[ندور..لكن الدم أزرق]

السلام عليكم .
مساء / صباح الخير لكل الزعماء العظماء المتواجدين بالمنتدى ..
جمهور عظيم لايشق له غبار .. جمهور الوفاء .. جمهور دائماً مايقف خلف الانجازات ..
دائما مااتعجب من هلالنا الكبير : كبير بانجازاته .. كبير بجماهيره .. كبير برجاله .. كبير بنجومه ..
أكاد اجزم ان الهلال ليس في مستوى الدوري السعودي اطلاقاً ..
فكر عالي جداً في كل شي ..! حتى في طريقة التشجيع .. قلما تجد فرق سعودية تبتكر في التشجيع مثلاً .. لانها بالاصل منشغلة بفريقها . اما الهلال يسير كمنضومات كل منضومة لها اعمالها وتأديها على اكمل وجه ..
باختصار الهلا كبير .. (والكبير الله) ..

من هذا المنطلق اطالعكم انا اليوم بموضوع جل مافيه أنه وجهت نظر تمثل مشجع يغار على فريقه ويحترق عندما يتعرض فريقه للهزيمة ..

من وين أبدأ بس .. (راحت اللغة !! بس والله من القهر)
فريق مفكك .. منهزم نفسيا .. تكبر على الكرة .. تركيز مافيه .. محترفين يفتقدون اساسيات التمرير والتمركز ومشاهدة الملعب ..
رادوي اوكي كويس وحماسي الولد لكن متنرفز طول المباراة وهو سبب الفاول اللي جا منه الهدف وانواع التكسير واللعب الخشن زين مااخذ كرت احمر .. (بحل ياعزيز)
الدفاع ضايع مع احترامي للجميع (الحارثي يسحب والله ماصارت)
الوسط مبعثرين يالله يالله تعطيه الكورة بمكالمة ..
الهجوم لاتعليق .. والزوري صفر ..

أما المدرب فلاتعليق كبيرة ممكن انا مااعرف بالتدريب ولاافقه شي .. لكن اكاد اجزم انه (خبط وبقوة بمباراة اليوم)

لاعب واحد فقط من وجهت نضري ماقصر في المباراة .. (لي يونج)

قد يعلق على موضوعي احد الاخوان ويقول ياخي مو بيومهم وعادي لاتصير كذا بحال الخسارة .. لكن انا بقول ان المسالة مو خسارة وبس !! المساله ان لاعبين الهلال مافي قتالية ولافيه روح وكذلك تعالي على الكورة (اتساءل هل هذا من الدلع الزائد) قليل مااشاهد الهلال يلعب بحماس .. ليش ؟

ممكن اتغاضى عن مباراة اليوم لكن التاريخ ياخي قاعد يسجل .. والشباب جالس يلحق .. وبعدين متى صار الهلال ينهزم من النصر .. يعني تعادل مو مشكله .. !

ياسر القحطاني : افضل لاعب باسيا 2007 ولاعب كبير وكل المدربين يعتمدون عليه . ماقلنا شي . لكن لعب بارد واستسلام للرقابة واستعباط .. ولايلمس الكورة الانادر هذا اللي ماقالت .. وانا اعلم ان فيه جماهير عقيمه تقدم حبها للاعب واحد على حب الكيان وهذه كبيرة .. ياخي هذا الهلال اذا ماعندك شي تقدمه ممكن تطلب التبديل .. الصراحة ياسر مجامل وبقوة ..
انا كشخص اقدر ياسر واحترمه وارى انه افضل مهاجم على مستوى السعودية لكن نكون اكثر صراحة .. هاااااااااااااااااااااااااااااااابط مستواه .. والمشكله انه يتعالى ويقول كذبه وصدقت .. ياخي شف الحارثي وشلون جالس يحرث الملعب .. والله لوتحرك ياسر كثر الحارثي لااجزم 3اهداف على الاقل ..
والشي الاخر : ناتي بمهاجم صندوق وتلعبه طرف وتجمده على دكة الاحتياط هذا مو منطق ابدا .. انا ماالوم المدرب لانه ممكن ماطلب المحياني لكن الوم الجهاز الاداري .. والا اقل حاجة ليش ماعطيتوه النصر اذا مو مستفيدين منه .. والله حرام مهاجمين كان لهم صيت (المحياني والصويلح والعنبر) حبيسين دكة الاحتياط .. لا واذا بعد فترة طبو الملعب ولا ابدعو طالبنا بتنسيقهم .. والسبب مهاجم واحد يتعالى على الكرة .. ويجامل من المدربين .. والله مشكلة ..

عالعموم المباراة ذهبت بخيرها وشرها .. واتمنى من الله العزيز القدير ان لا تعاد ..

وكذلك لي امنيات اتمنى ان تتحقق : ولايعني هذا انها تتوافق مع بعض الجماهير ..

وهي :
احتراف ياسر القحطاني خارجيا وفي اي مكان .. المهم احتراف .. ليتسنى للبقية باللعب في هذه الخانة ..

محمد الدعيع : ارجو ان يتنحى جانبا (مابقى بالعمر كثر ماراح) يااخي الدنيا !! لازم نتغنى بشخص نزل مستواه .. اخطاء فادحة .. صحيح يبدع في بعض المباريات .. لكن في عالم واقفين وراه يتمنون اتاحة الفرصة ..

الدخول وبقوة (وهذه الكلمة اعنيها) في مفاوضات لجلب اضهرة سعودية (قد المهمة) وكفانا كلام بان المبالغ المطروحة مبالغ فيها .. (يااخي والله لو اجيب ظهير ب50 مليون وش المشكله . ويلي بمبلغ كبير ولاعب تكتيكي
ومانقدر نقول الا _قال انفخ ياشريم قال مامن برطم_ لكي يتسنى لنا احضار مهاجم اجنبي بمكان لي يونج)

الاستفادة الفنية من عزيز (لان الغنام اقل مايقال عنه لاعب عادي جداً) والا الاستفادة منه بطريق المقايضة مع احد الفرق والاستعانة بمهاجمين ..

والامنية الاخيرة ::
وهي ان يدرك لاعبي الهلال ان هناك قلوب تتبعهم وشغلها الشاغل مشاهدتهم ولولاها بعد الله لميستلمو المبالغ الماليه الطائلة .. وان يعلمو اننا كجماهير ليس بايدينا الا الدعاء لهم ومؤازرتهم اينما ذهبو .. فمن غير المعقول ان يخيبو ضننا وان يضهروا بصورة سيئة ..

كل الشكر للجميع .. وهذه فقط وجهة نظر مشجع هلالي متعصب .. احببت طرحها عليكم . فارجو الرفق بالرد .. لكي تعم الفائدة ..

وكل الشكر والامتنان لادارة المنتدى على الثقة المفرطة .. !!!!!

وليعلم الجميع ان هناك راي وراي اخر .. فالقوي من يستمع للراي الاخر .. والضعيف من يستمع لنفسه فقط ..

ومع ذلك أشكر إدارة المنتدى على الاحترافية في العمل .. وارجو أن لااكون اصبتهم بازعاج .. (فتحملو طيش مشجع محب) ..

شكرا من القلب ..


والى انتصارات قادمة تمحو حزن الهزيمة .. باذن المولى عز وجل ..
.............................................................................
عــــــــــــشــــــــــــقـــــــــــــــي الـــــــــــــــــــهـــــــــــــــــــــلال


إلى اللقـــــــــــــاء ..



(ندور..لكن الدم أزرق)