[مجنون أرسنال]

ما تحسون إنها مصخت ؟

صرت أحسب إن من شروط المشاركة في الموقع إنك لازم تكتب موضوع إن بيكهام مات ..

كل شوي جاي و احد مطفي النور و حاط لك العنوان داخله صورة 200 إل حمراء موديل 84 .. و قال هذي سيارة بيكهام بعد القشعة

المشكلة الواحد فيهم لو طالع المواضيع اللي تحته لقا الخبر نفسه مكتوب ثلاث أو أربع مرات و مقفل بعد ..

مدري هالعالم متنحة ؟ و الا ماتشوف ؟ و الا صايمة ؟

نقول صايمة أحسن

المهم ما علينا ... اللي أبي أتكلم عنه إن فيه خبر يقول إن بيكهام تقلى عرض من نادي ريد بل في أمريكا .



بس عرض ريدل بل صدقي موب مثل العرض اللي صار على خوينا الصويلح

مالك النادي رجل ملياردير إسمه فيليب أنشوتز يلعب بالفلوس لعب و علاقته مع بيكهام نقدر نقول عليها ممتازة .. و هو من عرض على بيكهام الأنتقال للنادي علشان يكون جنب لاعب الأنتر وفرنسا السابق دجوركاييف ..



أنشوتز هذا يقولون أنه حالف إنه يخلي رياضة كرة القدم هي الرياضة رقم 1 في أمريكا و يشوف إن أفضل طريق لشهرتها هو جلب بيكهام , علشان كذا هو مصمم إنه يجيبه بأي سعر ..

و لها السبب هو مقدم عرض راح يخلي بيكهام أغلى لاعب في تاريخ الكورة ...

العرض هو 100 مليون دولار

نعم 100 مليون

اللي ماقدر يحصلها و هو في عز شبابه و مستوياته بياخذها و هو يالله حسن الخاتمة ,, و المثير في الموضوع إن المتحدث الرسمي باسم بيكهام صرح إنه صعب رفض مثل هالعرض في المستقبل و إنه الأندية في أمريكا كانت دايماً مهمتة فيه ..

و فيه أخبار مقربة من بيكهام تقول إن الرجال يوم جاه العرض قال بخشته تسذا :

و إن الرجال ترواده من زمان فكرة الأقامة في أمريكا خصوصاً وإن زوجته دائماً تكون مقيمة هناك .


...........



آخر الأخبار تقول إن بيكس بيجدد موسمين مع الريال و إنه ناوي يعتزل في مدريد ...

لكن ودي أختم الموضوع بسؤالين :

هل تتوقعون إنه يرفض هالعرض لو تقدم له فعلاً ؟

أم إنه يسحب على ناديه و على منتخب بلاده و تكون نهايته شبيه بنهاياة بيليه و بكنباور و كرويف اللي أنتهوا في الملاعب الأمريكية بدون أن يجنوا شيء سوا المال و في الأخير ظلت رياضة كرة القدم هناك خلف كرة السلة و الكرة الأمريكية و البيسبول و التنس و السباحة و الغولف و الطائرة و الخيول و السيارات و المصارعة و الملاكمة و .......

وإذا وافق هل يستاهل بيكهام إنه يكون أغلى لاعب في تاريخ كرة القدم ؟


و سلامتكم ...