حيــــــــــاكم
اسمحوا لي ان ابدأ من حيث انتهيت في موضوعي السابق
وتحديدا في الجزئية الخاصة بياسر القحطاني..
وللاسف الشديد ان العاطفة احيانا ( بل دائما ) تطغى على التفكير
كلنا نحب ياسر
بل كلنا نعشق ياسر كنجم ( سوبر ) ليس في الهلال فقط.. بل في آسيا
وكلنا نتغنّى ونتفاخر وننافح الكواكب بهذا النجم الآسر
ولكن دعوني اسوق لكم هذا المشهد البسيط لتتضح الصورة :
تخيّل نفسك ( أب )
وابنك لديه اختبارات نهائية
وانت في قمة القلق واعصابك في حالة ترثى لها
طبعا لأنّه ( ابنك ) وتهمّك مصلحته ويهمّك نجاحه
وفي عز التوتر دخلت على ابنك في غرفته فوجدته لايذاكر بجديّة
كيف ستكون ردّة فعلك في تلك اللحظة ؟؟
هل سوف تغلق الباب وتخرج بكل هدوء وتقول في نفسك :
لازم اتركه الحين براحته.. وبعد الاختبار اذا رسب لكل حادث حديث.. الحين ماهوب وقت الهواش
أم انّك سوف تنفجر غاضبا وتلعن سلسفيل ذلك الولد المتهاون في سبيل مصلحته.. ولن تتركه الا اذا رأيته قد امسك كتابه وبدأ يفترس الصفحات الواحدة تلو الاخرى ؟؟
أي الحالتين برأيكم تكمن فيها المشاعر الصادقة والحرص الايجابي ؟؟
بالعاميّة الواضحة
بعد التعادل مع الشباب صار الوضع صعب
وباقي لنا ثلاث مباريات
وانا هنا ما اطلب من ياسر انه يسجل في كل مباراة عشرين هدف
أبي منّه هدف واحد بس في كل مباراة
وماراح اطالبه بأهداف مثل هدف ( الدومينو ) الشهير اللي ضد الشباب.. اللي سحب فيه اربعه مدري خمسة
ولا اطالبه بهدف زي هدفه الاسطوري في القادسية
ولا اطالبه بهدف اعجازي زي هدفه في الاهلي العام الماضي
لا لا ابد..
انا ما ابي الا ثلاثة اهداف بس في المباريات الثلاث الباقية
وبكيفه ان بغى يسجلها بركبته او بكوعه
اهم شي ابي اشوف مقاتل في الملعب
ابي اشوف صورة جديدة تمسح الصورة الهزيلة اللي شفتها في المباريات الاخيرة..
في الاربع مباريات الاخيرة تحديدا.. احد شاف ياسر يعدّي من مدافع بنجاح ؟؟
ولاحظوا اني ماقلت يسجّل.. قلت ( يعدّي )
مو معقولة ياياسر.. مستواك نازل مره بشكل يخوّف
اداء هزيل وعدم جديّة في العطاء.. اقل اللاعبين مستوى بدون مبالغة
مباراة الوحدة حسمها مدافع
والنهائيه قدام الشباب حسمها مدافع
وبينهن مباراة النصر ومع انّك المتخصص في التسجيل اول مره ترحم الشباك الصفراء
وبعدها مباراة الشباب في الدوري.. سجلت لنا هدف التعادل بعد ما طلعت ارواحنا وحنّا ننتظر منك هدف الفوز
ننتظر منك جهد اكبر ياياسر
ننتظر منك عطاء اكثر
بعض الاخوان اللي تحكمهم العاطفة يقولون لاتلومه.. هذي خطّة المدرب
والمدرب يطلب منه انه يرجع ورى ويسحب معه المدافعين
على راسي من فوق
لكن ياترى المدرب هو اللي يقول لياسر.. كل مامسكت كوره ودخل عليك مدافع ( طيّح ) نفسك وابحث عن البلنتيات والفاولات ؟؟
وياترى المدرب هو اللي يقول لياسر اذا انفردت بالمرمى ( امزع ) الكوره بسرعة ولاتحاول تعدّي من الحارس وتسجلها هدف بكل سلاسة ؟؟
وبعض الاخوان يجيك مطفّي النور ويقول : وش رايك تلعب بداله احسن ؟؟
ياجماعة الخير
انا هنا اتكلّم من محبّة الاثنين.. الهلال وياسر
ولمّا ننتقد ياسر.. كلامنا نابع من محبّة وعشق لهذا النجم اللي طالما صفّقنا له
والانتقاد مايعني بالضرورة الانتقاص من قيمة الشخص
بالعكس تماما
انا ما انتقدت ياسر الا لأني واثق انّه يمتلك اكبر من هالمستوى بكثير
نبي منه شئ واحد اللي هو : الإجتهاد وبس..!
الوضع المتطور
