السلام عليكم ورحمة الله وبركاته
رمضان كريم وعيدكم مبارك مقدما ..
حالة 1 :!-
في عام 2005 ميلادي أقدمت شخصياً خبصياً باعتزال الكتابة والمشاركة في منتديات الزعيم .. ضاقت صدوركم صح ؟
طبعاً ماوقفت علي أدري .. واختصر لكم الردود واعطيكم اياه من قاصره .. علشان مايطلع احد ويتعّب أنامله الذهبية ويكتب لي "ماوقفت عليك" ..
في تلك الفترة .. اختليت مع نفسي خلوة شرعية .. في جلسة مصارحات غرامية أمتد به الليل والبيداء تعرفني ..
وقررت ابتعد لأسباب حدتن .. بس اني بلشت بروحي عاد وتحسفت .. صرت ماسولف مع احد وحبيس دكة الاحتياط بالبيت ولا أحد عطان وجه .. قلت مالي الا ارجع .. وفعلا مسكت نفسي على جنب ولفيت يدي على خصره في مشهد درامي غرامي مقتبس من مسلسل تركي .. وقلت لازم ارجع .. وسبحان الله رجعت ..
طيب وش ابي اقولكم قصة حياتي ؟ .. مافيه شك راح اقولكم < مافيه شك وطلعنا من كاس العالم .. ومازال مافيه شك
الشاهد من هالقصة العاطفية .. ألى متى ياخي ؟ ..
الى متى ياخي أكتب موضوع وعيوني يصيرن حمر وأعصر مخي واقعد لي يومين وانا بالسيارة بالبيت بالمكتب بالقهوة وانا افكر بهالموضوع وادربيه يمين ويسار براسي .. بالاخير اكتبه ..
وثم يجي انسان قاسي القلب
.. مجرم .. ويكتب لي رد .. عقبه أتحسف اني كتبت ..
يعني انا انسان حساس وخجول .. وجهي اغسله بماء ورد كل ماقمت من النوم .. افرش سنوني قبل النوم وبعد النوم واثناء النوم .. ياخي ليه تجرحن ؟ .. انا وش سويت لك .. انا بس كتبت موضوع ..
ياخي قل خير .. ولا .. ولا .. ولا اسكت ياخي ..
ياخي هذا منتدى .. ماله داعي نتخلى عن اللباقة والتعامل الحسن العتيبي والخلق الحميد الجمعان ..
يعني مثلا صار الموضوع سامج وانت فوق مستوى الموضوع .. ياخي تنزّل شوي واكتب رايك بفكرة الموضوع ..
كم تمنيت .. وانا أبحر وسط بحر أفكاري العظيمة .. ان المنتدى يكون باشتراك سنوي ..
خصخصة المنتدى يعني .. هالشي بيختصر شي عظيم وبينظم حركة المرور بالمنتدى ..
ويحد من تواجد ذوي الاحتياجات الخاصة من جماهير الاندية الثانية .. والا الجماهير اللي مابلغت سن الرشد ..
والأهم يدعم خزينة جمهور النادي .. يعني اللي بيتزوج من الجماهير والا بيشري سيارة والا بيسافر يوسع صدره ..
لا تصدقون .. اقصد يدعم خزينة الجمهور مثلا لدعم الرابطة .. والا لنقل الجماهير من مدينة لمدينة ..
والا يتصدقون به .. اهم شي ادخل المنتدى وانا منسدح على الأريكة من الوناسة ..
وبما اني ما أنعطى وجه .. أبفكر مرة ثانية ..
وأقول المواضيع اللي تنكتب .. 50 % .. مجرد افكار مستنسخة من مواضيع مكتوبة قبل يوم او يومين ..
كان يقدر كاتب الموضوع يختصر موضوعه برد على نفس الحدث ..
ليه مايصير اعتماد المواضيع من المشرفين على القسم ؟ .. مثلا اذا شاف الموضوع مكرر .. يرفضه ..
او اذا شاف الموضوع تحريضي .. او وقته غير مناسب .. يكنسله .. < يقالي غيرت يرفضه
بالحركة البطيئة ..
أتمنى من الأعضاء .. تكون نفسهم طيبة بالردود على اي موضوع ..
ونبتعد عن التعصب .. والردود الاستفزازية .. ويصير فيه لباقة شوي ..
اقل شي يصير منتدى متحضر .. والانسان حتى لو كان ورى شاشة .. مايعني انه ياخذ راحته واجد ..
على العموم هالكلام مهب حديث عن نفسي .. حديث بالنيابة عن كافة المواضيع المجروحة .. ( قلب منشق نصين )
والا انا وجهي صبة .. صح حساس بس صعب انجرح .. زي بريق الألماس ماهي بس قصة حسن ..
كما أتمنى تواجد مرور سرّي بالمنتدى .. اي واحد ينصاد وهو مابلغ سن الرشد .. يجمدون عضويته
< ماتبي توت بعد ؟
حـالـة 2 :!-
لحسن حظي والدنيا حظوظ .. ان خروج المنتخب من ملحق كاس العالم واكب انتهائي من تأثيث ملحق البيت..
ولحسن حظي والدنيا حظوظ .. اني ماشفت المباراة .. لأنه صار لي ظرف وقت المباراة ..
المنتخب كان يحتاج إنه يتليّن شوي .. لأن التأهل يعني استمرار النكبات واستمرار الاخطاء ..
ومشاركة المنتخب بكاس العالم .. بتكون عبارة عن تقديم مستوى مشرف و الخسارة بأقل الاهداف ..
والنتايج المذلة تكون على راس لاعبي الهلال .. حتى لو هم على دكة الاحتياط مالعبوا ..
الخروج كان له فايده ..
وهي اننا نبي نلعب الدوري بدون توقفات ومعسكرات .. كل الاندية تبي تستفيد من الدوليين ..
أتمنى ومن حبي لياسر انه يبقى على دكة الاحتياط ويلعب كبديل في الشوط الثاني ..
لمين يرجع ياسر بشكل تدريجي .. ويطلع من الحالة النفسية اللي يمر به ..
حـالـة 3 :!-
كل انجاز سعودي يجيّر للرئيس العام .. ثم للمدرب .. ثم للاعبين
كل كبوة سعودية تجيّر لأفضل لاعب هلالي في فترة الكبوة .. ثم للمدرب .. ثم لجماهير الهلال
قلنا التأهل لكأس العالم بعد الله بسبب وجود لاعبنا القائد المحنك .. اللي اعطى الروح والثقة بتواجده لكل اللاعبين
وانه اكثر من سجل في التصفيات .. وله بصمة واضحة في كل تأهل ..
قاموا وكتبوا .. وانكروا واستنكروا هالحقيقة .. وان هاللاعب مجرد لاعب بين 11 لاعب ..
يوم خسرنا بنتيجة كبيرة .. حطوا البلاء بهاللاعب .. وانه سبب هالنتيجة مع العلم انه مهاجم .. لا علاقة له بالدفاع
سؤال .. هكالسنة كم لاعب هلالي لعب في تشكيلة ذيك المباراة ؟؟ ..
5 مدافعين .. و 3 محاور .. ومهاجمين .. هي سبب الهزيمة من ألمانيا .. وهي سبب خروجنا على يد البحرين ..
حـالـة 4 :!-
حقق افضل لاعب في آسيا سنة 84 .. وحقق وحقق .. ومدوّنة كاملة من الانجازات ...
آخر شي .. مافيه جائزة افضل لاعب اسيوي للعام 84 .. والمدوّنة مزورة ..
اسطورة الدوري المحلي الى عام 1410.. صاحب هدف بيضة الصين ..
بكل تعصب وحيادية .. لا يقارن بأسطورة آسيا ... صاحب الانجازات المشرفة .. اللي في تواجده تواجدت الانتصارات ..
حاولت جاهدا .. وضغطت على روحي .. ابي انجاز واحد حقيقي للمستسطر .. مالقيت
أتحدى أي واحد يعطين انجاز واحد ... انجاز يخليه يفرق عن غيره في السعودية وليس في آسيا ...
حمزة إدريس كان اسطورة محلية على مستوى التهديف أكثر من ماجد .. لو حسبنا سنوات حمزة مع الاتحاد طبعا ..
ياسر القحطاني سجل في بطولات آسيا أكثر من اللي سجله ماجد .. مع العلم ياسر قدامه عمر طويل إن شاء الله
العويران سعيد سجل في بلجيكا هدف أفضل من هدف بيضة الصين .. مع العلم العويران لاعب عادي ..
والعلامة الفارقة بين الهدفين .. ان كل الهدفين كان دزه وإلحقه .. لكن قيمة هدف العويران في كأس عالم وفي منتخب بلجيكا اللي كان من المنتخبات القوية في وقته .. اكبر من قيمة هدف ماجد على الصين اللي كانت مثله مثل نيبال حاليا ..
يعيبون سامي بقلة التهديف .. مع العلم ان سامي صنع اهداف خلال مسيرته توازي ماسجله ماجد خلال مسيرته
لأن سامي لعب اغلب مسيرته الكروية كمهاجم ثاني .. يعني يلعب ورى المهاجم ..
محليا .. وعلى مستوى الهلال ..
سامي اهدانا آسيا مرتين .. واهدانا كاس الدوري عام 18 هـ .. بجهد شخصي
ودوليا .. سامي اعطانا التأهل عام 2006 .. وسجل اسمه بانجاز يحسب للوطن مابين اربعة اساطير ..
اعجز عن سرد انجازات سامي في موضوع مختصر مثل هذا ..
على العموم ..
على الملعب و على الورق .. سامي نار والباقي يحترق ..
وتصبحون على عيد ...
حـالات تـسـلـل +_= 
الوضع العادي
