[مغاط]

عندي سؤالين :/



السؤال الخامس : هل تتوقعون إن الشيء اللي يعاني منه وسطنا الرياضي هو باختصار : " قل دبره " ؟!

السؤال السابع : هل حنا واقعيين إذا قلنا .. إن ما فيه " عقول " يمكن الاعتماد عليها للتخطيط السليم في مجتمعنا الرياضي ؟! طيب وين (هالطبقة الفكرية) وين المتعلمين و الاجتماعيين !! عن المجتمع الرياضي اللي يحوي أهم شريحة اجتماعية ؟!

السؤال الأول : هل أنت من اللي .. إذا سمع مسؤول رياضي .. يقول " خططنا وفعلنا وتركنا " .. تطلـّع لسانك وتقول " إي هيّن " !!

السؤال الأول مكرر : كم نسبة اللي يطلعوّن لسانهم إذا انسألوا السؤال الأول ؟!

السؤال الثالث : من اللي ساكت عن " القطاعات البنكية " و " الصناعية " إنها ما تشارك .. رياضيا و اجتماعيا ؟!

السؤال التاسع : وين مكمن الخطأ والبربسة في " قناة الزعيم " ؟!

السؤال الثاني : لو تقابل كالديرون ؟! وش راح تقول له ؟!



** خلوني أقول لكم هالسالفة اللي حدر .. ثميّن نجاوب سوا على السؤالين اللي فوق !!


--------------------------------------------
--------------------------------------------



* منول .. على أيام النادي .. كانت أطلق لعبة عندنا " القوى " !! لا و من زين الطبايع كنا نسميها " سباق " !! ولا أدري وش السبب اللي مخلينا نسجل كلنا بهاللعبة ؟! يمكن عشانهم سامحين لنا " نتسابق حافين " !!
اذكر كان فريقنا " القوى" يجي لهم أكثر من (40) راس !! وبداية كل سنة .. كانوا يصرفون للاعب ( 300 ريال) تقريبا !! عشان يشتري بها ملابس ومستلزمات !! وكنا نسمي هالورقة " ورقة لباس " !! وكانت الـ300 كثيرة !! فكنا نتورط بها !! واذكر مرة شريت " فنيلتين " وسروايل !! طبعا (كنادر) ما به أمل !! المهم بقى أكثر من 150 ريال !! وأناظر قلت يا ولد لازم أحلل الورقة !! قلت يا صديق بكم هذا ؟! قال الهندي : " مضرب التنس ؟!" وإلا " الطرمبة " ؟! قلت كلهن !! <<-- يا شين اللي ماله هدف بالحياة !!
وجابهن لي وحاسبت والظاهر بقى 30 .. وشريت بها " كاس صغيّر " وسوينـّا به (دوري) أكثر من 19 مرة !! لا ومن زين (التسوّق) كان "المضرب" حق تنس أرضي !! يعني ما أدري وش دخـّل أمـّه هو الطرمبة .. بألعاب القوى !!


كنا نجي للنادي .. لابسين التكميلة تحت الثوب .. وإذا وصلنا " الثيـّل" حق الملعب .. فصخنا ثيابنا على خط الآوت .. وخذ يا مطاير على الملعب اللي تيبس خشة الواحد !! وكنــا فاهمين التنظيم الإداري غلط .. وحاطين لنا " كابتن " ولا درينا إنه مهايطي !! فكان يهرول معنا وهو ملزّق شطرطون على كتفه الأيمن !!

اذكر مرة كان عندنا سباق تصفيات للصعود على مستوى المملكة .. ومخلينا نعسكر بالنادي !! يوم جاء المغرب جينا كلنا وتورطوا بنا ما يدرون وين ينومونـّا !! اذكر جاء سكرتير النادي ( طبعا سكرتير النادي منول لو يبي يفصل اللاعب فصله زي السلام عليكم ) !! المهم إنهم جمعونا ودخلونــا غرفة (البلياردو والتنس) وقالوا لنا : يالله همتكم يا شباب !! المهم شلنا الماصات .. وزحفــّناهن بالزوايا .. وفرشوا لنا زولية بالنص وقالوا نوموا !! بس كان شعور جميل إنك رايح في مهمة لتمثيل الكيان اللي تنتمي له <<-- ترفقّ يا "هادي صوعان" !!

واذكر كان سكرتير النادي ..ماسك عصا البلياردو ويقول ابطفيّ النور .. وابرجع لكم بعد ربع ساعة !! خلوني ألقى أحد قايم !! وحنا ساكتين .. إلا " كابتن الفريق" كان كل ما قال شي السكرتير !! قال : شفتوا ؟ .. هماي قايلن لكم !! والظاهر إنه حوّم تسبد السكرتير .. وناداه برّا الغرفة .. وسمعنا صوت " لزخة قوية " ثمين مزاعق واحد يقول "والله ما أتعوّد لها" !! ومن الروعة نمنا كلنا ولا ندري وش صار عقبها !! بس اللي اذكره إن كبتنـّا ترك عنه الفهامة الزايدة !!

عاد هم قايلين ترانا نبي نقوّمكم تسع الصبح .. عشان تفطرون فطور خفيف .. وتتمرنون زين .. المهم قومونا لصلاة الفجر .. وعيـّا يجينا النوم !! <<-- بحلوا بنا !! المهم يوم جت ثمان وحنا قاعدين نناظر بعض وحسيت إنهم بلشوا بنا !! راحوا جابوا لنا ( تميس و قلابة وعدس ) وفرشوا لنا سماط بالمضمار وأفطرنا !!

عاد تعرفون التميس والقلابة خفيفة على البطن !! واقترح السكرتير .. إن التمرين يكون بمدخل الديرة .. عشان نطلع من جو الروتين !! و نحسّ بالمسؤولية !! <<-- اللي يشوفه يقول يبي يودينا لتونس مع الفيصلي !! المهم قرروا إنهم يشيلونا على (رديّن) يعني دفعتين .. وطلعونا براّ النادي .. بزعهم تمرين في " الفضاء الرحب " !! المهم قالوا لنا أمسكوا (خط الخدمة) أي واحد يطلع على الشارع العام نبي نرجعه للنادي ولا هوب مسافر معنا !! <<-- لأنهم ما ضمنونا عقب القلابة !! المهم كان معنا (المدرب) و(السكرتير)و (سواق الباص) .. و كان المدرب جاي على سيارته كرسيدا بقس !! المهم فصخنا ثيابنا ونعالنا وحطيناها بالشنطة ولبسنا " شورتات صغار " !! على فكرة .. كنـّا نسمي الشورت " هاف" ما أدري هالتسمية موجودة والا لا ؟! <<-- كمل ولا يكثر !! وتجمعنا مع بعض .. واقترحوا يجيبون لنا دورية تمشي ورانا .. عشان ما يجي أحد يدعسّنــا !! <<-- سباق هجن مهوب تمرين ؟!

وكان معنا واحد ما علـّم أهله إنه مسجل بالنادي .. واذكر منول عيب اللي يروح للنادي !! فما بالك اللي يلبس " هاف " !! المهم إننا بدينا نهرول حنا وسيقانــّا !! وكل واحد يالله يشوف الثاني من الدوخة بس نجامل !! يوم قطعنا لنا كيلويّن تقريبا !! إلا يوم لمح خوينــّا اللي مسجل (بالسر) سيارة أبوه جاي لمنـّا !! قال تكفون من معه (سروال طويل) ؟! وكان معنا واحد مطوّع فكان هو أزينـّا وكان لابس سروال سباحة !! بس ماش أبو الرجّال وصل ما عاد يمدي !! المهم الشايب رقى الرصيف وجاء لمنــّا !! وطلّع راسه مع القزازة .. وقال : أمش يا الهيس الأربد !!.. حسبته لمـّي .. قلت أنا ؟! قال أنت أنطم لا أجيك !! وأثر ولده وراي يحاول يجرّ الشورت عشان يغطي الركبة ولا أمداه !! قال طيب بجيب ثوبي من شنطة المدرّب !! قال أقول أركب .. لا أحوّل عليه واشيلك مع شوشتك !! وركب خوينـّا بالصندوق !! وشفناه يوم جينا من " البطولة " وهو يعرج وفيه رضوض في الساق وأصابع يديه الصغار مكسّرة !! بس يقول لنا : إنه زالق في الدرج مهوب من أبوه !!

** الشاهد إننا بذيك البطولة أخذنا : الثاني على مستوى المملكة !! وحنا (حافين) ولا (برنامج غذائي) زي الناس !! ولا (فكر رياضي) ولا هم يحزنون !! أضف إلى ذلك إن ( قل الدبرة ) المذكور أعلاه كان حاضر !! وكلن يتفلسف !! بس لا أخفيكم يمكن مهوب من ( زين فريقنا) !! ترا أحيانا من (غباء غيرنا ) !!

- إلا على فكرة : صدز منتخبنا .. الثاني آسيويا ؟!

--------------------------------------------
--------------------------------------------

- نرجع للسؤالين !!



تدرون إن الجواب المشترك لكل ما ذكر أعلاه هو :
( سوء في التخطيط !! وسوء في الإدارة ) !!



* فـ ( قل الدبره ) !! يحدث إذا كان من يفرض (الأسماء) ويرّشح (الأشخاص)لتطوير المجتمع الرياضي ، فو من (عاث به فسادا ) بقصد أو بدون قصد!!

* (الطبقة الفكرية الراقية) .. لن تتجرأ على التوغل في (حقول الألغام ) ولن تقفز (الأسلاك الشائكة) التي تعتري طريق كل من وطأت قدماه هذا المجتمع الرياضي !! إلى أن يكون هناك ( قانونا ً ) و ( هيئة رقابية ) تحميهم من (أذى المتفيهمين) !! " ألم أقل لكم إن سوء التخطيط حاظرا " !!

* ولا (تشرهوا) حينما (يمدّ الرياضي) لسانه .. " متهكما وساخرا " !! حينما يسمع (جعجعة) ولا يرى (طحينا) !! " ألم أقل لكم إن سوء الإدارة حاظرا " !!

* و بما أننا (مجتمعُ أشخاص ٍ) فلن نحرّك ساكنا !! ولن يلقي (قطاع البنوك ولا الصناعة) بالا ً لأي محاولات ِ استجداء إلا إن كان هناك (مصالح ُ شخصية)!! فكم من (المليارات) تتكدس في خزائن بنوكنا وشركاتنا !! ولا لوم !! فكيف نلومها !! وهي ترى (بدائية قرارت مجتمعنا الرياضي) !! وتخبطات مسؤوليه !! وارتجالية آدائه !!
تخيلوا لو أن هذه (البلايين) بدل التصاقها بجدران ِ حافظاتها !! أن تسهم في بناء (شاب ٍ) سعودي !! عجزت " رعاية الشباب" عن تحقيق متطلباته !!
لا نريد إسهام هذا القطاع .. بطريقة ( خوذوا !! ) نريد عقول أصحابها !! بأن يجلبوا لمجتمعنا الرياضي ( شريكا ً يساعدنا في جدولة دورينــا المخجل ؟!) وتنظيم توافدنا لملاعبنا بطريقة "الحجوزات السابقة لمقاعدنا الأسمنتية" !!و يجلبوا لنا (شريكا يمتص حنق الشباب الذي يفرغونه بلـيـّات الشيشة و "طارات الكوامر" !! .. وأن يستشعروا أنما يقدموّه سيجنيه الوطن قبل هذا الشاب المغلوب على أمره !!
نريدهم أن يجلبوا شريكا (في كل مواطن الخلل "وما أكثرها") !!
- الأمر برمتــّه لا يحتاج سوى(بضع محاولات ٍ من أناس ٍ يتحدثون بعقولهم !! ويحملون همــّــا ً لوطنهم ) !! وإن انتفى هذا (العقل المتحدث) فلا ترجوا (من هذه البنوك أو الشركات ) مصافحة ً !! " ألم أقل لكم إن سوء التخطيط حاظرا " !!


* ولا يغضب (الشابّ) على وجه العموم و (الرياضّي) على وجه الخصوص.. ويكدر صفو سماه .. سوى الاستخفاف بعقله!! ومحاولة استنزاف كل ما يقبع في محفظته !! كونوا (مصاصيّ نقود ٍ) لا يهم !! ولكن (احفظوا كرامة عقولنا) !! أتريدون الارتقاء وأيديكم في جيوبكم ؟! هل شكلتم فريقا يعيد " رسم طريق قناة الزعيم من جديد أيها (الآرتيوّن الأعزاء) ؟! أم أنكم استندتم لمقولة : (رضى الناس غاية لا تدرك ) !! وجعلتوها لكم " غطاءا ً " تخفون به (شخيركم المزعج ) .. وأنفاسكم (الخانقة) !! فلن يوقف كيلكم بمكيالين !! سوى ( منافس ٍ) آخر !! وستعلموا حينها أن من قال " اتق شر الحليم " لم تكذب يوما !! " ألم أقل لكم إن سوء الإدارة حاظرا في كل خلل " !!


* لم يزعجني (تصريح كالديرون) مطلقا !! ولو وجدته في أحد شوراع (الهنداوية أو الفوطة .. أو حيث يتواجد مع أصحابه من أبناء الشعب !! ) لشكرته !! ولحيّيته ( لجرأته الساذجة ) أو (لسذاجته الجريئة ) !! ولا غرابة .. فحينما ( تسلم عقلك لحثالة القوم بأن يتلاعبوا به .. فهنيئا لك بقمامتك التي تعلو كتفيك ) !! وسبب شكري للسيّد كالديرون الأرجنتيني الأصل .. (الشعبي الهويّة) وما أكثر (الشعبيّين) الذين يأكلون من خيرات هذا البلد !! و وجدوا في (غياب الرقيب ) متنفسا ً للإساءة له !! فلا تلوموا ( الشعبيين ) !! لأنهم لم يجدوا من يقف لهم بالمرصاد !! وهم من حيث لا يعلمون !! أيقظوا فينا ( حميــّة الالتفاف حول هذا الكيان المعطاء ) فنحن كـ(سعوديين أولا ) و (هلاليين ثانيا ) !! ما نحن إلا ( صهارة و حمما ً بركانية ً ) تتطاير في وجوه كل من حاول (المساس) (بوحدة هذا المجتمع المتمازج ) !!
فإن كان ( الرقيب ) يغط في (سباته) ( ووكيل الرقيب) قد سبقه لذلك .. فنحن لمن ( لقنــــّـك هذه الكلمات ) مستيقظون !!