[هلاليه خياليه]

السلام عليكم ورحمة الله وبركاته



اخوي الكريم

بمجرد ماتتأكد من انك هلالي ابيك تتأكد من شي ثاني ومهم
انك اصبحت ضمن مصطلح يقاله (الرقم الصعب) ;)

ليه كذا ياجماهير الزعيم ؟
والله ماهو هذا العشم فيكم
حضور الواحد يستحي بصراحه يذكره

ياسكان العاصمه وين ايامكم ؟؟؟

هذا وعندكم رئيس يرفع روسكم واعضاء شرف يشرفون والله
وعلى راسهم سعادة المهندس سعد الجريد اللي ماقصر ابد في دعم الرابطه والجماهير
اجل اذا ماوراكم احد زي بعض الفرق الله لايبلانا وش بتسوون !!
لكن عجبي منكم !!!

للاسف اقولها لكم بمراره
والله ابوسلطان ماينلام لو ماحضر

ابي احرك بدواخلكم مشاعر الحب والغيره على زعل هالانسان اللي ضحى بالكثير على شانكم

يااخي لو طلب منك زميل في العمل مثلا حضور عزيمة عشاء او جاتك دعوه لحضور زواج فلان بن علان
وش يكون ردك؟!!

لاتجاوب عرفين انك بترتب وضعك وبتحط رجلك وتروح سيده وتجبر بخاطره

لكن هالمره الشخص اللي طلب حضورك مو عادي موعادي موعادي ياليت هالكلمه يتردد صداها في سمعك الين
تفهم معناها زين وتحضر للملعب


واسمحولي بصراحه اقول ان فيه اعذار الواحد يسكت ولايقولها عجيبه غريبه

واحد يقولك الجو بارد!!
ياعمي بتفهمني ان الجمهور اللي حضر مباراة الوحده هم بس اللي قدروا يقاومون البرد من بد سكان الرياض
واذا الكاميرا لقطت لنا صور لبعض الاطفال اللي يساندون الهلال ليش تحملوا وماخافوا من البرد زيك ؟!!

بعدين يااخي مااحد قالك اجلس وتحجر من البرد
عندي معلومه قديمه تقول ان الحركه تدفي جسمك وموبس كذا تصفي جسمك من ترسبات الدهون
يعني شجع وآزر و سمعنا صوتك كل هذا حماس يفيدك ويرفع من معنويات اللاعبين
والبس شتوي الله لايهينك عشان لايصفقك البرد لاسمح الله


و فيه شي رافع ضغطي والله العظيم
شي يحيرني من بعض الجماهير اللي تحضر
ماادري ليش اشوف بعضهم يروح يجلس لحاله بعيد يعني كأنه مضيع او منتظر عزيمه
ياخي اجلس جنب اخوياك عشان نحس بتنظيم في المدرجات وتشارك الاخوان بالتشجيع
يمكن يبين عدد الجمهور اكثر


شي يحز في النفس
لما تشوف الجماهير ماتحضر الا اذا كانت المباراه ضد فرق معينه !!
ليش طيب ؟
يعني انت ماتصير هلالي الا قدام هالفرق ؟ ولا الظروف ماتسمح لك بالحضور الا اذا لعب الهلال ضد الفريق الفلاني؟

تدرون اني متحطمه وانا اكتب هالموضوع
اقول في نفسي يابنت الناس ماقدروا طلب ابوسلطان وحضروا للملعب بالله بيلتفتون لموضوعك

بس مااقول غير الله كريم والعشم كل العشم فيكم

.