[ازرق وابيض]

.
.
.

عاد سامي في مباراة النصر صحيح ما لعب بس فرحنا بوجوده بالاحتياط بعدين جت مباراة الاهلي ولعب سامي وفرحنا اكثر وقدم لمحات حلوه ابو عبدالله وحسيت بروح جديده بالفريق . وجت مبارة الشباب قالوا انه مصاب بالانفلونزا قلت سلامته وما يرى باس نجمنا المحبوب . وجت مبارة الخليج وبعدها الوحده وسامي اسمه غير موجود مع الاحتياط ! ولا يوجد اي تبرير من ادارة الهلال او المنتدى هنا !

سامي طال انتظارنا لك والموسم ما بقى منه شي ويقضي نبيك تمتعنا في ايامك الاخيره قبل اعتزالك مثل ما متعتنا سنين وسنين يا سامي .


سامي نشكرك كل الشكر ونقدم لك كل العرفان على الاشياء لكثيره اللي قدمتها للهلال ولنا واللي ما نقدر نحصرها او نوفيك حقها لانك رمز كبير وانا برأيي انك ابرز لاعب مر على الهلال لأن الأرقام تحكي ذلك وما حققته للهلال من بطولات اسعدتنا كلنا من سنة 1410 وحتى العام الماضي لا يمكن يحققها لاعب غيرك مهما كان .


أنت نجم اسطوري ياما وياما صفقنا لك وتعبنا وحنا نصوت باسمك وندافع عنك امام سخافات الحاقدين من الفقراويه وغيرهم اللي دايم ما يصغرونك لكنك وغصبن عن خشومهم كبير كبير كبير .


سامي ما بعد شبعنا من متعتك الكرويه .. وبصراحه ما ودنا الموسم يقضي لان الاشاعات تقول انك ناويه الاخير


سامي بصراحه وان كنا نحبك ونقدر كل الاشياء الجميله اللي قدمتها لنا كهلاليين لكن يا بو عبدالله غيابك طول هالشهور بدون مبرر مقنع لنا شي صعب نتقبله بسهوله . لأننا نبيك يا سامي نجم وقدها وقدود حتى آخر ثانيه لك بالملاعب .


بصراحه ورغم ان الفريق يقدم مستويات كبيره هالسنه ورغم ان اللاعبين رائعين بقيادة القناص ياسر والموهوب الشلهوب الا انه ماش ..! أحس ان الفريق ناقصه شي .. ناقصه روح كروحك يا سامي .. ناقصه خبره كخبرتك يا سامي .. ناقصه كبير كما انت يا سامي .


سامي وجودك على الاقل لو بالاحتياط يعطي شي كبير للفريق . يعطي دافع للنجوم الشباب .


سامي ان كنت ناوي فعلا ً الاعتزال اعلنه الآن لو سمحت وخلنا نرتاح من انتظار عودتك للفريق .

والا يا سامي ارجع وعزز من قوة فريقنا في باقي مشواره بالدوري وكأس ولي العهد وكأس فيصل والأهم بطولة آسيا .

أتمنى فعلا ً انك تقود الفريق لتحقيق بطولة آسيا ومن ثم التأهل لكأس العالم وللي بيكون خير ختام لمشوارك المرصع بالألماس والذهب يا كبير .


كل التقدير والاحترام