[ابوساري]

السلام عليكم ورحمة الله وبركاته ..


هوريو الجميع .. ؟

مبروك المستوى الكبير من نجوم المستقبل .. بغض النظر عن النتيجة ..

لأن الفريق المقابل ما كان ذاك المستوى ..

والمباراة كانت تحضيرية تدريبية للوقوف على مستوى اللاعبين ..


لكن اللي ضيق صدري .. فرحة الدوسري ..

صح ان الهدف متكتك .. والحارس انسحب .. بس حجم المباراة ما كان يستاهل هالفرحة يا عزوز ..

لكن أنا بلتمس لك سبعين عذر .. لا مهب سبعين .. بلتمس لك عذر واحد ..

وهو انك مبسوط برجوعك لمستواك .. وحساسيتك للكورة ..


والا كان المفروض اول ماسجلت الهدف تركض للزاوية وتنسدح وتصيح لمين تحمرّ عيونك ..


أما قصة الحركة ذي قصة ثانية .. وانت ماتنلام .. الحكم هو اللي ينلام ..

يعني يا عزوز انت تسوي الحركة هذي وماعندك خلفية عن دخول الشيشة مدرجات النصر ؟ ..

كان المفروض انك تضرب حسابك لهالموضوع ..

الحركة استفزازية بالنسبة لهم .. والمثل يقول ( اللي على راسه بطحى يحسس عليه )

ويمكن صار سوء تفاهم .. وفهموا الحركة بهالشكل ..


لكن نصيحة وانا أخوك .. ودي انك تحطه حلأة بودنك ..

باتسر عقب التمرين .. سيّر على البطحاء .. وخلهم يفصلون مخابي على الشورت ..

وكل ماسجلت هدف حط ايديك بمخباتك ولا تركض .. وخل وجهك متوجهن الدزبلة ..

وادع ربك انهم مايعطونك كرت احمر .. بس لا تطلع ايديك وانت تدعي .. خلهن بمخباتك ..

واذا خلصت داعي .. رح حب راس الحكم واعتذر منه .. وطيّب خاطره بكم كلمة ..

وانتبه وانا اخوك تسحّب الحارس .. ترى الحارس له احترامه وهو انسان حسّاس شوي ..

والله اني احبك وناصحن لك ..



يا اتحادنا عاد مايصير هالكلام ..

فاحت ريحتكم قسم بالله .. يعني لاعبين اخذتوهم للمنتخب مع انهم احتياط عندنا ..

الا بالغصب يفوزون علينا ؟ .. اذا على البطولات .. نظموا لكم بطولة تضم فرق الدرجة الاولى ..

وإلفزوا النصر بهالبطولة .. وطقطقوا بالمباريات على كيفكم .. وعطوهم اللي يبون ..

بس مايصير بطولة منقولة على كم قناة .. والعالم يشوف .. عيني عينك تحيّز !! ..

هدف تسلل .. طرد بعد الهدف مباشرة .. مابقى الا تلغي الهدف وتحسب بلنتي ..



مادامت كورتنا بهالشكل .. مستحيل نتطور .. ومستحيل نوصل أقصى من اللي وصلناه ..

مع ان البطولة تعتبر تدريبية بالنسبة للهلال .. بس حقنا المشروع اننا ننافس عليها بشبابنا ..


صبر جميل والله المستعان بس ..



قفلة #=!

يبقى عزيز ابن من ابناء النادي .. على زلاته وغلطاته ..

متى مابغينا نحتفظ به .. نقدر نحتفظ به بمعاملته كحالة خاصة ..

خالد يجب على النادي معالجة مشاكلة العائلية .. ومراعاة ظروفه النفسية ..

الله اللي يعلم كم خالد عزيزن على قلوبنا ..

ومهما قست عليه الجماهير .. أتمنى ماتكون هالقسوة المسمار الاخير بالنعش ..

اتركوا خالد هالفترة يراجع حساباته بدون ضغوط .. وبدون تحسيسه انه غير مهم ( وماوقفت عليه ) ..

خالد أخطأت بحق ناديك وجمهورك .. وباب الرجعة مفتوح يابو الجوهرة


للقاء