[القيصر ادريانو]

بسم الله الرحمن الرحيم

السلام عليكم .. اخباركم يا عشاق الأزرق ان شاء الله تمام وبخير وبصحة ؟!

بدون مقدمات ببدأ بموضوعي المتواضع




كلكم تذكرون قبل سنتين مدري ثلاث يوم الشلهوب كان المفروض ياخذ جائزة أفضل لاعب آسيوي ؟!

بالله ذاك القطري كان يستاهلها أكثر من الشلهوب .. كثار ناس قالوا انه المفروض الشلهوب هو الي ياخذها

ما علينا .. الموسم الي بعده الشلهوب ماكان يلعب كثير والمدرب (الظاهر انه كان كوزمين) ما كان يدخله

لأنه كان طارق موجود وكان كوزمين ما يدخل الشلهوب

أو كوزمين عنده تكتيك معين أو الشلهوب ما كان يعجبه .. ما يهمنا

بعدها الشلهوب بدا ينزل مستواه شوي شوي الين ما صار لاعب احتياطي 100% .. يعني ما يدخل الا بالمباريات العادية

بعد كذا خلاص العالم بدوا ينسون الشلهوب مثل ماصار مع نواف قبل كم موسم

فصار اذا دخل يتشائمون فيه الجمهور .. ليش لأنه نازل مستواه

وللمعلومية يمكن كثير منكم أو كلكم يعرف أنه مر بظروف صعبة جدا ولو لاعب غيره كان ممكن اعتزل

لكن مع ذلك الشلهوب كمل مشواره مع الزعيم حتى لو احتياط

وهذا دليل على عشقه للهلال ..

الشلهوب الموهوب الي كان مظلوم من بعض الجماهير الهلالية وخصوصا في الموسم الماضي

يعني مر بظروف ولا أصعب منها .. ومع ذلك الشلهوب إلى الآن وهو مصرّ على انه يرجع لمستواه المعهود عليه

كان الشلهوب من أفضل صنّاع اللعب بالسعودية إذا مو الأفضل بعد

وكان شيء طبيعي انه يكون أساسي في المنتخب .. بس للأسف الحين إذا لعب بالمنتخب بدوا بعض الحساد يقولون ان الشلهوب مجامل من قبل المدرب والمفروض ما يلعب

يعني نفس مشكلة نواف أول وياسر بنهاية الموسم الماضي .. اللاعب إذا ما لقى دعم من الجمهور صعب جدا انه يبدع

طبعا نواف مشكلته الأولى والكل يعرفها وهي الإصابات .. لكن مع ذلك ماكان فيه دعم من الجمهور

أما ياسر صحيح أن جمهور الهلال يدعمونه دعم مهوب صاحي .. بس الجماهير الثانية ينتظرون بس متى ياسر ينزل مستواه

وكلكم تتذكرون حقت ياسر وينه .. الجمهور السعودي بعض الأحيان يكون ضد اللاعب الوطني وهذا شيء غلط من الجمهور

نرجع للشلهوب .. طبعا الشلهوب حتى فيه بعض من جمهور الهلال ما كانوا يدعمونه في كربته

بس الحين الشلهوب بدا يرجع شوي شوي من نهاية الموسم الماضي

وأنا أأكدلكم وأوعدكم بعد انه موب جاي نص الموسم إلا والشلهوب رجع أفضل من أول ان شاء الله

من نهاية الموسم الماضي مثل ما قلتلكم انه الشلهوب ناوي يرجع لمستواه .. وبدا يرجع

وصدقوني يا شباب لو الشلهوب يلفى دعم منكم بيعوضلكم طارق التايب حتى لو فيه نيفيز

الخلاصة: الشلهوب لازم يلقى دعم من الجمهور عشان يرجع لمستواه .. وبينزل مستواه زيادة عن كذا اذا كان الجمهور الهلالي والسعودي بشكل عام ضد الشلهوب




والسلام عليكم ورحمة الله وبركاته !