[إيهاب زكري]

السلام عليكم ورحمة الله وبركاتة

يا حبي لك يا هلال واحب جمهورك اكثر ... جمهور يجلد اللاعبين والادارة عند الهزيمة "بدون مستوى"

يفرح ويجن جنونه عند الفوز ويجلد ايضا المقصر من اللاعبين

جمهور عاشق في منهم جماهير لاعبين وفي منهم جماهير كيان

لكن .. هذا العشق والجنون امام الشاشات فقط تلفزيون ونت

يقولون علينا جماهير الزعيم ، الأمة الهلالية ، جن الملاعب اعيد واكرر جننننن الملاعب

لكن اللي شفته اليوم ماهو جمهور الهلال (معليش لا تقولون رمضان او بداية موسم ) جماهير الاندية الثانية برظو عندها رمضان وفي بداية موسم لكن عبت الملاعب لما تكون مباريات ناديها على ارضها "على ارضها"

جمهور يتباها بكثرته فقط لما تكون هناك مباريات حاسمه وقوية ... من باب اولى الحضور في المباريات العادية هذا دوري نقاط

اللاعبين لما يشوفون الملعب فل يخافون ويستحون انو يطلع هذا الجمهور مهزوم او على الاقل ما يشوفون مستوى (ماراح اضرب مثال باندية ثانية ) والمتابع بيعرف انو الجمهور هو الاهداف هو الفوز

ليتك يا هلال هنا في جدة وتكون اغلب مبارياتك عندنا علشان اجيك ركض علشان اللاعب اللي ما يقدم مستوى ويتخاذل اجلده كعادتي لأني هلالي واحب الهلال

الجولة الاولى تعادلنا الثانية انهزمنا الثالثه اذا الله احيانا ما ندري وش يصير لكني بأحضر واشجع "انهزم تعادل فاز"بأحضر واشجع هذه مهامي كمحب ومشجع للهلال ماراح ارز عمري بالمنتدى واجمع الخليقة بالقهوه ولا الاستراحة الا بآخذ بناتي الصغار واشدها للملعب وفلتنا بالملعب انهزم الهلال او تعادل او فاز مو مهم عندي قد ما اكون متواجد وقت المباراة

وهي معادلة طردية ومعروفه زادت الجماهير ارتفع مستوى اللاعبين والاهداف ولنا بموسم قيرتس اكبر الشواهد "موسم الكفوف الخمسات"


الان خذوا راحتكم اجلدوا الادارة واللاعبين لكن احضروا بالملعب واذا استمر الوضع لك حق في النقد "الجارح" اما انك متبطح بالبيت والاستراحة والقهوة وتبي الفوز يجيك لا يا حبيبي اللاعبين اذا شافوا الملعب فل يخافون منك كمشجع مع اني ما احب انو يخاف ابيه يحرق نفسه للشعار لكن هذا حالنا اذا ماشافوا احد بالملعب مشوها طقطقه ما همه فوز او خسارة "تأدية واجب" لكن الملعب فل يحط في باله ابي اجيب قول واشوف جنون الجماهير

لا تطلبون الفوز والمستوى والملاعب فاظية ال يعني النقل التلفزيون مرضيك والتصوير خرافي


باذكركم بمباريات للهلال عام 2010 في الاحساء والقصيم والدمام وجده وبعض مباريات "الرياض" كيف كان الحضور وكيف كان مستوى الهلال

كنا ما ندري كهلاليين مين بيسجل لاحظو قلت مين بيسجل كنا مؤمنيين بانو الهلال بيفوز بس نتوقع من بيسجل فلان وعلان (طبعا هذا كله بالملعب)

مافي اعذار والله سوء التنظيم وسوء الملاعب والكراسي والزحمه والعساكر هذه كلها بملاعب المملكة في كل مكان لكن جماهير الاندية الثانية تحضر !!! وش عذركم ؟؟

والله لو ان الهلال بجدة لاحضر المباريات .. اشتغلت بالرياض 8 شهور حضرت فيها مدري كم عدد المباريات اللي حضرتها بس علشان اصارخ واشجع لأنه الهلال ماجيت علشان ياسر او العابد جيت علشان الهلال لاني اعرف من صغري اذا الهلال شاف الملعب مليان يفوز مو كل المباريات لكن نقول 85% منها يفوز

تكفون يا جماهير الملكي احضروا وتفاعلوا واذا استمر الهلال كذا وقتها خلونا ننفجر في وجه اللاعبين والادارة لو نقومها مظاهرات ولا يستمر وضع الهلال كذا

في مثل يقول شد لي اقطع لك مو معقول ابي الفوز والمستوى وانا جالس بالبيت


شي في خاطري وقلته قبلتوه كان بها ما قبلتوه برظو كان بها لكني بأبقى هلالي عاشق للكيان والشعار


تحياتي