[أميرٍ]

بسم الله الرحمن الرحيم

اعتذر على عنوان الموضوع والذي قد يغضب منه البعض ..

في البدايه احب اقول لجمهور الزعيم هـآرد لكم .. التعـادل بطعم الخسآره

انا حضرت المباراه امس .. وفيه نقاط كثير احب اني اسلط الضوء عليها

انا مو من عادتي اكتب مواضيع بس بصراحه اول ما طلعت من الملعب فكرت اكتب موضوع من زمان كان ودي اتكلم عنه .. ولو زعل البعض مني لكن الكلام راح اكتبه كامل ...


اول شي انا من سكان الرياض ... يعني رغماً عن انفي اروح الملعب ..
امس .. يعلم الله اني متسلف 50 ريال عشان اروح للملعب

طبعاً تسلفت هالفلوس اكيد حب في الهلال بس انا متآكد مليون في الميه ان فيه
من جمهور الهلال اللي مو في حاجه سلف ومن سكان الرياض ولا عندهم شي وراحو يشوفون المباراه في مقاهي او في بيوتهم ( جمهور خلف الشاشات )

اللحين تدخل لي المنتدى تزعجني وتكثر من مواضيع وقرقره على راسي وانت ما تحضر وانت من سكان الرياض ليه طيب تعصب بعد المباراه .؟؟
اذا انت معصب انا عن حالي وش اقول .؟؟

لو نشوف عدد المشاهدات لموضوع النجم ( طارق التايب ) نشوف فيه اعضاء كثير شاهدو الموضوع .. حب فيه طيب اذا ما يلعب يعني ما تحضر .؟؟

الدوري= طارق التايب .... < هذا تفكير غلط مليون في الميه طيب طارق كم عمره ؟
الله يطول بعمره بس قبل لا يجي واحنا نحرز بطولات يعني على روح الهلال مو على لاعب

روح الهلال من اين تآتي = من الحضور الجماهيري

مالكم في الطويله رحت الملعب مستعجل اللي في بالي ان الملعب بيصير مليان عن بكره ابيه

من قبل لا نوقف السياره وعرفت وضع الملعب لدرجه اني وقفت السياره بجانب شباك التذاكر ..

رحت للمدرج مقابل المنصه .. جلست الملعب فاضي قلنا بيجون طبعاً اعرف جمهور الهلال اذا ما جاء اول المباراه ما يجي بس اسلك لنفسي لعل وعسى ...

للمعلوميه حقوي متى كان يجي الملعب يجي قبل ازدحام الجمهور ...
اللحين جايبين لنا واحد ومتآكد انه ( راعي خبيتي ) السماعات والمايك احلى كلام
لكن لا من صوت ولا من اغاني واهازيج حلوه .. والموقع الفاشل الجديد بعيد عن العالم ..

بدت المباراه اول شي ... شجعنا طبعاً مزعجنا بسماعاته وازعج اللعيبه بآغانيه العاديه وصوته مو حلو بصراحه ولا يحمس الجمهور .. هو لحاله اللي كان يشجع مقابل المنصه والله ساكتين كلهم

طبعاً هالنقطه احب اقول للمسؤلين ( تكفون رابطه زي العالم والناس )

جمهور الاهلي كان قليل لكن الشهاده لله . انهم مستمتعين اكثر مننا برابطتهم ..


النقطه الثانيه المباراه ..
طبعاً استغربت مشاركت صالح الدوسري ... طبعاً ما نبغى مثل بعض الاخوان التجريح في اللاعب .. هو لاعب بس اول مباراه له .. صح المدرب (كوزمين ) غلطان مليون بالميه يوم اشركه في مباراه مثل هذي

ياخي فيه مباراه ابها فيه الرائد في الدرعيه وديه .. خله اساسي ولا تطلعه شوف مستواه لكن مباراه زي كذا ومع خصم قوي نحتاج نفوز يا (كوزمين )

اللاعب له مستقبل بآذن الله وما احكم عليه من هالمباراه لكن يا كوزمين خل التجريب عنك اللعب بلعيبه نبي نفوز

النقطه الثالثه ( كوزمين )
يا مدرب يا كبير المباراه بين ارضك وجمهورك .. ليه تلعب بمهاجم واحد .؟؟؟؟؟؟
اللحين مدرب ريال مدريد . ما يلعب برونالدو لحاله .. ( على ايام عز رونالدو)

يعني تخلي ياسر لحاله انا اشوف الملعب قلوب الدفاع ممسكينه والاظهره يرجعون عشانه متضايق مره ..

بين ارضك وجمهورك اللعب بهجوم مو بدفاع ما نبغى نرجع ذكريات المدرب ( باكيتا ) من يجيب قول قلب لعبه وخطته دفاعيه بحته ..

ياسر .. اتمنى من كل قلبي ترجع لمستواك وانت كل مالك ترجع زي اول ..

الفريدي .. انت لاعب ومهاري وصنعت اكثر من كوره رائعه بس لا تزودها وانت نجم صاعد وبكل صراحه اقولها ...

الشلهوب .. اتمنى انت ايضاً ترجع لمستواك الحقيقي اللي نعرفه عنك وما قصرت ويعطيك العافيه سويت اللي عليك بس الخطه اجبرتك تلعب بهالطريقه ما فيه غير مهاجم واحد تصنع له ومتضايق ...

الخثران .. والله انك افضل لاعب يلعب بروح في الفريق الهلالي من كم سنه .. بس مو لدرجه تكسر رجول عيال خلق الله خف عليهم وفك الكوره بسرعه لا تحاول تقتل الهجمه ....

الدعيع .. ما عليك ملامه سويت اللي عليك وزياده
المرشدي ..ما عليك ملامه سويت اللي عليك وزياده
هوساوي .. لا تسوي كنفارو وثقه وتآخر الكوره برجلك وانت اخر مدافع ومهاجم الاهلي اسرع منه ما فيه وما قصرت
خيرات .. الشرهه مو عليك الشرهه على كوزمين بيقلد ناصر الجوهر خلى اسامه المولد ضهير ...

جماهير الهلال بعد المباراه ..
طلعت من المدرجات وانا مو طايق نفسي وفجئه الاقي احد مشجعين الهلال يكسر زباله وشبك التذاكر ويضحك ويتبسم بوجه اخوياه .. ( هييه هييه بطل يا قوي )

ولو بغيتوني احلف انه ما يدري وش اسم مدرب الهلال جاي تكمله عدد لاخوياه

احنا اكبر من هالحركات احنا جمهور على قوله صاحب السمو الامير ( عبدالرحمن بن مساعد ) هدفي الاول يكون الهلال قدوه للانديه الاخرى سواء لاعبين او جمهور

فرجاءً لا تسودون بوجيهنا قدام العالم ...

الحمد لله كتبت الموضوع اليوم لو كتبته امس بعد المباراه ممكن انطرد لاني معصب بس الشيطان حريص ..

اسف على الاطاله ...

وهذي وجه نظر في الاول والاخير

تحياتي لكم جميعاً

أميرٍ..