[THAAAAMR]

السلام عليكم ورحمه الله وبركاته ،،

هي رسالة واضحة وصريحة من مشجع هلالي بسيط الى قناة تحمل اسم الهلال ...

احبابي المشرفين على قناة الزعيم ياليت تقفلون القناة وترى محد يتابعها
الهلال في غنى عن هالقناة اللي شوهت اسم الهلال بين العرب كلهم ،،
شات ساقط وموسيقي ومدري ايش واحنا يرمز لنا باننا الزعيم في بلاد الحرمين
البعض يقول بان القناة تطلع 5 مليون سنويا ،، يا شيخ قل 10 مليون ،،

بس خسرنا من وراكم الكثير ،،

اسم الهلال ينحط على القناة بالبنط العريض وهي تعارف وانا زعلان عليك يا كوكو وخذ من هالنقاشات الهامة

يا ناس والله شوهتوا اسم الهلال قدام العرب كلهم ،،

بالله وش يقولون برا السعودية عن القناة لا حطوها ،، يقولون شوفوا هاذي قناة الهلال وهذا هو جمهوره ،،

وبعدين وش سنع الموسيقي في القناة والا تقليد وبس ،،

ما نحتاج موسيقي ابد ،، ومو محتاجين ان ارباح النادي تكون مشبوهة علشان هالموسيقي اللي ما لها اي داعي ،،

يا ناس بدال هالشات اللي فضحنا قدام العالم حطوا مباريات كاملة وفي زاوية الشاشة حطوا اعلان عن اي شركة وحطوها مزايدة بين الشركات اللي يدفع اكثر ينحط اعلانه

اول شيء ما راح يجي احد فحطوا الاعلان بملبغ رمزي ومع الوقت راح تزيد قيمة الاعلان وبعد سنة راح يكون يشكل ارباح حقيقة للقناة << كيف الفكر التجاري

وترى المباريات ما تكلف الا تروحون لوزارة الاعلام وتحصلون كلش والا من وين النصر يجيب هالمباريات القديمة ،،

ولا انتم ملزومين بمباريات الهلال بس حطوا مباريات اوربية والا عالمية وخلوا الارتي تعلن بشكل مستمر في القناة مقابل ان عدد معين من المباريات كل شهر والا التلفزيون السعودي جاهز وخذوا اللي تبون وترى نائب الوزير امير وهلالي يعني دقوا الموانة ولا يهمكم احد

يعني مثلا مبارايات كاس العالم 98 حقوقها عند التلفزيون السعودي وكل كؤؤس العالم اللي قبلها

حطوا مباريات السعودية في كؤوس اسيا اللي قبل 84 ,, 88 ,, 92 ,, 96 ترى كثير من الجماهير ما شافت هالمباريات ويمكن شافتها ونستها ، انا قد شفت اسيا 96 بس ما اذكر اي مباراة فيه فكيف ب 92 والا 88 والا غيرها

حطوا مباريات نهائيات كاس العالم للناشئين اللي فاز فيها المنتخب والا مباراة السعودية والبرازيل للشباب اللي انتهت 0-0 ولعب الغشيان في حسبة البرازيليين

كل هالاشياء انا متأكد ما راح تكلفكم ولا شيء وراح تجيب ارباح ضخمة للنادي بعد سنة او سنتين مع كثرة الاعلانات لان الجمهور وقتها بيصير يشوف القناة ويتابع جدول القناة بشغف وممكن حتى تحطون تصويتات على المباراة اللي تنعرض من خلال موقع من يكلف حتى 1000 ريال يلله قل عشر الاف ريال بس يكون فيه واجهة روعة وجدول المباريات المعروضة

وتصويت على المباريات الاكثر شعبية وتصويت على المباراة المعروضة في الوقت من كذا الى كذا وترى عندكم في شبكات الهلال اروع المصميين اللي ممكن يصممون لكم الموقع من الى وباروع الواجهات والجداول وانا اجزم انهم ما يطالبون بالكثير اذا ما حلفوا عليكم انهم ما ياخذون شي

يعني كل ساعتين تكون فيه مباراة على الاقل وتكون القناة 24/24
وهذا ما يكلف شيء مجرد انك تضبط جودة الشاشة باروع ما تقدر عليه وشريط تشيله وشريط تحطه ولا تحتاجون حتى لمكتبة والا ارشيف احفظوها في سيديات وترى كل الاعضاء عندنا ما راح يقصرون معاكم واجزم ان عندهم من الخبرات ما لا تتوقعونه وما لا تقدرون تجيبونه باعلى الرواتب

وبين الشوطين وبين اي شيء ماله داعي فاصل اغاني ممكن تحطون معلومات عن لاعب معين في النادي مع ملخص لسيرته واهدافه مع الفريق وما قاله عنه اكابر النجوم والنقاد

وممكن يكون هناك نشرة يومية باخبار الهلال وصور من التمارين في توقيت معين مثلا 9.00 او 10.00 او افضل يكون فيه تصويت في الموقع << قررت

واذا الكلام على الربح من الشات ممكن تحطون تصويت مع كل مباراة لافضل لاعب وتكون الجائزة على مستوى مع استضافة بسيطة في القناة فبكذا بيكون اللاعبين متحمسين للابداع والجمهور راح يصوت وفي النهاية المستفيد هو الزعيم لا من ناحية حماس اللاعبين ولا من ناحية الدراهم << اللي فشلتونا علشانها

ولا احد يرد ويقول التصريح من الرئاسة والا مدري ايش هاذي قناة النصر مسوين اللي يبون فحطوا ولا عليكم واذا اعترض احد عطوه تردد قناة النصر

يعني اشياء في قمة السهولة وهذا هو النصر يصرحون بانهم بينقلون مباريات الهلال الموسم الجاي ،، يعني اذا النصر بينقلون مباريات الهلال <<<مباشرة>>> وهم ما فتحوا الا من كم شهر اجل انتم وش تسوون خلال هالسنة كلها اللي ما شفنا فيها الا لقاء مع بندر بن محمد ومقدم اول مرة يسوي مقابلة وشغل مهوب اللي تبي

ما نبي برامج ما نبي موسيقي ما نبي شات نبي نشوف الهلال وبس
مباريات الهلال ،، نجوم الهلال ،، تاريخ الهلال ،، لقائات مع الهلاليين ،، اخبار الهلال ،، وبس ما نبي نشوف كوكو ولا فوفو

انا اقول هالكلام لاني متفشل من القناة اللي عندها كلش سهل وراتب شهر للاعبين في النادي يخلي متابعي القناة فوق المليون يوميا وانا اجزم بالشيء وترى المليون شوي على اسم الهلال اللي له متابعين بقوة في كل الخليج وحتى اسيا والعرب واذا شافوا هالتاريخ العظيم للهلال راح يتعاطفون مع كل مباراة يشوفونها للنادي وراح تزيد الشعبية بين غير السعوديين بقوة

يعني تخيلوا عندي مباراة الهلال وجابليو في نهائي اسيا 97 واروح ادور في الشوارع ما عندي شيء يا ناس ساعدوا المرور والشرطة وقللوا الحوادث والزحمة في الشوارع

والله ان اسم الهلال كبير وكبير وكبير ولكن القناة مثلت الهلال اسوأ تمثيل ولا عجب اذا كان من يديرها ويعمل فيها وكلش 3 اشخاص

يااااااااااااه جمهور من الخليج الى المحيط ويتابعون قناة ما يشتغل فيها الا ثلاثة اشخاص

فاخيرا يا نبي نشوف الهلال وكفاية ذنوب ومعاصي

وياليت تعذروني وبقوة بس تراني والله مقهور من اللي يصير في القناة فلا احد يحس اني مستقصده فانا ما اعرف ولا واحد في القناة وهذا هو اللي في قلبي وحطيته كله عندك فاختاروا اللي يناسب واسف على اي اسائه لاي احد


ســــلام ... هلاااااااااالي