هنــا سـاحــة المعـركــة... ( لاتدخل الا والعجرا معك )
حيــــــــاكم
ابوي وعمي
هلاليين بدرجة تعدّت جميع الحدود والاعراف 
عمي 65 سنة.... وابوي 63 سنة ( والله يعطيهم طولة العمر على الطاعة ) 
بعد كل مباراة للهلال يتهاوشون 
تبدأ الهوشة بالتليفون شوي وعمي يطق الباب ويدخل ويدرعم للمجلس وهو يزبد ويرعد 
ويداهمه ابوي وتبدا المعركة والمعافر وتشتغل العجرات 
هذا يحط على اللاعب فلان... وهذاك يدافع عنه
هذا يقول ماعندك سالفة... وهذاك يقول ماعندك ماعند جدتي وبعد ساعة كاملة من العفس والتخبيص والتناحر
يركدون ويبلعون العافية 
ويصوّت ابوي : عطونا العشاء 
وبعد العشاء يجتمعون اثنينهم على ابريق شاهي اخضر وتبدأ السواليف الخاثره اللي يحبها قلبك 
تخيّلوا لو انا دخلت عليهم وهم يتلازخون وكل واحد قاضب شوشة الثاني 
وسوّيت فاهم وقلت لهم : اركدوا... اكبروا... الى متى وانتم اطفال قسم بالله ان تجيني الزمزمية تمشي ست الاف ومايردّها الا دميجتي 
علشان كذا تعوّدت اتركهم على راحتهم
هم اصلا ما اجتمعوا بهالمجلس الا علشان يفرغون غضبهم
وكل واحد فيهم بالاساس هلالي بدرجة لاتصدّق 
وقبل كل شي.... اخوان اشقّاء وطالعين من بطن واحد تخيّلوا ابوي يخرّبها ويقول لعمي :
اخرج من مجلسنا يامندس.. اخرج ياطفل ههههههههه 
.
.
من بعد مباراة طاشقند والمنتدى مزحوم ( اخصائيين نفسيين )
وخذ يا اوامر اداريه وقرارات عسكرية 
( لاتنتقدون – لاتفتحون افامكم – لاتتنفسون – انثبروا )
ما كأن المنتدى مفتوح للجميع... ومن حق كل عضو انه يقول اللي بخاطره
اللي يبي يمدح يمدح... واللي يبي ينتقد ينتقد... هذي هي الديمقراطيه وما احد له الحق انه يمارس الوصايه على غيره علشان يصير ( نجم الأمسية )
وتصنيفات غريبة عجيبة مدري وش الهدف منها ؟؟
ساعة ( جمهور فوز )... وساعة ( اطفال المنتدى )
خلوني اعترف لكم بحقيقة.. واعتبروها شجاعة ادبية
انا واحد من الناس اللي مايستحملون تعثّر الهلال في أي حال 
وتجيني حالة هيجان عصبي بعد أي إخفاق للهلال
سواء بتعادل او هزيمة لا قدّر الله
والسبب اني اعشق الهلال اكثر من نفسي باعطيكم مثال بسيط جدا
قبل ثلاث ايام في الدوام
زميلي هلالي جاء عندي ومعه كوب شاهي لونه اصفر ( هدية مع ليبتون )
تهاوشت انا وايّاهـ هو يقول : عادي.. وش فيك معصّب ؟؟
وانا اقول : وشلون تشتهي نفسك تشرب من كوب اصفر فضّيناها سيرة وراح لمكتبه وانا ماني على بعضي ومتوتّر
ورحت في المساء واشتريت له كوب الهلال اللي عليه الشعار بـ(20) ريال
ومن باكر الصبح وقفت له عند البوابه وعطيته الكوب قبل يدخل المبنى قال بالحرف الواحد : انت منت هلالي... الا انت مجنون هلال قلت له : والله يازين الجنون اذا صار لونه ازرق ويازين اللاعب اذا كان بروح وحماس ونجومية اسامه هوساوي برايفت : ترى مو أي واحد يكتب بالخط رقم 5 او 6 يعني معصّب 
الوضع الشجري
