[ولد خالي مثنى]

بسم الله الرحمن الرحيم

المرسل / شخص عاشق للهلال
المستقبل/ جمهور الهلال العظيم

انتهت مباراة الهلال والأهلي الإماراتي بخيرها وشرها الحمد لله بفوز زعيمنا الغالي بأداء أشوف انه كويس ويعتبر أفضل أداء لنا في بطولة آسيا هذا الموسم..
كان هناك لقطتين في المباراة اعتبرها خيالية حبيت أتكلم عنها في موضوعي وبعض المواضيع الصغيرة اللي حبيتا ناقشها معاكم :-

الأمير عبد الرحمن بن مساعد

هذا الشخص ما راح نوفيه حقه ياهي لقطة في المباراة عند تنفيذ ضربة الجزاء اللي نفذها رادوي اللي يشوف صورة عبد الرحمن بن مساعد وهو خايف وكان يدعي ربه المفروض اللقطة هذي يوم يجي ليكنز يشرح للاعبين أخطاء المباراة مايو ريهم الأخطاء يوريهم اللقطة هذي لأنها مغنية عن كل شي وراح تبين للاعبين انه في رئيس نادي يتساهل منهم كل تعب وجهد داخل الملعب .
الله يخليك لنا ياسمو الأمير أنت وأعضاء شرف الهلال اللي هم خلف سر زعامة هلالنا ولا يهون جمهور الهلال العظيم.

ياسر القحطاني

الكبير يبقى كبير وما راح أتكلم عن ياسر او امدح في اداءة لمباراة امس لان أبو سعيد عودنا على المستويات الرائعة وظهوره في أوقات الحسم . لكن سبب حديثي عن ياسر هي لقطة في المباراة يوم شفتها تأكدت إنشاء الله إن الهلال راح يفوز . وهي لما ياسر حب يناول الكورة والكورة صدمت في الحكم والله يا أبو سعيد صرخ صرخة وانفعل قلت بس راح الحكم فيها.
لما شفت الصرخة هذي والحماس اللي عند ياسر تأكدت انه راح يسوي شي والحمد لله من كوره ميتة سوى فيها ياسر حركة حسيت المصور ضاع فيها يدور الكورة.

جمهور الهلال الكبير

أتمنى من الجمهور اللي حاضر أمس في الملعب واللي يكتبون في المنتدى أنهم مايلومون أي أحد من الجمهور الغير حاضر بسبب انه فلنفترض انه لكل احد منا ظروف تمنعه والحمد لله المباراة عدت بخيرها وشرها وبإذن الله سبب غياب الجمهور أمس هو استعدادهم لمباراتنا مع نادي الاتحاد (الله الله بالحضور) وجمهور الهلال عمره في أوقات الحسم مايقصر.

مد رب الهلال ليكنز

أنا عارف انه بدري الحكم عليه ولكن المباراتين الماضية بصراحة كشفت عيوب في المدرب لازم يتلافاها بسرعة وهي انه بصراحة قراءته للمباراة دائما ماتكون متأخرة وأمس رغم أن التايب مستواه مش ولابد بس الأفضل كان انه يطلع التايب ويدخل الشلهوب أو الفريدي لان الأهلي الإماراتي أمس كان عبارة عن هجوم ودفاع وسطه ضايع واتضح الشي هذا بعد خروج التايب قلة خطورة الهلال واضطر ياسر يرجع لنص الملعب يستلم كورة ويسلم.
الشي الثاني اللي يعيب المدرب انه هادي ومايقوم ويوجه اللاعبين.
ياجماعه كلنا نذكر كوزمين كنا نسمع صراخه حتى اللي بالتلفزيون يتفرج يسمع لانه المدرب اذا قام يوجه سواء بتكتيك معين أو حتى يشد من أزر اللاعبين. يعني المفروض أمس بعد لقطة نامي انه يوجه بعتاب بسيط ويرفع معنوياته مو جالس ولا تظهر منه أي ردة فعل.

نقاط متفرقة

•التايب مستواه هذا الموسم في انحدار ولايزعل محبو طارق فطارق تمريراته أصبحت اغلبها مقطوعة وأصبح يميل للاستعراض ولعب الكرات الصعبة بأوقات حنا في غنى عنها لكن بإذن الله ابو نادين يرد علينا في مباراة الاتحاد.

•ولد الشمشون أمس كبير بصراحة ماقصر ماغير يقول للاعبين سجلوا وإنشاء الله يفطر في مباراة الاتحاد.


•خالد عزيز وش أقول وش اخلي قسما بالله انك كبير.

•المرشدي لازم يراجع ينفسه أمس سوى أخطاء بدائية مايسويها أي مدافع ولازم يدعي بسلامه أبو دعيع.


•عبد الله الزوري مستوى ثابت ماشاء الله ويارب يستقعد لابو شروان المباراة الجاية إنشاء الله.

•اسامه هوساوي فديتك ياولد مكه ياليت اللي بجنبك تعلم شوي كيف يكاتف ويعرف متى يتزحلق على اللاعب.


•نامي (لا تعليق)

•يارب تعطى فرصة لفهد سرور والله حاس ذا اللاعب لو دخل يبي يسوي شي خاصة في مباراة الاتحاد.


•وش قصة المدربين مع الشلهوب والله حرام جلوس الشلهوب بالشكل هذا في الاحتياط لازم يعطى فرصة تكفى باليكنز.

يارب وفق هلالنا في مباراة الاتحاد

إلى اللقاء

وأتأسف على الإطالة

أخوكم / ولد خالي مثنى