[مجنون الفن الهلالي]

بسم الله الرحمن الرحيم
بداية هالموضوع اني كنت مطلع سياره من الوكاله قبل مباراه الهلال و النصر وحضرت الاياب وكنت ملبق السياره عند مدرجات النصر (بحكم اني مأعرف مداخل ومخارج الاستاد)ورايح امشي لمدرجات الهلال وكنت جاي الساعه 6 المغرب ولا لقيت مكان الا في الزاويه فووووووق مرررره
المهم قبل ما تبدى المباراه الا واحد جالس على السور اللي وراي قام ورفع ثوبه وطلع اسلحه اسف قصدي صواريخ ونوافير و القنابل المزعجه اللي تخليك ترتكض وانت في بيتكم:p
وقامت الحرب ياليتهم يذبون على مدرجات النصر مشوار والله لو انه ايش يوصلها هناك
كان يشغلها عند اذني ويرميها على اللي تحت عاد هذا شكله والله يخوف يعني لو قلت له اركد كان تلقون وجهي مبنشر عاد بيني وبينكم خفت على نفس وسكت المهم يوم صفر الحكم وانا اللي انقز اروح لسياره يوم وصلت لسياره واناظر من بعيد علشان اشوف فيه قزاز منكسر ولا لأ مسوي فيها ذكي
وقلت الحمد لله ان القزاز ما جاه شي ويوم قربت لم السياره وانا اشوف شكل الرفرف جايه شي واقرب اكثر واكثر والقى الرفرف منعفط وهنا تجلت قدراتي الخارقه وبان ذكائي اللي موزيه لهاذي اللحظه كنت ملبق السياره جنب سور الاستاد والرفرف المسكين كان الايسر يعني جنب السور...
اتوقع انكم تقلون وين الذكاء طلع ؟؟؟ كنت اناظر الرفرف واحط يدي على راسي من هول ما رأيت واقول وش لون ذا صدم الرفرف وانا ملبقها على الجدار هذا ان دل فإنه يدل على ذكائي ....مر واحد نصراوي الله يجزاه خير وفسر لي هذا اللغز طلع اخونا في الله عافط الرفرف برجله (ول عليه تقول مدفع ) المهم جلست اناظر السياره وما اكذب عليكم صكتني العبره ولا النصراوي اللي علمني جاي ينادين قلت له نعم وانا نفسي في خشمي يوم جيت له ويورين موتره وموتر اللي وراه واللي ورا اللي وراه واللي ورا اللي وراللي وراه كلهم منعفطه مع نفس الرفرف المهم سويت عمليه حسابيه في راس طلع لي ان هذا اللي خرب موتري ومواتر العالم الله العالم واحد هلالي طالع زعلان من المباراه متحدي مع واحد على تيس مندي ومن الزعل حط حرته في مواتر خلق الله وهذا من شكل الانتحاري اللي دخل الصواريخ داخل الاستاد اللي قسم بالله ما يدرون وش الكوره جايين بس يسوون هبال ويطلعون امراضهم قدام العالم .
-------------------------------------------------
#هذا ان دل دل على عقليات بعض جماهير الانديه عموماً.
# انا من موضوعي ما اقصد التجريح في جماهير اي نادي بس اتكلم عن مشكله من مشاكل الملاعب
# واحد حاضر نفس المباراه لقى قزاز موتره مكسور واللي داخل متشلح
# اتمنى اني ما اكون طولت عليكم......