[*الخبير*]

أولاً هارد لك لكل الزعماء..والقادم أفضل..

الهلال يمرض ولايموت حاله كـ حال الأنديه الكبيره..

بصراحه الهزيمه يتحملها المدرب ليكنز .. مدرب ما أقتنعت به من يوم شفت تنظيمه للفريق وتصريحاته الفاشله..

مدرب وجهه بارد ولا يصلح للزعيم .. وإذا تبغون تشوفون إنه مدرب فاشل شوفوا التنظيم السيء للدفاع وعندي دلايل أولها من مباراة الأهلي الإماراتي في الرياض والثانيه من مباراة البارح..

في مباراة الأهلي لو طالعنا هدف أحمد خليل بنشوف التنظيم السيء للدفاع لأن الكوره كانت في قلب دفاع الهلال واللي كان موجود لحاله في قلب الدفاع القنبله الموقوته مثل مايقولون صحيفة الجزيره "محمد نامي" وفي مباراة البارح محمد نامي في وحده من الكرات الشبابيه في الشوط الثاني كان ظهير أيسر ..

المدرب الناجح أول ما يبني الدفاع .. لكن ليكنز وما أدراك ما ليكنز الشباب متقدم بثلاثه ومحتفظ بالبدلاء وأول تغيير محور الهلال خالد عزيز وألحقها بالتايب وويلي..
يعني مدرب غبي .. كان المفروض يطلع سول ونامي وينزل الشلهوب والعنبر.. ويوجه أسامه ورادوي بتغطية مكان نامي..ويحتفظ بالتايب وويلي للضغط على الشباب وإضافة هدف أو هدفين تريح الفريق في الإياب..

عموماً قدر الله وما شاء فعل فالشباب جهز للهلال فرصة التعديل حينما أخرج كوماتشو لكن مع ليكنز مش حتقدر تغمض عينيك..طالع في وجه العنز وأحلب لبن..

الشي اللي قهرني اليوم صحيفة الجزيره وتحديداً أخونا في الله "عبدالكريم الجاسر" يقول في تحليله للمباراه فاز الشباب لأن في دفاع الهلال قنبله موقوته إسمها "فهد المفرج" إنفجرت في وقت حساس <<< والله شكل عيونك اللي إنفجرت وما عاد تشوف ياعبدالكريم ..
الرجال يقول صنع المفرج الهدف الأول لعطيف حينما شتت الكره بطريق الخطأ وصنع الهدف الثاني لكوماتشو .. وياليت على كذا الرجال يقول بعد إن الهدف الثالث للشباب إن عبدالعزيز السعران سحب فهد المفرج<<<< يآخي خاف الله وتابع صح ..
الصحيح إن الهدف الأول صلحه للشباب سول بطريقه غبيه كان بإمكانه السير بالكره وتمريرها أو تشتيتها بطريقه أفضل...واللي سحبه السعران رادوي ومعذور رادوي لأنه يحاول يرقّع نكبة نامي وياعبدالكريم لاتفلسف علينا ترانا متابعين المباراه زين ..

المهم ياجمهور الهلال محمد نامي هو المشكله في الدفاع إضافه للتنظيم السيء من ليكنز لمدافعيه .. الرجال جالس في الإحتياط ويوزع إبتسامات..وينك ياللي طول المباراه على الخط وتوجه لاعبينك .. ولو يخطي لاعب على طول برا والمباراه الجاييه إحتياط .. الله يرحم أيامك يا كوزمين ..

سول مجتهد في الهجوم ولو رجع للدفاع جاب العيد .. أمس في الشوط الأول في كوره في الظهير الأيمن المفروض يشتتها وأبوالشباب بيسحب .. وتقطع من السعران ويعدي من واحد ويسددها على مرمى الدعيع وربي رحمنا بعد ما لامست الشبك الخارجي.. مثل هـ الكوره لو مدرب صاحي موجود كان طلع سول وتوطى في بطنه .. المشكله إن العلاقه بين سول ومدربه هي برودة الوجه الله لا يبلانا..

المهم نتمنى من ليكنز المباراه الجاييه يلعب بنفس التشكيل ويطلع نامي برا ويحط بداله حسن خيرات ظهير أيمن .. أقل شي حسن مهاري ومقاتل ويعرف يرفع مهوب مثل أبوفرامل نامي..ومطلوب من ليكنز يلعب بالصويلح والعنبر والشلهوب من البدايه وسول إحتياط الله لا يبارك فيه كثير حركه قليل بركه..

أتمنى من إدارة الفريق تجهيز الفريق بصوره جيده للإياب .. وترى بالعنبر لحاله مهاجم معطين الشباب هدفين ومضيعين بلنتي .. يعني ماهي صعبه على الهلال لو فكونا من ليكنز..

بعدين ياجمهورنا الحبيب ليش مستلمين ياسر .. ترى الكرت الأول اللي خذاه غير مستحق .. والرجال يمر بظروف لازم نكون عون له ماهو فرعون عليه..

ثاني حاجه الدعيع ما يتحمل الأهداف الثنين الأولات أبد أبد..تصويبات في الثمانيات.. واللي يتحملها المحورين العزيزين ..

عموماً نتمنى أن يتوفق الهلال بمدرب حريقه ووجهه مهوب بارد .. وللزعيم رجعه قويه الموسم القادم صدقوني السنه الجايه سيطره هلاليه على البطولات لا تتضايقون فالظروف اللي فيها الهلال من صنع الإتحاد السعودي المحابي لغير الهلال .. وهذي عوايدهم كل سنه .. لكن راح يخدمون الهلال ويجيب مدرب أطلق من كوزمين.. وبالتوفيق للزعيم ..

دمتم زعماء,,