[أبو شوشة]

بسم الله الرحمن الرحيم

بدايتن انا منذو مبطي وانا من رواد المنتدى ولكني ماحب اكتب احب اقرا ... ومره قررت اني اكتب موضوع ويوم سجلت وكل شي وكتبت الموضوع مانزلوه بالمنتدى .. الظاهر انه ماجاز للمراقبين

المهم نرجع للموضوع انا قريت كثير من اللي يعاتبون جمهور الرياض ويقولون ليش ماتحظرون و و و إلخ

وبما اني من جمهور الرياض قلت خل احاول ارد علي المعاتبين .

الحين انتم تقولون ان جمهور الرياض مايحظر عكس المدن الاخرى مثل تبوك وبريده والدمام ومكه وجده

وانا اقولكم ان ملاعب الرياض غير ملاعب تبوك وبريده والدمام ومكه وجده ... يعني خل ناخذ مثلا استاد جده ... بما ان جده تقارن بالرياض من ناحية المساحه ... لكن للاسف الملعب اللي كاشخين فيه مايكفي الا عشرين الف بينما لو نشوف استاد الملك فهد .. الواجهه بس اللي تتكون من دورين تاخذ عشرين الف .!!

بمعنى اخر .. لو نجيب جمهور الرياض امس اللي كانوا بالاستاد وكان شكلهم قليل ونحطهم بملعب جده كان قلتوا مشاء الله على جمهور جده مالي الملعب .

طبعا هذا ملعب جده اللي هي من اكبر مدن المملكه .. اجل وشلون المدن الاخرى .؟!!

والنقطه الثاني اللي تخفى على كثير ممن هم من برى الرياض .. ان الرياض كبيره .. والاستاد صاير تقريبا باخرهامن الشرق .. يعني انا من سكان وسط الرياض.. عشان اوصل للملعب يبي لي ثلث ساعه هذا اذا كانت الشوارع فاضيه وطبعا نادرا ماتكون الشوارع فاضيه هالايام .. فكيف اللي ساكنين بجنوب الرياض او غربها .

وبعدين مثل مانتم شايفين يعني ثلث ساعه طريق وذبحنا البرد واخرتها تعادل

وفي نقطه اخيره لاحظتها امس في الملعب .... ان كل الجماهير اللي حاظره ماتحب اهازيج الرابطه .. وكلهم اذا بدا يتكلم او يردد شي يقولون له يازينك ساكت !! وانا من ضمنهم .. لاني اشوف ان الرابطه شي ماله داعي ازعاج على غير فايده ... يعني اول وش زيننا نجي وونصفق ونشجع ونسوي حركة الموج ونهز الملعب بدون رابطه وطبول وطقطقه ..عموما انا متاكد ان اغلب المنتدى راح يخالفني بهالنقطه بس هذا اللي شفته امس في الملعب ... لكن تبقى وجهة نظر .

واخيرا هارد لك التعادل ياشباب

وبالتوفيق للزعيم في المباريات القادمه