[Fahad Al Sudais]

حيــــــــــاكم

هلا وغلا بالمماليح

حي الزعماء الاوفياء

قبل شوي وانا في الدوام

كنت ماسك فنجال قهوة تركية

وكنت اتفرج على الطبقة الذهبية اللي فوق << المصريين يسمونها ( وش )

وهي عبارة عن قشور القهوة... تطفح فوق وتصير طبقة ذهبية

والله من واحد وواحد قاعد يبلع ريقه الحين

ومثل ما انتم عارفين.. القشور مامنها أي فايدة

بس طعهما حلو... والكل يحبها

لدرجة انها اهم عند البعض من باقي الفنجال

اهم شي يشرب طبقة القشور... ومايكمل باقي القهوة اللي عليها الكلام

ويوم قعدت افكر فيها..

اكتشفت ان هالشي موجود في حياتنا بشكل كبير واكثر شمولية

يعني مثلا يروح الواحد للمطعم اللبناني ويطلب عشاء دسم

واول مايجلس يحط حيله في صحن المخلل والزيتون والخبز الحار

واذا جاء العشاء تلقاه ماعاد يقدر يكمل

شبع من الحاجات الهامشية وترك الشيء الرئيسي الاهم
.
.

اذكر ذاك اليوم ابي اروح للملعب

ومعي واحد قال ابي اخاويك

نزل عند البقالة علشان يجيب له فصفص

وانا متأخر والمباراة شوي ماتبدأ

ادق عليه وهو في البقالة اقول له : اخلص والا بامشي واخليك

يقول : ياخي مدري وش آخذ حب مصري والا عادي

انا اقول له : اخلص يامسلم المباراة خلاص مابقى عليها شي

وهو يقول : شوي بس خلني اختار

وتقفل معي وانا امشي واتركه في البقاله <--
.
.

السؤال هنا

ليش دائما نركز ونهتم بالسطحيات ونترك الاهم ؟؟

اتمنى تكون الفكرة وصلت ياجماهير الزعيم

.

.

.

كم ديربي قدامنا ؟؟

معروف ان الدوري السعودي يحتوي على ثلاث مباريات ديربي شهيرة :

1- ديربي الرياض ( الهلال – النصر )

2- ديربي جدة ( الاهلي – الاتحاد )

3- ديربي البلطان ( الشباب – الحزم )

وكلنا نعلم كمية الاهتمام الجماهيري قبل أي مباراة ديربي

يازعماء

قدامنا اربع مباريات في الدوري كلها ( ديربي )

وقدامنا مباريات الآسيوية ( الكنز المفقود ) وكلها ( ديربي )

يعني باختصار كل المباريات الجاية ( ديربي )

ياليت لو نركز على خلاصة القهوة ونترك القشور