[رساوي برساوي]

ليله .. ولا كل الليالي

ليله .. يووووه بس

ألف ألف مبروك للهلاليين على الفوز الغالي << مع التحفظ على كلمة غالي (المصري )

مع انه فوز متوقع مافيه شي جديد
بس عشان نعلمهم انهم بكحيلان وبدون كحيلان

برايفت للنصراويين
..انتو منتو قدنا ..

وصدقت ديانا حين قالت
روح ياصغير وتوك ... لانتا جوي ولانا جوك

وصدق الشاعر خلف المشعان حين قال
قال اسمع اسمع عين ياليل ياعين ... يابو عبايه أوووه يابو عبايه << مالها دخل .. بس مشوها

يالنصراويين
مع احترامي
انتو منتو قد النهائي
حدكم ربع نهائي وتخب عليكم
بس الحظ وصلكم لنص النهائي
لكن اقترح الموسم الجاي تحدون مشاركاتكم على البطولات السنيه
ويمكن تفلحون

مباراة الأمس كانت قمة في التكتيك والابداع والفن

بدءا من الدعيع لبى قلبه ..
وصولا الى قلبي الدفاع هوساوي والمرشدي

مع ان المرشدي كان حضورة تلبية واجب لا أكثر
أو على قولتهم
أوري المعازيب وجهي وأمشي

وصولا الى الأظهره << كنت بقول الزوري لحاله بس قلت حرام مايستاهل نامي

ياخي نامي كل شي فيه ممكن ينبلع الا شي واحد
ليه اذا تقدم مايرجع بسرعه .. يجلس يتمشى ولا كأن خانته ظهير أيمن ؟؟!!
غريب هالآدمي

أمس نجيب الإمام ( التونسي المحلل لا يروح بالكم لمحمد نجيب) بعد المباراة
سأله أحد المتصلين
قال أنا أبغى أسأل الكابتن نجيب عن رأيه في نامي وهل هو في مستوى الهلال
قال نجيب .. أرد على جوابك بعد النهائي

سأله المذيع ليش موب الحين
قال نجيب : ما أبغى أجرح اللاعب << أحس فيك من دباشة نامي يانجيب الإمام

نرجع للاعبين
وين وصلنا

ايه المحاور
فاصل
( قلوووووب الى الرس )

لبى قلبهم ياشيخ
عزيز القوم خالد عزيز
ياشيخ قسم انك كذا ( فيس رافع الإبهام )
وصدق من قال .. دخل مزاجي وعاجبني
ياشيخ قسم بالله أنك أطلق من سبعين أطخم ياخالد عزيز

طبعا هنا انا اتكلم عن عزيز يعني للحين ماوصلت رادوي

وانت قسم بالله يا رادوي انك وهـ بس
ياخي لبى قلبه هالآدمي
انا لو بكتب عنه بجلس من هنا للشرقيه وأنا اسولف عنه << مدري وش دخل الشرقية .. بس لعيون أبوعذاري
رادوي
قوة جسمانيه ..ذكاء ..قدم قوية.. استخلاص الكورة.. يلعب بأكثر من مركز.. وفوق كل هذا ,, مملوح
عبدالرحمن بن مساعد .. قسم ماعنده سالفه اللي قال لك (جايب لنا محور؟)
لا والله موب محور.. هذا جوكر

طبعا هنا أنا بتوقف أبروح أصلي الظهر
يعني اذا تغير عليكم الاسلوب بعد الصلاة معناته تشتت الأفكار << اقول قم اندزلع بس

باك بعد الصلاة << تقبل الله

ايه وش كنا نقول
وقفنا عند رادوي الكنق

رادوي هو أفضل لاعب بالمباراة أمس
غطى خانته
ورجع يغطي دفاع بعد طرد المرشدي
ووفر تغيير على كوزمين
والصراحة انه أبدع بالدفاع أكثر من ابداع المدافعين نفسهم
عقبال مانشوفك حارس وصانع ألعاب ومهاجم وحكم يارادوي

نجي للتايب
ياخي اللاعب هذا سبحان الله وجوده بالملعب يكفي انه ينهزم النصر
من اهم ايجابياته انه يمشي الهجمه ..يعني موب شرط يصنع هدف
بس مايموت الهجمه ( فيس يشوف الفريدي بطرف عين )
وأكبر دليل تمريرته لياسر قبل الهدف
لو كان الفريدي أو سيول (وانتم بكرامه ) كان جلس يعدي وانقطعت الكورة

ويلي .. << << باقي فيسات ثانيه تعبر عن شعوري ؟؟
ياخي المفروض يحولون نص راتب نامي لحساب ويلي
مغطي الجهة اليمنى كلها
لياقة عالية .. الله لا يضره
عز الله انك عرفت تختار يابن مساعد
ويلي << لعيون ساكا اندرسون لحد يفهم غلط

نجي لسيول << لحد يصدق ترا القلب حاطه كذا بس
ياخي هالآدمي تفصيل نصراوي
والله اذا شفته أحس انه من كديش النصر ومضيع النادي
لا يمشي الهجمه على سنع .. ولا يعدي زي الناس .. ولا يضرب بالراس ولا يشوت ولا لياقه .. يعني مدري ليش مسمينه لاعب
عموما ماودي أخرب الموضوع خل نروح للقحطاني

ياسر الكاسر .. والأصفر خاسر
أمس ياسر مش بطال ..صنع الهدف الوحيد .. وبغى يجيب الثاني (اخ يالقهر)
بس ماكنه يتميلح أمس بزياده ؟؟
كل كورة والثانيه طايح .. ويقوم بسرعه عشان يطيح
لا يا ياسر ترا أوروبا ماتبي كذا ...

الفريدي .. انتا حبيبي وبس قسم انك لاعبي المفضل بالهلال مع خالد عزيز.
بس لو تحاول تتدرب على انك تمشي الكورة بسرعه
ان تطلع أطلق من توم كروز ياشيخ

الخثران .. ماقصرت ,, كفيت ووفيت
العنبر .. أشوا انك مادخلت الا آخر دقيقه .. قصدي ماقصرت

O.C
كوزمين أولارويو
<< قلوب كثر حقات خالد عزيز ورادوي ( يعني الى الرس )
ياخي قسم اني بديت أحب المترجم عشانك
طريقة اختيارك للمحترفين .. وتوظيف امكانياتهم
وطريقة تكتيكك .. وكل شي فيك .. يثبت انك من أفضل المدربين ( إن لم تكن الأفضل على الإطلاق) بتاريخ الكرة السعودية
عز الله انك .. تنحط عالجرح تبرى <لكوزمين .. <لراشد

عبدالرحمن بن مساعد ونواف بن سعد وسامي الجابر ... انتو الأساس

====

...رســـآويآت... :

* والله لو تجيبون 80 كحيلان يالنصراويين .. الكبير يبقى كبير ,, والصغير صغير
وشكلين مابحكي

* المباراة الماضية .. قالو ان محترفيننا الجدد توهم واصلين وماكانو مستعدين للمباراة
الحين وش بيقولون بعد؟؟ .. يمكن يقولون مدربنا كان مشغول بهندسة المساحات بالنادي لإنشاء ملاعب جديده

* سيول يثبت للمرة الألف انه .. موب قد الهلال .. ومكانه ( الاحتياط أو النصر )
المشكلة بكل مباراة أساسي !! الظاهر متحسفين على فلوسه

* طارق التايب .. لا جديد .. كباريات يمين ويسار .. وهالمرة , بلاعبهم الجديد

* ياسر ,, مهب من عاداتك تلعب ضد النصر ولا تسجل

* كوزمين في موسم واحد .. غير 3 مدربين نصراويين

فاز على رادان وأقالوه ...
وفاز على ادجار بالدوري .. وأقالوه
والحين أول خسائر باوزا مع النصر .. على يد كوزمين وترا يمكن يقيلون باوزا بعد

* بعد اقتحام المشجع النصراوي لتدريبات الهلال .. وتهديده بأنه سيحرق مقر النادي , قبل ثلاث أيام
الهلال يحرقهم هم وناديهم .. بدرة الملاعب

* بقناة العالمي أمس .. جماهير النصر يقولون الحمد لله انه انطرد المرشدي ولا كان مهزومين 3 أو 4
والله ماتسذبوا
والشكر موصول للحكم على محاولته لجعل المباراة متكافئة
لكن المفروض طرد لاعب ثاني من الهلال عشان تصير متكافئة صح

* هدف اللاعب ذو الشعر ( الأصفر ) .. على النادي ذو اللون ( الأصفر )
يثبت المقوله الشهيره
ماكل مايلمع ذهب

*

لقطة (الرخيص) حسام غالي وخشونته المتعمده ضد (الغالي) أسامه هوساوي
لا تدل الا على أخلاقهم .. وهذا ماعودونا عليه

* قناة أبوظبي .. كانت كالأطرش في الزفة
لاعبي النصر كانو مهزومين فلم يصرحوا
ونادي الهلال مقاطع قناتهم
لذلك استوديوهم التحليلي كله على بعضه مع التصريحات والفواصل الإعلانيه
ماجلس ربع ساعه .. غلطان يامعاند بحر

* لن يتغيب عن الهلال في النهائي الا ماجد المرشدي بسبب طرده
والباقين مامعهم الا كرت واحد

* المباراة الماضية كنا نقول ان جماهير النصر الحاضرة في المدرجات طبقت خطة السلامه من الحريق في وقت قياسي
المشكلة انهم المباراة هذي مشو من الدقيقه 6 بالشوط الأول
الظاهر حتى الدفاع المدني ماقد طبق الخطة هذي

عموما انتهت المباراة بخيرها وشرها
ومثل ماقلت لكم بموضوع سابق
بعد المباراة منتب شايفين وجه نصراوي
وانا اعذرهم الصراحة
لأنهم استهلكو الحد الائتماني من الهياط قبل المباراة

وألف مبروك لكل هلالي ولا تبالغو بالأفراح
ترا باقي لنا الشباب .. ( الله يستر منه )
وأتمنى من كوزمين ينتبه للجهة اليمنى
لأن الشباب عندهم شهيل ( لعب ظهير أيسر بمباراة الحزم الماضيه)
وحنا عندنا نامي ( الله يستر )

والشكر لله أولا وأخيرا
فالفوز والتأهل بجميع مراحله لم يكن لولا توفيق الله
وبالشكر تدوم النعم

خاتمه :-

ايه الشجاعة تغلب الكثرة وأنا أعطيك الدليل <>()<> الهلال يدرع بالغنم ولا يحسب حسابها

للماسنجر
توبك في المرفقات