وش بتسوّي.. لو شفت كوزمين في شارع العليا العام ؟؟
حيــــــــاكم
يالله حيّهم واحد واحد 
كلّن بإسمه الكبار والـ(الاطفال) اللي مثلي << هماي صرت طفل 
عموما... خلوني اخوووش في الموضوع
قبل 10 شهور تقريبا
كنت واقف في اشارة شارع العليا العام
طاق الهواجيس واهوجس بذيب رماح من وين يشرب 
وفجأة
طقتني نفاضه 
وبديت افقد توازني 
شماغي يبترم ويصير المرزام ورى .. وطبعة ( بروجيه ) قدام حتى السيارة قامت تنتفض وقلبت كأنّها ( فليـــور ) وعيني اليسرى بدت ( ترف ) والرمش يتضارب مع الجفن وحالتي حاله
وش اللي صاير
حسّيت ان في واحد على يساري ( صدقي ) حسّيت على يساري واحد غير.. غيييير
واتمالك اعصابي
واشحن طاقتي
والتفت على اليسار
ومن شفت
إنّه السيـر كوزمين اولاريو 
منتفش وسط ذيك البنتلي البيضاء ... آآآبوووك يالرزّه وتولّع الاشارة ويدعس ابو اولاريو
وانا مازلت مفهّي ومثولث بمكاني وانواع البواري وراي
واقبص نفسي وانتبه ... وادعس وراهـ ويوم وصل الاشارة الثانية ويسوّي يوتيرن ( فوق تحت )
وانا وراهـ
ويلبّق النشمي عند الفالح للرياضة
وما امداني انزل وراهـ الا والشباب مجتمعين حواليه في المحل وهو مروّق وانواع الابتسامات 
واقعد شوي احتري الزحمة تخف حواليه
ويوم افترقوا الشباب رحت له وسلّمت عليه
وقلت له ودّي اعطيك هدية... عليك الله ان تقول تم حاول يعتذر... لكنه قدام اصراري وافق
وقلت له : انتظرني عشر دقايق بس... دامك تتسوق بالمحل
وافق وطلب مني اني ما اتأخّر
طلعت ورحت طيران لمحل عطورات شرقية ودهن عود
واشتري ربع توله قيمتها 350 ريال
وارجع له في محل الملابس الرياضية
ولقيته جالس وكيسته في يدّه.. محاسب ومخلّص وقاعد يحتريني
كبر بعيني زود والله.. ماراح وطنّشني
جيت عنده وعطيته الهدية
وقعدت اشرح له عن دهن العود.. وقيمته عندنا في السعودية
وهو يسمع ويبتسم... وابتسامته فيها خبث ويوم خلصت من كلامي شكرني.. وقام من مكانه
ودخل ايدهـ بجيبه وطلّع منها ربع تولة دهن عود مخلّص نصّها وفتحها وطلب مني امد ايدي
وانا اعطيه ايدي وانا في قمّة الفهاوهـ
ويطيّبني من ذاك النوع الفاخر... اللي قسم بالله خرم راسي وصك عقلي جاني احباط صراحة... حسّيت اني مشتري زيت فرامل عند هالنوع الفاخر سألته : أثرك تعرف دهن العود وتستخدمه ؟؟
وجاوبني ان هالتولة جايّته هدية اول ما جاء للسعودية
واللي عطاهـ ايّاها احد لاعبي الهلال ( الملتزمين ) مع مصحف مترجم وانّه من ذاك اليوم وهو يستخدمها باستمرار وتعجبه ريحتها المميزة
واخذ هديتي وشكرني مره ثانيه وراح
وانا قعدت ادعي لنجمنا الملتزم اللي أهداه دهن العود والمصحف واتمنى انكم تدعون له.. وماراح اقول اسمه علشان تبقى بينه وبين ربّه 
.
.
.
اسامه هوساوي
والله بديت تشككني في نفسي يا اسامه
مستحيل نجم بهالعطاء والفدائية والقتالية يكون جاي من خارج النادي
مستحيل هالتفاني والاخلاص ماتخرّج من ناشئين الهلال
مستحيل واحد مثلك ماتربّى في مدرسة صالح النعيمة
لله درك يابطل... لله درك
الوضع الشجري
