[سعيد الحمادي]

حيا الله الهزيمة اللي تجبرنا لدعم الزعيم من جميع النواحي

لو فاز بقي المدرب والرئيس

الهلال بحاجة لصعقة كهربائية حتى يصحو العملاق النائم ويأكل الأخضر واليابس

ما أدري وش سبب تنصل كبار الهلال عن الوقوف مع ناديهم

عبدالله بن مساعد من يوم صار الرئيس العام وهو ماكأنه كان رئيس الهلال في يوم من الأيام

حتى لما حققوا البطولات الأخيرة تحس وكأنه مو راضي عن الفوز وتحقيق البطولة

أحمد الخميس وعبد الله البرقان كذلك ، هل دعم الهلال وأخذ حقوقه عيب !

النادي مقبل على إفلاس مادي رهيب

الحل بيع عقود العلل اللي في الفريق اللي ماخذين وضع مزهريات على الدكة

وتصعيد 6 أو 7 لاعبين من الأولمبي وصقلهم والصبر عليهم

الحل الجذري إعادة ناصر وتجهيز ياسر والتعاقد مع إبن النادي المخلص سامي الجابر

بعقد لمدة 10 سنوات قابلة للزيادة

خلوه يمخمخ مع الفريق ويعالج أخطاءه على المدى الطويل

سامي اللي رجع تياقو وتعاقد مع كواك وديقاو وناصر الشمراني

رجع هلال المتعة الكروية اللي يضرب بالأربعات والخمسات

كان صادق وقال حنا في مرحلة بناء لاتطالبون ببطولات

لأن اللي بعد البناء هو الحصاد وبالتالي تجيب كل البطولات

مشكلة سامي رفض التدخل من الأمير بندر بن محمد وهو صاحب أفضال كبيرة على سامي

وحصل اللي حصل

ياجماعة فيه مدرب ايراني اسمه مهدي ابراهيم زاده أعتقد مدرب ذوب آهان بقي مع الفريق 8 سنوات

لأنه ابن بلد وتعاقدوا معه واستمر مع الفريق .

ليه مانجيب سامي وندعمه وهو من النوع اللي يتعلم ويتطور بسرعة ويسابق الزمن

بالله ماهو أفضل من أن يجلس في بيته ماعنده إلا التحليل في bine sports ؟

يقول المثل جحا أولى بلحم ثوره ،، حنا أولى بسامي الجابر مع تقديري الكبير له

اسألكم بالله هل كنتم تحلمون بالتعاقد مع ناصر الشمراني ؟؟

تخيلوا الآن يُمارس معه كل أنواع التطفيش ،، مو حرام !!

عندك مليون طريقة وطريقة لحل مشكله مع الفريق ، ناصر ماكان يكابر على الدكة

بالعكس كان يشوف شي ماتشوفه الجماهير وهو ــ انه جاهز وحماسي ومقاتل وهداف واحتياط



عكس اللي جنبه ياسر مو جاهز والسالم مو في مستوى ناصر والباقي مافيهم مهاجم صريح

يعني ناصر معه حق ورب الكعبة.

وين ملعب النادي ،، قناة الزعيم ،، الخصخصة ؟

وين الدعم المالي ؟

فريق يحارب على كل البطولات يفترض ان عنده أجانب سوبر ستار

الحين خالد كعبي ، فيصل درويش ، عطيف ، البريك ، الثنيان وش يسوون ع الدكة يادونيس ؟

ليه دونيس كان يوظف اللاعبين صح وآخرتها في نهائي كأس ولي العهد وبعدها اختلف الوضع ؟

صار قلب الدفاع راس حربة والظهير الأيمن أيسر والعكس والمهاجم مدافع ووووو

رئيس النادي مؤدب ومحترم ،،، مغلوب على أمره تهربوا منه كبار الهلال وتركوه في وجه المدفع لوحده

رغم ارتباطاته الأسرية وبنته اللي تحتاج لمتابعة علاجية .

وين الغيورين من كبار الهلال قاعدين يشوفون فريقهم يتمسخر من التعاون والقادسية والشباب والجزيرة وتراكتور

ولا حركوا ساكن ؟؟

أخاف اللي قاعد يصير انها حوبة سامي الجابر ،،، رجعوه من فرنسا ومسك تدريب الهلال وقتلوا حلمه في مهده

علشان النصر رجع من بوابة الهلال ،، طيب قدر الله وماشاء فعل ، يعني ان دونيس أفضل من سامي ؟

ولا علشانه أجنبي فهو يفهم أكثر من إبن البلد؟

للعلم دونيس جاء من الدوري القبرصي اللي ماحد يعرف عنه شي ، السيرة الذاتية لسامي وقيمته كلاعب تتجاوز

دونيس بمراحل ، ولاعبي الهلال زملاء لسامي ويعرفهم بشكل جيد ويعرف علاجهم.

اذاً يعود سامي بكل صلاحياته وبوقوف جميع محبي الكيان وهو البلسم اللي يعالج الزعيم من كل عثراته

باذن الله تعالى.

هذه آرائي واقتراحاتي ، أتمنى من كل محبي وعشاق الزعيم المشاركة في هذا الموضوع

ولكم فائق الشكر والتقدير.