قصتـــي في ميدان الحرب عفوا ملعب الملز - نادي الهلال السعودي - شبكة الزعيم

القـ المجروح ـلب · #1 27/08/2009, 07:45 PM

بسم الله الرحمن الرحيم

السلام عليكم ورحمـة الله وبركاته

المهم بكتب لكم قصتــي في الملعب

أدري انغثيتوا من كثر قصص سوء المعاملة اللي في الملعب ... لكن ورب الكعبـــة أنها تحــزن مثل هالقصص.

وخاصة أننا في بلد الإسلام ونتعامل مع أفراد نحسبهم أناس مؤتمنون على أمن البلد واظهـــار صورة حضارية راقيــة.

المهم إليكم ماحصل معـــي في الملعب

أخوكم ساكن جنب ملعب الملز ...

وبما أني قريب قلت بروح الساعة عشرة ... اطلع من العمل وأروح

ورحت ووقفت جنب مدخل جمهور الدرجـة الثانية ونزلت عشـان اقص تذكرتي وحطيت محفظتي في السيارة مع الاثباتات.

يوم نزلت عشـان التذكر !!

وووووووووووووووووواك يالزحمـــة قلت خلوني آخذ لفة على الجهة الغربية يمكن أخف زحمـة ولا نفس الكلام

رجعت لمكاني واقف أشوف السوق وش لون

السوق السوداء وصل خمسين ريال قلت والله ما اشتري بيني وينكم ماحسبت الحساب وسحبت فلوس

انتظرت عند المدخل قلت ربي يفرجهـــا ولا البيت قريب

شوي الحمد لله دخلت

ويوم دخلت إلا سكروا البوابات عشـان عدم وجود تذاكر ووجود تدافع عند البوابات

شوي لقيت ناس طايحـة عند الباب والسكرتي يرفس في ذا العالم طلعت جوالي أصــور ... شوي إلا ذا العسكري اللي جايني وسحب جوالي ويضربني بالعصـا.

قال جب اثباتك قلت والله في السيارة قال تجيب ولا اكسر الجوال قلت اكسرهـ ... قال يعني منت جايب اثباتك ويضربني مرة ثانية حاول يمسكني من ثوبي قلت فك قال أنا عسكــري قلت وأناا امشي بالقانون
قلت أبي الضابط قال شوفه في الملعب.
مشيت ووصلت عند التفتيش الأول فتشوني وسألت واحد وين الضابط المستلم ؟؟؟
قال ليش قلت خويكم سحب جوالي وضربني بدون سبب
شوي واحد قال شوفه في الملعب يحكم !!
هذا اسلوب عسكــــري ؟؟؟
انتظرت ضابط الموقع طول الشوط الأول لأني ما أبي جوالي يروح وخاصـة أنها موبايلي ومشترك بموبايلي الهـلال
وشفت عاالم مجلسينهم بسيارات الشرطة.

المهم آخر شيء مع بداية الشوط الثاني جاني وواحد من البحث السري قالي جوالك مع من قلت مع فلان !!
شوي جاني وقالي تبي من العسكري قلت لا بس يعطيني جوالي بعد مامسح اللي صورته
أخذت الجوال ودخلت الملعب على الهدف الثالث حق شلهوبي ...

بصراحــــة غبنة

ما أدري كيف آخذ حقي
بس قلت للعسكري أنا مسامحك لأني ما أبي مشاكل ولأاني أدري إن حقي ضايع

نبي من الرئيس يأخذ حقنــــا
وإلا هالإتحاد السعودي يطور ويحط تذاكر الكترونية (إذا حجت البقرة على قرونها)

هلالي خرافي · #2 27/08/2009, 07:45 PM

آلله لآيوفقهـمِ
منعدمين آلضمير !

نجوم من ذهب · #3 27/08/2009, 07:59 PM

الصراحه رحمتكم
كل شوي واحد كاتب قصته
الله يكون بالعون ولازم يشوفون حل للمشكلة

♥ N E V E S ♥ · #4 27/08/2009, 08:21 PM

ياخي حرام نعيش في ذل وكأننا جايين لبيتهم هالقذرين....!!

والله قهررررررررررررررر....!!

$الزعيم الأوحد$ · #5 27/08/2009, 08:30 PM

هذا إسمه (فن تطفيش) جماهير الهلال

وينك يالزعيم · #6 27/08/2009, 09:37 PM

هذا إسمه (فن تطفيش) جماهير الهلال

هلالي وافتخر · #7 27/08/2009, 10:41 PM

احتسب الاجر وانا اخوك .. وان شاء الله حقك مو ضايع .. وان ما اخذته في الدنيا تبي تاخذه منه في الآخرة ..

كا ريكاردو كا · #8 28/08/2009, 12:08 AM

رجال الامن اوسخ ناس حقيرين

ما يستحون والله انهم مو رجال على هاذي الحركات

الخجول20 · #9 28/08/2009, 12:34 AM

الله يعين

؟؟؟؟؟؟؟؟؟؟؟؟؟؟؟

تحياااتي ...

الشمـ(سامي)ـراني · #10 28/08/2009, 12:44 AM

حسبنا الله ونعم الوكيل
حسبنا الله ونعم الوكيل
حسبنا الله ونعم الوكيل
................................
الي ابي اعرفه بالضبط :
ليش عندنا رعاية شباب ، وشركات غير رياضية دخلت المجال الرياضي
وليش مصاريف على هيئة دوري المحترفين
وليش مصاريف على لجان تطويريه ( وان كانت وهمية )
دام ان العنصر المهم ( الجمهور ) ومصدر الدخل لهم من خلال شراء التذاكر من قبلهم
يعامل بهذه المعاملة
ماتبون الجمهور ليه كل هالمصاريف الي لو حطيتها في صحراء لقامت مدن وش مدن
لقامت دول بوزاراتها بمصاريف شؤونها كاملة
ياخي اذا الهدف منتخب بس يعلم الناس ان فيه شي اسمه سعودية على الخارطة
جمعوا فريقين 22 لاعب
وحطوهم في دوري اوروبي ولا لاتيني وادفعوا رسوم اشتراك ووفرو هالتعب