[أبـو زآيـد]

بسم الله الرحمن الرحيم





نواف الهلالي يعود لكم من جديد





حيا الله الزعماء العظماء الكرماء << على قافية ماء



طبعا الكل يعلم إن فريقنا ولله الحمد يمتلك أفضل العناصر بالدوري السعودي سواء لاعبين أو أجهزة فنية أو إدارة !!


يعني هو المرشح الأول للحصول على جميع بطولات الموسم .. لكن !! اللي نشوف إن الأمر هذا ما يحصل .. بل ربما


نخرج مثل الموسم الماضي ببطولة وحيدة .. طيب ليش ؟!! طبعا أكيد هناك عدة أسباب وظروف ..


لكن اللي ألاحظه أنا ويلاحظه أغلب الجماهير إنه من الأسباب الرئيسة لخسارة كثير من المباريات


هو غياب الــروح عن الفريق !!؟ يعني ما تلقى من يلعب بحماس وروح وقتالية من اللاعبين إلا اثنين


أو ثلاثة فقط !! والباقين سلم لي عليهم

عشان كذا من الضروري إيجاد طريقة تخلي اللاعبين يدخلون للملعب بحماس وروح وقتالية .. ولو نجحنا


بالشيء هذا أعتقد بإذن الله أنه لا يوجد أي فريق في آسيا يقدر يوقف الزعيييم


طبعا فيه أساليب قديمة تستخدمها إدارات الأندية وهي إنه يجي قبل المباراة المدير أو الكابتن ويقعد يتكلم ويصارخ


والشيء هذا صار روتين عند اللاعبين ولا عاد منه أي فايدة والدليل البرود الموجود عند أكثر اللاعبين ..


لكن من ضمن الطرق اللي أنا أقترح تطبيقها وأشوف إنها فعالة هو إنه قبل دخول اللاعبين للمباراة يكون هناك فترة


لا تزيد عن خمس دقائق .. وأقترح إنه في هذه الفترة نشوف طريقة بحيث يعرض للاعبين


بالفيديو لقطات وأهداف سابقة للاعبين أنفسهم أو تكون لقطات من جيل العمالقة ويشوفون كيف حماس اللاعبين


أمثال أبو يعقوب وسامي ويشوفون كيف قتاليتهم وكيف الواحد منهم حول يصيح إلى ضاعت الهجمة !!


هذا الشيء بإعتقادي يزيد من حماس اللاعبين !! طبعا من دون تكرار للمقاطع مثل بعض القنوات


يمكن البعض يشوف هالفكرة غريبة أو صعبة أو ما لأمها داعي


لكن صدقوني أنا متأكد إنها راح تفيد اللاعبين وتنجح بقوة !! ياخي حنا وحنا ما نلعب ولا شيء الواحد إذا شاف مثل


ذيك المباريات وذاك الجيل شوي ويفقع وجه اللي بجنبه من الحماس << طيب وراك عصبت



و سواء بهذه الطريقة أو أي طريقة تخلي اللاعبين يدخلون للملعب ويقاتلون من أجل الشعار فـ نحن بإذن الله


لن يستطيع أحد إيقافنا بتاتا البتة



_--_--_--_--_--_--_--_--_--_--_--_--_--_--_--_--_--_--_--_--_--_--_--_--_--_--_--_--




الجمهور وما أدراك ما الجمهور والتشجيع وما أدراك ما التشجيع والرابطة وما أدراك ما الرابطة !!


أعتقد إن مشكلة الرابطة وعدم التفاعل معها تتلخص في ثلاث أمور رئيسية :


الأمر الأول هو إن الرابطة الله يوفقهم ( صادّين ) لهم بزاوية ما أدري هم خايفين من شيء أو إنهم مستحين


يعني والله لا أحد يسمعهم ولا أحد يرد معهم ولا أحد يدري وش يقولون !! والواحد وهو جالس في المكان المقابل لهم


ما يدري وش يقولون كيف عاد اللاعبين إذا صاروا بالجهة الثانية من الملعب !! وحتى لو صاروا بالجهة اللي عندهم برضوا


محد يسمعهم ؟؟! يعني الرابطة قاعدة تشجع نفسها !!


والأمر الثاني هو الأهازيييج !! يا جماعة في فرق بين الأغاني وبين الأهازيج .. يعني المشكلة اللي قاعدين نسمعه


أغاني وموالات غير قابلة للترديد يعني طويلة والجمهور لو بيرددها يبغى لهم كل واحد يسمّع للثاني قبل المباراة


عشان يحفظونها !!


وثالث شيء هو حتى لو كان الجمهور يسمع الصوت تمام والأهازيج قابلة للترديد تبقى مشكلة إن فيه بعض الجماهير


يبون يرددون لكن السكوت الرهيب من حولهم يخلي عندهم شيء من الحياء !! يعني ما لها داعي الواحد


قاعد يصارخ لحاله تقول مهبول


طيب السؤال هنا : مـــا هـــو الــحــل ؟؟!


الحل الله يسلمكم بسيط جدا .. يعني من ناحية الطبول والطقطقة والموالات والخرابيط ما لنا فيها حاجة !!


و(حمادة) والطبل اللي معه حد الله ما بيننا وبينه .. يكفي وجع راس !!


الموضوع ببساطة هو أن يتم تقسيم أعضاء الرابطة إلى مجموعات وكل مجموعة عشر أشخاص تقريبا


وينتشرون بعدها في الملعب يعني يكون مثلا بين كل مجموعة ومجموعة عشرين متر .. وإذا كانت


المباراة بالاستاد فيكون بين كل بوابة وبوابة مجموعة في الدرجة الأولى والدرجة الثانية ..


ويكون قائد الرابطة في منتصف الملعب ..!


بعد التقسيم هذا يختار قائد الرابطة الله يوفقه من الأهازيج اللي يسهل ترديدها ويكون فيه تجديد بالأهازيج !!



وبهذي الطريقة لما تنتشر المجموعات كذا وقائد الرابطة يبدأ بأهازيجه والمجموعات تردد معه نقدر نضمن


وقتها إن 80% من الجمهور ســيــتــفــاعــل !!!




أتمنى إن هالأفكار تجد القبول والاستحسان و(التطبيق) .. وإلى اللــقــآء في مواضيع قادمة ،،،









قفلة


الهلالي يوم يهاجم يشعل الملعب حريقه .:. ويتلاعب في خصومه وياهجومه من يصدك

والهلالي لا لعب والذهب يلمع بريـقـه .:. ما لها إلا هلالها ويا هلالي منهو قـدك
.
.