[ابوساري]

السلام عليكم و رحمة الله و بركاته

أسعد الله صباحكم جميعاً ..

في بحثي عن النوم.. و قليل من الأرق .. و الفجر قرب ورانا صلاة و دوامات ..

قلت بقتل التساؤل اللي يخلين أفكر ..

وش سبب الهجوم الإعلامي على بيريرا؟

ليش صفقة فاشلة؟ ..

مافيه ولا هلالي يعجبه مستوى الهلال ككل كفريق .. ولا يوجد لاعب نجم حالياً في مستواه ..

و الهلالي و اللي موب هلالي أجمع على سوء قرارات المدرب و إدارته للفريق بكثير من المباريات ..

تنظيم دفاعي كارثي .. بناء هجمة شبه معدوم و مكشوف لكل الفرق .. تباعد بالخطوط .. اختراع مراكز و تجريب ..

اللاعبين أنفسهم أحسهم يتوهقون بالكورة من شين التمركز ..

وأنا كمتابع بسيط و معي خبرة سنين أتابع به مباريات كرة قدم و فروسية وهجن و تنس أرضي و كرة سلة و كرة طائرة و الطنطاوي و الشعراوي و الشبل و الخضيري و أفلام الغرب الأمريكي اللي انتجت بالخمسينات الميلادية ..

عجزت أفهم وش تكتيك المدرب وقت المباراة .. بالعادة تفهم شوي .. بس هالمرة كلش ..



قلت في نفسي .. أبرجع للرباعي الأجنبي في الأندية الكبار ..

بانيقا الشباب .. و تاليسكا النصر .. و كورونادو الإتحاد .. و بيريرا الهلال ..

وأشوف الشيء اللي الناس تشوفه و أنا عجزت أشوف ..

قلت لربما بيريرا يملك شيء مخجل كلاعب المدرب يجرب به مراكز ..

أترككم مع الإحصائيات ثم نرجع مرة ثانية ..

مع يقيني التام إنكم تعرفون كيف الأندية الثلاثة تعتمد اعتماد كلي على ثلاثيهم الأجنبي بكل شيء ..

و يقيني التام إنكم تعرفون كيف مدرب الهلال يلعب ببيريرا و المهام اللي يوكله فيها ..



نبدأ بأيقونة الشباب ..
بانيقا
لعب 16 مباراة (1366 دقيقة)
أساسي 16 مباراة
أهداف 5
صناعة 4
خروج اللاعب 3

تاليسكا
لعب 17 مباراة (1517 دقيقة)
أساسي 17 مباراة
أهداف 12
صناعة الاهداف 1
خروج اللاعب 2 مباراة

كورونادو
لعب 12 مباراة (1037 دقيقة)
أساسي 12 مباراة
أهداف 4 أهداف
صناعة 8 اهداف
خروج اللاعب 7


بيريرا
لعب 13 مباراة (877 دقيقة)
أساسي 9 مباريات
أهداف صفر
صناعة 7 أهداف
خروج اللاعب 6 مرات



لاعب مامداه يلعب 12 مباراة دوري .. و نصها يستبدل ..
و قادر يحقق رقم بصناعة اللاعب رغم بعده عن الشق الهجومي بالغالب ..
ورغم السوء الهلالي ببناء الهجمة و الضعف الهجومي باستغلال الفرص ..
وغياب لاعبين بالهلال أساسيين بكثير من المباريات ..


ما أقول إن بيريرا منفجر .. أو لاعب قدم مستواه المعتاد ..
لكن هل هو فعلاً بهذا السوء؟ ..
لاعب صانع ألعاب و مايسترو بالوسط .. و مركزه بالطرف أساساً ..
لعبه المدرب في سنتر الملعب .. في مركز جديد .. وبيئة جديدة .. وفريق مستوى نجومه نازل ..
مهاجمه الأساسي عمره 36 سنة و مستواه نازل ( مع ذلك مسجل 9 أهداف )
لاعبه المهاجم الأساسي الثاني يلعب جناح شوط أول .. ومهاجم شوط ثاني
عشوائية بالوسط .. لدرجة شفنا الجوير أساسي مرتين.. و ناصر الدوسري ظهير أيسر بأكثر من مرة ..

هل فعلا بيريرا بهالسوء؟.. وهو بهالأرقام بصناعة اللعب من جيوفنكو و كاريلو في أول موسم لهم ..

ياجماعة جيوفنكو لعب 21 مباراة في آخر موسم ..
صنع 4 و سجل 1 ..
بمجموع دقائق 1348

والموسم اللي قبله ..
لعب 26 مباراة ..
صنع 7 و سجل 7


ياجماعة الخير كاريو لعب 29 مباراة الموسم الماضي ..
سجل 5 و صنع 7
بمجموع دقائق 2057

والموسم اللي قبله ..
لعب 27 مباراة ..
سجل 4 و صنع 3

والموسم الحالي لعب 13 مباراة ..
سجل هدفين و صنع هدف واحد ..
بمجموع دقائق 744 دقيقة ..


أنا فيني شيء وإلا الناس فيها شيء؟؟

يعلم الله أكتب الموضوع هذا و أبي أناقش شخص يفهمني بس ..

كيف بيريرا فشل و لاعبين مثل كاريو و جيوفنكو نجحوا؟

كيف نحكم على لاعب مع مدرب مثل جارديم؟ .. و الفريق مركزه مانذكر آخر مرة صار بمثله؟


((( جميع الاحصائيات فقط بالدوري )))

أما لو قلنا في آسيا ..

كاريو لعب 19 مباراة ..
سجل 4 أهداف .. و صنع 4 أهداف ..

جيوفنكو لعب 13 مباراة ..
سجل 3 أهداف .. و صنع 5 أهداف ...

بيريرا؟
لعب 4 مباريات .. صنع هدفين ! ..

أنا بس ودي أعرف كيف حكم الإعلام على فشل بيريرا في 13 مباراة فقط ؟


آسف على الإطالة .. لكن الموضوع مفتوح للنقاش ..
و بالأخير هذا منتدى .. لو أكتب معلقة ما عندكم مشكلة أكيد