[معزوفة الأنامل]

تحية لكل عشاق الهلال الكرام اللذين وان اختلفوا في منبرهم ومدرجاتهم في بعض الاراء الا انهم يتفقون جميعا على الحب والولاء لهذا النادي العظيم.. العنوان واضح ومايحتاج مدخل او تفصيل .. ثلاثة اشياء يضمن توفيرها الامير عبدالرحمن اضمن له البطولات من اطرافها بعد توفيق الله!

اول الاشياء المطلوبة وهي خارج الملعب يعني "شغل ادارة" وتتلخص في البعد عن تدليع اللاعبين من اصغرهم حتى اكبرهم! تعطيهم رواتبهم يابو مساعد اكيد .. لكن بعض الامور وانت تعرفها واعتقد انكويت منها الموسم الماضي اتمنى انك تبتعد عنها لمصلحة الهلال!! وصدقني ياسمو الامير متى اللاعب مااخذ حقه يعني لا افراط ولا تفريط بيعطي وهو ضميره واللي مايعشق الهلال للهلال فلا حاجة للهلال به!!

نأتي للشئ الثاني وهو داخل الملعب بالتاكيد .. قتال في الملعب من اول دقيقة الي آخر دقيقة .. اصطدمت الكورة في العارضة .. مسكها الحارس .. ضربات جزاء ضاعت .. نلعب بروح قتالية حتى اخر قطرة عرق والتوفيق بيد الله لكن اقل شئ نطلع مرفوعين الراس ولا تتكرر مسرحية ام صلال!! هذه القتالية موجودة في قلب كل لاعب هلالي لكن للاسف بعض الاحيان "تنام" ومحتاجة مين يصحيها ومافي احسن منك ياسمو الامير يقوم بهالمهمة والباقي انت تعرفه!!

نأتي للامر الثالث ويمكن يكون اختصاص فني! لكن لا اعتقد بان هناك مدرب في العالم يطلب من اللاعبين الاستعراض حتى لو الفريق متقدم بأربعة .. اضمن لي ياسمو الامير ان كل لاعب يلعب بلمسة واحدة وتتخلص الكورة في المرمى اضمن لك بطولاتنا المحلية ومعها الاسيوية بعد توفيق الله.. بالمختصر المفيد اللاعب الفردي اللي يبحث عن "الشو" مكانه في الحواري وليس في الهلال مهما كان اسمه!!

ختاما ياسمو الامير من اجل موسم تتطلع له جميع جماهير الهلال العاشقة: وقف الدلع .. واحيي القتالية .. وطالب باللعب من لمسة واحدة!! ثلاث مطالب رئيسية نتمنى ان يعيها كل لاعب هلالي يتشرف بإرتداء شعار الزعيم هذا الموسم والمواسم المقبلة بإذن الله.. والله يرعاكم

ضربة قاضية
اسامة هوساوي كشف من كان يتحجج ويتعذر بطرد كوزمين .. صحيح انظلمنا بطرد كوزمين لكن مو لدرجة الانبطاح امام ام صلال في تلك المسرحية.. على اي حال هو درس نتعلم منه والحياة دروس!