[أبـو زآيـد]

بسم الله الرحمن الرحيم





نواف الهلالي يعود لكم من جديد





في البداية ألف (واثنين) مبروووك الفوز على الأهلي ومن فوز لفوز بإذن الله

^^^ ولا تسألني ليش اثنين لأن المعنى ببطن الشاعر




طبعا المباراة كانت روعة بصراحة والجميع أبدعوا من المدرب إلى آخر لاعب وما قصروا قدموا لنا الفوز والمتعة



لكن فيه لاعبين اثنين هم اللي دار حول مستواهم الكلام وهم : ياسر و نيفيز ..!



بالنسبة لياسر .. الكلام عن ياسر كثر وزاد وامتلت المواضيع والصفحات ولا في زود الكلام الآن فائدة لـ سبب وحيد وجوهري سأذكره لكم ..


طبعا في الموسم الماضي كنت أنا من ضمن الأعضاء اللي انتقدوا ياسر بشدة في بعض المواضيع


وبعد عدة مباريات وانتقادنا له ما كان كله بسبب نزول مستواه إنما بسبب ( اللامبالاة ) اللي كنا نشوفها منه


واللعب ببرود أعصاب وأخذ الكروت وغيرها ..!


أما في هذا الموسم فالوضع مختلف 180 درجه ..! يعني .. ياسر الحين مو مثل ياسر الموسم الماضي


بالعكس اللامبالاة اللي كانت موجودة عنده ابتعدت تماما والولد متحمس وباذل أقصى جهده وهذا هو الشيء


الواضح للجمهور في ياسر هذا الموسم .. عشان كذا كثرة الكلام عن اللاعب ومستواه ما فيه فايدة ولا يقدم


ولا يؤخر لأن اللاعب الحين جالس يبذل جهده ويحاول يجيب أقصى ما عنده .. وهذا الشيء اللي خلى الأمير


عبد الله بن مساعد يطالب بمهاجم أجنبي لأنه شاف إن ياسر جاب أقصى جهده وهذا مستواه .!!


يعني الآن وش فايدة الكلام !! اللي يبي يلوم يلوم المدرب على إشراكه أما هو زي ما قلنا جايب كل حيله


وش تبونه يسوي يشقق ثيابه .. ولا يقدر وليس منطق إنه إذا اختاره المدرب للتشكيله يقول منب لاعب


مستواي نازل !!!!! هذا الشيء اللي يجب إن يعرفه الجمهور عن ياسر حتى نفتك من زود المواضيع اللي ما لها فايده بصراحه !!



أما بالنسبة لـ نيفيز .. مسألة إنه ما أخذ فرصته أعتقد إنها صعبة شوي .. يعني اللاعب ماهو توه يجي


اللاعب متواجد من أيام المعسكر شارك فيه وشارك في المباريات هذي ومو معنى كلامي إنه ما يعرف


يلعب .! أكيد ما جابه الهلال إلا وهو ممتاز لكن نقول ما حصل له توفيق .. !!


وأتمنى من الإدارة خلال فترة الانتقالات القادمة أن تجلب مهاجم سريع وهداف لأمرين :


الأمر الأول هو امتلاء مركز الوسط باللاعبين النجوم والنجوم الواعدين مثل الشلهوب والفريدي والدوسري


والعابد و ويلي وغيرهم ..!


والأمر الثاني هو حاجة الهلال لمهاجم إذا كنا نريد المنافسة في البطولات القارية وكلكم تذكرون لما كان الهلال


يسيطر على البطولات القارية كان عندنا مهاجمين مثل الجابر والجمعان والغشيان ومع ذلك جبنا مهاجمين


أجانب مثل سيرجو وغيره وساعدو بشكل كبير بحسم البطولات .. عشان كذا اللي يبي الآسيوية لازم يكون


عنده هجوم ضاااارب ..! ضارب مهب يضارب لا تفهمون غلط




قـلـة الـخـاتـمـة


الكلام عن نيفيز يجرنا للكلام عن شيء ثاني وهو مسألة قلة الخاتمة عند بعض الأعضاء بصراحة !!


سواء من ناحية التايب أو من ناحية كوزمين .. يعني كلنا متفقين إن هلال جريتس رائع وأروع هلال من ثمان سنوات


لكن مو معنى هذا إنه خلاص عسى كوزمين بقريح لا يعني بالعكس الله يذكره بالخير كنا مستانسين معه


وحصلنا على بطولات وراح وله ذكرى جميله عندنا ..!


نفس الكلام عن التائب مهب معنى الشلهوب أبدع يعني خلاص الله يقلع التايب ! بالعكس إلا يا ما أمتعنا


بمهاراته وتمريراته وسحره ولنا في أرشيف ملخص المباريات دليل عشان كذا الله يذكره بالخير وله


عندنا ذكريات جميلة ما تنسى .. صحيح الهلال ما يقف ولن يقف على أحد لكن وش رايكم مهب لو كان


مكان نيفيز ( لأضاف ) شيء من التمريرات الحاسمة والمتعة للجماهير يعني أقل شيء اسمه يخوف الكديش


ولا له علاقه بنزول أو ارتفاع مستوى الشلهوب .. الشلهوب ما كان يلعب أساسي واللي ماخذ مكانه


كان الكوري ( سيول ) << هذا قولوا الله لا يرده بكيفكم وأنصحكم تكونون قليلين خاتمه معه لأنه أصلا ما له


بداية عشان يصير له خاتمة


عشان كذا يا أما إننا نذكرهم بالخير أو نترك الكلام عنهم وهذا أحسن لأنهم خارج الهلال الحين ..!




عـزيـز الـقـوم


بالنسبة لخالد عزيز أنا ودي أقول شيء بصراحه وأرجو إنه ما يفهم البعض إن أدافع عن أخطاء خالد .. لا


ولكن أبوضح نقطه ربما تخفى على الكثير .. وهي إنه يعني سواء أنا أو الجمهور ما ندري وش الأسباب الحقيقية


لغياب خالد لكن .. من ناحية تعامل الإدارة مع الموقف ( بغض النظر عن شغل المدرب ) أتمنى وأتمنى وأتمنى


إن الإدارة ما تكون قاسية بزيادة على نجوم الفريق يعني أنا بقولكم شيء .. ترا التدريبات واسألوا مجرب


ماهي ذيك الأمر السهل والله تعب وجهد غير طبيعي يعني قسم إنهم يحللون الرواتب اللي ياخذونها بالتدريبات هذي


يعني أي شيء أو أي ظرف يجي للواحد ربما يرده عن التدريبات لو كان انفلونزا بسيطة ..! غير كذا القسوه


والعقوبات المتكررة على لاعب معين وعدم قبول أعذاره دائما يخلي فيه حساسية بين اللاعب والإدارة


تخلي اللاعب يحس إنه يعامل غير زملاؤه اللاعبين وبالتالي نخسر النجم مثل ما خسرنا غيره ..!


وأنا أشوف الكثير هاليومين يتكلمون عن الجمعان وهم ما يدرون وش سالفته أصلا ..! الجمعان حصل له مثل


ما ذكرت فوق من التعامل وكأن عزيز سيناريو مكرر ولا نريد إن السيناريو ينتهي مثل ما انتهى سيناريو الجمعان


لكن الأكيد إن الجمعان لم يخطئ بنسبة 100% بل هناك خطأ من الإدارة وهو التعامل بالقسوه الزائدة اللي ذكرتها


وأتمنى إنه ما يتكرر مع عزيز .. وإلا لاعب مثل عبد الله حسم بطولات للهلال وله تاريخ وبسبب سوء التفاهم والضغط


والقسوة الزائدة من الإدارة يرمى وينسق بهذا الشكل ..! ( ما هكذا تورد الابل ) .. الله يذكرك بالخير يابو جمعان


ومثل ما قلت في البداية لا أحد يفهم من كلامي إني أدور الأعذار أو أطلب التساهل لا وألف لا .. كل ما أريده


هو الابتعاد عن ( القسوه الزائدة ) .. وأيضا ابتعاد كثير من الجماهير عن قراءة نشرة الرياضي لأنهم هم من يضخمون


هالمواضيع ولو هي بكيفهم كان ألغوا نادي الهلال !! وللأسف بعض الجماهير تنقل أفكارهم هنا ..!!




الـعـمـيـد .. مـحـمـد الـدعـيـع


الكبتيانو والعملاق أبو عبد العزيز .. بصراحة تستغرب أشد الاستغراب وتعجب أشد العجب من هلاليين ينتظرون نهاية العميد


ويطالبونه بالاعتزال !! كيف تطالبونه بالاعتزال وهو أفضل حارس في الدوري حتى الآن ويقدم مستويات مبهرة


ويصد كور صعبه بسهولة ولا أحد يبي يعرف صعوبتها إلا إذا راح الدعيع ..!


وحجة الأمير عبد الله بن مساعد إنه يريد منه الاعتزال وهو في عز مستواه حجه مردوده لأن الأمير عبد الله


نفسه في فترة رئاسته حاول التجديد مع الثنيان وهو في سن الـ40 !!


لكن اللي أنا أشوفه إنه في ناس من الواضح إنه بينهم وبين الدعيع أمور شخصيه ويريدون تصفيتها وخصوصا


في جريدة الرياض ( للأسف ) ..!! وإلا كيف تفسر لي إن الدعيع يبدع عدة مباريات ثم لما يخطئ خطأ واحد


وهو هدف النصر يطالبونه بالاعتزال !! ما لها إلا تفسيرين : إما أنهم ما يبونه يخطئ أبدا وهذا غير معقول


ولا أعتقد يفكر بهالتفكير إلا ( كريزي ) !! أو إنهم مثل ما ذكرت ينتظرون أي خطا من الدعيع حتى يصفون حساباتهم معه ..!


لكن نقول لهذولا وهذولا ما قاله الأمير عبد الرحمن بن مساعد وهو إن الدعيع له تاريخ يشفع له عن كل خطأ


( وقـلـيـل خـطـأه ) << يا عيني





# الله يعيننا على الإعلام الأصفر فقد سيطر على جميع الصحف والأقمار من النشرة لعكاظ للوطن للمدينه لشمس

للخشبية لخط البلدة للأسوأ والأصفر والأحقر !! سيطرة غير طبيعية !! بالله ودي أعرف وين الإعلام الهلالي اللي يقولون !!


# طلب أرسله لـ معشوق الجماهير الفتى الذهبي بأن أشاهد يوسف الثنيان ولو خمس دقايق في حفل اعتزاله

وأتمنى إنه يوافق أبو يعقوب ويا حبذا لو نشوف طارق التائب معه ويا حلاتها ون تو بين الاثنين




أدري إني طولت عليكم وأنا أعتذر بقوووه لكني من النوع اللي يراقب من بعيد ثم يطب مره وحده << صقر ما شاء الله










قفلة


قل مين نادي القرن يا آسيا مـيـن .:. قالت زعيم الكون منهو حليّه

لين الوعد في عام مية وألـفـيـن .:. لكن ترا وربك عليم الخفيه

يبطي لها ياصل من الناس جنسين .:. كذاب قوم وعازف السمسميه
.
.