذا
اكيد ماغاب عن الفريق بمباراة مهمه وبفتره حرجه الا لشيء مهم بالنسبة له

وغير هذا المفروض اللاعب يلعب بكل حماس وقتالية حتى يرضي نفسه قبل ان يرضي الرئيس والجماهير

في النهاية :

صبركم يا عشاق الزعيم فما للزعيم من مثيل

وان شاء الله المباراة هذي ما تؤثر على نفسياتنا وماتؤثر على لاعبينا وماتؤثر على همتنا بالفوز بجميع المباريات المتبقية

والمطلوب هو الدعم أولا وأخيرا

حتى وان خسرنا مباراة فلا زلنا نتصدر الدوري

ونترك غيرنا يفرح ببطولته بالفوز على نادي القرن الزعيم

دمتم بخير ودمتم عاشقين

والله يوفقك الهلال بكل يوم وبكل أرض