[سلمان بن محمد]

[align=center]السلام عليكم

ما صدقت عيوني وانا اشوف حماده يوزع الرول على الجمهور

يووه الله المستعان .. بحّت أصواتنا الموسم الماضي نطالب مجلس الجمهور بالرول والاوراق البيضاء

ووعدونا فيها ولا شفناها في مباريات الحسم ..

قالوا فيه 30 ألف رول بتتوزع في مباراة الشباب ..

صار فيه غلط في الرقم موب 30000 احذف الاصفار كلها ..

ما شفنا الا ثلاث !

ياما تمنيناها في مباراة الهلال والقادسيه .. والهلال والشباب !



وللأسف ما شفنا أي شي مميز في هالمباراتين مع أن مباراة الهلال والشباب كانت بالنسبه لي واحده من أهم المباريات في تاريخ الهلال !

لانها كانت تفصله عن تحقيق الرباعيه ..

لكن معليش مشيناها لمجلس الجمهور



الحين يبدو لي فيه تحسن .. في مباراة الهلال والأهلي النهائيه شفنا حماده يوزع الرول ..

لكن فيه عدة ملاحظات :



1-ليش دائما حماده بس يوزع الاعلام وغيرها ؟ وين المتعاونين مع مجلس الجمهور ؟

اذكر في الموسم الماضي مباراة الهلال * الشباب ..

قلت لأحد الاخوان في المجلس اني مستعد اجي ومعي شباب نساعدكم في أي شي في الملعب

قال لا مشكورين فيه شباب كثير متعاونين معنا ..

يوم جينا الملعب ما فيه الا حماده يوزع الاعلام ومعه كم واحد ؟ ..

طيب وين راحوا الباقين ؟




2-لاحظنا ان حماده وزع الرول على الاخوان اللي جالسين حول الشبك اللي يفصلهم عن المضمار ؟

اللي اعرفه ان الرول يتوزع على الناس اللي فوق !

الناس اللي تحت ما يمديهم يرمونها الا وهي طايحه في الملعب !

بعدين يا اخوان طريقة رمي الاعلام والرول على الجمهور غلط ..

المفروض من قبل المباراه توزع على المقاعد (اذا كانت المباراه في الاستاد)

أو يكون فيه على الأقل 20 شخص عند بوابات المدرجات العلويه (اذا كانت المباراه في الملز)

لتوزيعها على الجمهور

ما ينفع واحد معه كيس يوزعها ! مثل ما شفنا في لقاء الأهلي ..





ان شاء الله في هذا الموسم نشوف نقله نوعيه في اسلوب التشجيع

الموسم الماضي كان التنظيم "سيء" نوعا ما في نهائي كأس ولي العهد وكأس الملك

والحين عندنا وقت طويل نفكر ونخطط لنهائيات هذا الموسم .. ولدوري أبطال آسيا ايضا



وفيه النهايه ..

شكرا للمجلس على التفاعل المتأخر جدًا مع أحد مطالب الجمهور الهلالي !!!

وتحيه خاصه للأخ ياسر الطلاسي .. ولو اني زعلان عليك جدًا

لكن ان شاء الله الموسم هذا نسوي اللي يسر الجمهور الهلالي

فريقنا زعيم الأنديه (45 بطوله) .. نبي جمهورنا بعد يكون الأفضل ونبي غيرنا يتعلم منّا !

في لقاء المربع الذهبي بين الهلال والاتحاد ، الجمهور الاتحادي كان 100 مشجع

ومع ذلك ظهروا بشكل جميل جدا ومميز

نحن أولى منهم بالظهور بأجمل وأروع صوره

وش رايكم يا اخوان ؟

[/align]