[• مزاجي هلالي •]

بسم الله الرحمن الرحيم

الأسبوع الماضي يوم الخميس بالتحديد توجهت لمتجر الهلال بشارع التحلية

عشان اشوف وش الجديد الموجود في المتجر لأن اخر زيارة لي كانت بداية الدوري مع نزول قمصان الفريق الجديدة ولقيت أسعارها من 300 وفوق وتراجعت بسبب غلاء سعرها

نرجع ليوم الخميس .. لما دخلت المتجر أول شي جذبني الأحذية الله يكرمكم

عليها خصم 50 % ما عدا أحذية نايك وللأمانه أشكالها مررره حلوة ومتوفرة بمقاسات كثيرة

ثاني شي رحت لقسم القمصان هنا من جد حسيت ان عيوني فيها شي وتنحت لمدة 5 دقايق لما شفت سعر القميص الاحتياطي باللون الابيض سعره 160 ريال فقط

أنا حسيت ان الموضوع فيه غلط وشلون سعره بداية الدوري 340 تقريبا والآن 160 !!

ناديت الموظف وسألته باستغراب هل سعر القميص 160 والا فيه شي ثاني قال لي لا سعره 160 نفس ما هو مكتوب قلت طيب ليه تغير سعره قال هذا القميص للجمهور قلت وشلون للجمهور هذا نفس اللي نشوفه على اللاعبين ..

قام مسك القميص ووراني الياقه حقته وفعلا لقيتها مختلفة عن حقت اللاعبين لقيتها بشكل مثلث ومن وجهة نظري اشوفها اجمل وسعرها حلو ،،

وعلى فكرة كان موجود بس القميص الأبيض والقميص السماوي اللي هو الثالث

وسألته عن القميص الاساسي وقال لي بعد 10 أيام أن شاء الله وبنفس السعر 160 او 180

هذا اللي حبيت أوضحه لكم وانتهاز الفرصه لشراء القميص