[المطفوووووووووووووق]

السلام عليكم ورحمة الله وبركاته ...

اتمنى من الغالين ان تعجبهم هذه القصه .....


مواصفات الاستاذ دحيم :
الاسم / دحيم الدلخ .
العمر / مولود في سنة الطفره .
الشكل / قزم ودب و اقرع و وجهه كله خدود و ما فيه عيون باختصار يحووم على الكبد .
الولد دحيم داشر 24 ساعه مشاكل و تفحيط و خرابيط ..
المهم ابوه قرر انه يزوجه يمكن يعقل الولد !!!!
ويقوم ابوه ويخطب له بنت عمه الاستاذه ( حصه ) ههههههه
عاد حصه خبله (مجنونه ) مثله واكثر .
المهم يوم جاء العرس و الا يدورون على دحيم والا اخونا طالع مع اخوياه للثمامه يطعسون وابوه يدق عليه .
الاب : الوووو دحيم وينك .
دحيم : هلا والله طالع مع الشباب للثمامه طال عمرك .
الاب : جعل الطلعه تطلع من روحك بلى . تعال اليوم عرسك
دحيم : طيب العرس في الليل يمديني اعود المغرب .
الاب : اقوول امش جعلي امشي العصا على ظهرك .
دحيم : طيب خلاص جااي .
ويقفل التلفون .
المهم ويجي دحيم و يلبسونه ..الخبل ناوي يروح بقميص النوم .
المهم ويمسكونه اخوانه ويلبسونه ويودونه القصر .
في هذي اللحظه . دحيم ما يدري ويش السالفه يبي يخلص بسرعه عشان يروح يلحق الاستراحه يلعب مع الشباب بلوت .
ويدخلون القصر ويجلسونه في المنصه وهو يقول ابي اروح اجلس عند القهوجيه اسولف واشرب شاهي ( والله منسم مررره )
و يلقطه اخوه ويجلسه على الكرسي
و يجونه الناس يسلمون .
المعازيم: مبرووك منك المال ومنها العيال .
دحيم : هلا والله ايه طيب يكون خير والله ما عندي ولا فلس .
( قايل لكم ما هو وجه زواج ) .
المهم ويدخلونه على الحريم .
يووم دخل وهو اللي يفتح كشرته ( ابتسامه عريضه ) .
و يناظر في ذا البنات .
المهم يوم طقوا الطقاقات الا وهو يطمر ويرقص سامري
ويسحبه ابوه ويجلسه ويقول اركد لا تفشلنا
المهم ويجلسه على الكوشه .
وتجي وحده ترقص عنده و هو اللي يضحك عليها ويقول اوووووه ما تعرفين ترقصين ويتهزأ فيها . المشكله ان اللي ترقص امه مسكينه تبي تفرح فيه مادرت انه ما يستاهل .
المهم ويقومون البنات يرقصون عنده وهو يناظر ويقول عاشوا هزي ورا ورا الا وابوه يكمخه على جبهته .
دحيم : طيب خلاص ابنطم .( ابسكت ) .
المهم يوم خلصوا وهو ياخذ العروس ويركبون السياره
المهم ما درا الا تقوم حصه وتقول افففف ما بغينا نطلع . اقول عندك شريط كسرات ( شعبي) ترا ملينا من ذا الطقاقات ازعجونا .
الا ودحيم ينبسط على حرمته خبله(مجنونه) مثله .
المهم وتقول له
حصه : دحيم اباسالك سؤال
دحيم: اسالي
حصه : انت الحين تعرف تفحط
دحيم: اكيد انا احسن واحد يفحط ( مسوي فنان عندها وهو ما عنده سالفه )
حصه : و الله ورني ابي اشوفك تفحط .
دحيم ( توهق )
دحيم: خليها بعدين ماهو وقته اليوم ( يبي يصرف )
حصه : افااا شكلك ما تعرف ههههههههههههاي .
دحيم: اوريك الحين من اللي ما يعرف .
وهو اللي يلف هذيك اللفه وطرااااخ في الماصوره على طول
والحين حصه ودحيم في مستشفى الشميسي الدور الاول غرفه123 قسم الكسور .
الزياره من 9-12 ظهرا و من 5-9 مساءا
ههههههههههههههههههههههههههههههاي
النهايه ....

و لكم خالص تحياتي يا الغالين ..