[أبـو زآيـد]

بسم الله الرحمن الرحيم




نواف الهلالي يعود لكم من جديد





طبعا مبرووك الفوز لكل زعيم على وجه الأرض






لكن يا جماعة الخير .. مشكلة هالفوز إنه ما جاء إلا بعد ما طلعت روح الواحد


واحترقت أعصابه .. وبعد مسلسل على ما يقولون الكرات الضائعة .. حتى والله


البلنتي إن الواحد تشاءم أعوذ بالله من كثر ما ضاعت الفرص بس الحمد لله


إنه جاء هدف .. وإن شاء الله ما يضطرون الشباب للعب بأعصابنا مره ثانيه





مع إنه إذا جينا للواقع يا شباب بصراحه الفريق الإماراتي فريق ( ضعيف ) وواضح


عليه الارتباك وعلى مدافعينه بالتحديد .. لكن حنا ما استغلينا هالنقطة !!




طبعا عرفتوا جواب السؤال في عنوان الموضوع


الأعصاب << تقدر تمسك أعصابك وتحترق بعض المرات مثل مباراة اليوم


لكن ما نشوفها << ذكي الولد




طيب يا شباب .. من اللي سمع تصريح الأمير عبد الرحمن .. والله إنه ما كذب !!


يعني إذا كان الإتحاد الآسيوي ما يبي يحسب لنا بلنتيات يعلمنا عشان نحسب حسابنا


لكن قسم بالله إنه أعجبني ( الذيب ) أبو عبد الله يوم زعق بوجه الحكم والله إنه مقدي


عاد لا تحسبون اللي سواه سامي كله عصبيه !! لا الولد يبي يعطي الحكم ( تكه ) عشان


ينتبه لنفسه وقراراته .. وفعلا والله أتوقع لولا إنه شاف أنياب الذئب بارزةً ولا كان يمكن ما حسب البلنتي !!




طبعا من ناحية مدربنا البلجيكي العجوز << مع إني عندي عقدة من المدربين الشيبان


لأنهم الله يهديهم يابسة روسهم يعني إذا حط براسه لاعب خلاص .. يا تشوفه يسنتر


كل مباراة !! يا ما عاد أنت بـ شايفه أبد لكن من ناحية مدربنا هذا يعني تونا على الحكم


عليه هذي ثاني مباراة وإن شاء الله إن بوادره بوادر مدرب جيد !! لكن فيه نقطه موجعه


راسي وفاقعة مرارتي وهو يا جماعة الخير ليش ياسر دايم لحاله ؟؟ ليش ما نصير


أكثر شجاعة وأكثر جرأة ونلعب بمهاجمين !! خصوصا مع الفرق الضعيفة هذي !!



يعني لا نصدق ترا تونا ما بعد قابلنا أفرقة اليابان وكوريا وغيرهم .. يعني من وجهة نظري


إذا حنا نبي ننافس ونلعب صح ونوصل للنهائيات لازم الفريق يتعود على اللعب بمهاجمين




طيب .. يجيني المدرب الحين مثلا ويقول والله يا نواف جاز لي هالرأي << والله وصدق عمره الولد


بس يقول ما عندي ذاك المهاجم اللي يستاهل إنه يمسك الخانة !! أنا أقوله لا !! المهاجم موجود !!




لكن المهاجم هذا يحتاج إنك تعطيه فرصه .. يعني حنا نعرف إمكانياته زين ونعرف إنه مشاغب ومزعج


وهداف لكن يحتاج إنه ياخذ فرصة عدة مباريات مثل ويلي وسيول وغيرهم وتبي تشوف وش يسوي


ماهب نخليه يلعب عشر دقايق بعدين نطلع ونقول اللاعب انتهى واللاعب لازم ينسق واللاعب مدري وش فيه



فأنا أقول : عطوا أحمد الصويلح فرصة مثل الفرص اللي عطيتوها ويلي وسول وأنا وكثير من الجمهور نراهن عليه !!





بالنسبة للشباب اليوم أعتقد إنه خانهم الحظ كثير وإلى الآن وحنا ما لقينا حل لمشكلة إضاعة الفرص


لكن أعيد وأقول إن اللعب بمهاجمين من ضمن الحلول الناجحة !!




طبعا اليوم شاهدنا المحترف الكوري سيول وشلون أبدع ما شاء الله عليه .. وبصراحه أنا من ضمن


الذين انتقدوا سيول في مواضيع سابقة انتقاد ( لاذع ) للأسف لكن في مباراة اليوم


كنت متوقع إنه يسوي شيء وكنت أقول لرفيقي قبل المباراة إني أتوقع إن سيول اليوم يبدع


ورفيقي توقع إنه يصنع هدف وفعلا صدقت توقعاتنا ..



حتى ياسر اليوم .. والله عيني عليه باردة أبو سعيد .. تحرك واجتهد ولعب بحماس وروح وحاول


وسجل وسبب البلنتي .. يعني بصراحه ما قصر وأعاد لنا ذكريات ياسر القناص اللي نعرفه ..


يعني سيول اليوم إلى جانب ياسر هم نجوم المباراة بلا منازع




باقي اللاعبين .. بالنسبة لأبو عزيز على اعتبار إنه عائد من إصابة يعتبر قدم مباراة جيدة جدا بعكس ما شفته


من بعض الآراء .. يعني ما قصر وأعتقد إن هالمباراة خير تجهيز له حتى ( يدوخ ) نور المباراة الجاية




وبالنسبة لنامي .. المشكلة ماهي في إنه زلق .. فهذا شيء دايم يصير والمفروض إنه غيّر وأنتم بكرامة البوت


لأنه زحلق عليه كذا مره في المباراة .. لكن المشكلة في نامي .. هو من وجهة نظري عنده مهارات وعنده لعب


وما ضمه الداهيه بوسيرو عبث .. لكن مشكلته مرتبك ( ومتردد ) في كل شيء !! يعني اللاعب لا هو متقدم


للهجوم ولا هو راجع للدفاع وإذا وصلته الكوره لا هو اللي يبي يناول ولا هو اللي يبي يسحب وإذا تقدم لا هو اللي


يبي يرجع ولا هو اللي يبي يرفع ولا هو اللي يبي يشوت << يعني ما أدري وش الموضوع بالضبط


يعني أقول وقالوها محللين كبار قبلي : اللاعب الممتاز هو اللي قبل لا يستلم الكوره يحدد من اللاعب اللي يبي


يناوله إياها !! يعني مو إذا استلم الكوره وضغطه الخصم راح يفكر وش يسوي !!


عشان كذا أنا أقولك يابو نامي أنت لاعب جيد بس اركد شوي وركز الله يرحم والديك وفكر كيف تبي تلعب الكوره


قبل لا تاصلك




نجي لماجد وما أدراك ما ماجد << يا سلام يا سلام نجم الخليج وأمل الدفاع الهلالي .. ما نبي نقسوا عليه


فاللاعب راجع من إصابة ويبدو إنه في حاجة لزيادة المعدل اللياقي وإن شاء الله إنه يشد حيله مع أبو حسيني


ويرجع لنا ماجد اللي نعرف .. ونفس الكلام اللي قلت عن عزيز أقوله .. يعني كان لابد أن يلعب ماجد هالمباراة


عشان ما يطب مره وحده مباراة الإتحاد وهذي أظن إنها وجهة نظر صائبة من المدرب .. ولا أظن إنها مغامرة


على اعتبار ضعف الفريق المقابل .. اللي لولا إن الحظ خذلنا وإلا كان حسمناها بدري !!




ويلي : من بعد بلنتي الشباب وأنت منت ويلي اللي نعرف يعني والله افتقدنا الأوفرات الرائعة والسرعة


وحرث الملعب .. حتى إنهم يقولون إنهم كانوا يشوفونك بكل الكاميرات اللي بالملعب بوقت واحد ما شاء الله << شكله بيعطيه وحده من حقات نحيتان




طارق : اللي يستفسر عن سبب نزول مستوى طارق .. طبعا طارق معروف منهو طارق ومعروفه كور طارق


أنت وضميرك .. لكن أعتقد إن الإدارة أخطأت في الإعلان عن صفقة نيفيز !! << وجهة نظر مختصرة




أما الدعيع وهوساوي << يبقى هؤلاء العمالقة مستوياتهم ثابتة الله لا يضرهم ..



الزوري .. رادوي .. الخثران .. أبطال وما قصروا ويشكر رادوي على الهدف وأتمنى إنه يكون هو اللي يشوت


البلنتيات دائما لأنه لابد أن يكون لاعب واحد هو المتخصص بضربات الجزاء






طيب بالنسبة يا شباب للمباراة الجاية مع الاتحاد .. أنا والله متفائل بقووه وزاد من تفاؤلي إن الاتحاد يلعب بفرصتين


لأنه اللي يلعب بفرصتين كثيرا ما يجي له ( ربشه ) يعني يابو قرني ردد ( الاتي لا لعب .. جاب لنفسه ربشه






--------------------------




برا الموضوع



بعض الشباب يقولي ليش تكتب بالأسلوب هذا وكأنك بدردشة .. يعني ليش ما تكتب بلغة عربية فصحى


وبطرح أشبه ما يكون بـ رسمي !! أنا أقول وأعوذ بالله من أنا هذا منتدى وفيه قرابة النصف مليون عضو


والله يزيدهم وتختلف الأذواق .. يعني ما هو لازم إذا جيت أكتب الموضوع إني أفتح حصة تعبير وأقعد


أعبّر .. يعني ما شاء الله المبدعين كثير في الشبكة ويمتلكون من الفصاحة والأسلوب شيء ما هو عند كل أحد


لكن بعض الناس لا والله .. يحب الأسلوب البسيط اللي ما فيه تكلف وتاصل له الفكرة أحسن من إنه يقرا


موضوع تلقاه المسكين كأنه قاعد يفك شفرات ولا أنا غلطان ؟؟ وش رايكم ؟؟

إقتباس الرسالة الأصلية كتبت بواسطة عاشق حمد الصقور إيه نعم غلطان

^^^^ خير إن شاء الله وش دخلك أنت بالسالفة أنت ووجهك يا مندس


لا وعاشق حمد الصقور من زين الدبرة
























أمزح يا جماعة لا تخافون العضو هذا ملفق تلفيق ما هو موجود صدق





أهنيكم على الفوز مرة أخرى وعقبال ما نهني بعض بالبطولة يوم الأحد بإذن الله








قفلة :


ربشة على الأهلي وربشة وخسارة .:. يوم آسيا تفخر بحضرة زعيمها

ومن بعده ( الاتي ) يذوق المرارة .:. وياخذ من الربشة بلاها وعظيمها
.
.