السلام عليكم ورحمة الله وبركاته
في البدايه هارد لك لنا بالتعادل الغير مستحق بصراحه
لكن العوض في الجايات ان شالله
في الحقيقه عندي تعليق على مدرب الهلال توماس دول
انا ماني في محل يسمح لي بالمطالبه بإقالة المدرب او جلب فلان او علان ... انا واحد من الجماهير كل اللي علي التشجيع وتقبل النتائج سواء كانت زينه والا شينه
لكن اللي اشوفه بالنسبه لتوماس دول احد امرين
" على قولة اخوي : الالماني اما يجيك عبقري او حمار .. ماعندهم شي بالنص "
1- اما انه مدرب غبي لايفقه شي في التدريب ويعتمد على فوضويه الخطوط لارباك الخصم والـ
لا مركزيه اللي نشوفها في الهلال حاليا .
ترى من بداية الدوري ماعرفنا مركز ثابت لا للفريدي ولا الشلهوب ولا ايمانا ولا حتى العربي
او
2- انه المدرب تفكيره اكبر من عقلية اللاعبين عندنا وهذا اللي اتوقعه بصراحه
المدرب يعتمد في خطتة على اشياء كثيره تعتبر
دخيله على كرتنا في الشرق الاوسط وليس السعوديه فقط
من الاشياء الغريبه والجديده علينا :
الفريق كله يدافع .. الفريق كله يهاجم .
وهذا شي فوق الممتاز بل ممتاز جدا لكن صعب انك تطبق هذا الشي على فريق لياقته ماتجي نصف لياقة اللاعب الاوروبي اللي ممكن يتقبل هذي الطريقه
وغير كذا عقلية اللاعبين كيف تتقبل هالطريقه .. يعني الفريدي لاعب يتقدم عند الـ 18 لا اراديا حتى لو حطيت له واجبات دفاعيه .. يعني تحتاج مزاوله مستمره لفتره طويله علشان يتقنها اللاعب.
وهالطريقه بالمناسبه تشوفونها في برشلونا .. تشافي ممكن يوقف على خط الـ 6 تبع الخصم .. وفجأه تلقاه داخل الـ 18 تبع فريقهم بجانب بيكي
اللامركزيه .
في حال انه الهجوم ... تلقى صناع اللعب والمهاجمين بدون مراكز وفي حركه مستمره .. تربك دفاعات الخصم اللي مايدري يمسك مين ويترك مين
وفي حال الدفاع تلقى المحاور وخط الدفاع كامل بدون مركزيه واللي يساعد على الشي ذا انه الفريق كله يدافع يعني لو اسامه هوساوي طلع من مركزه تلقى هرماش يسد مكانه وهكذا
عموما الطريقه هذي صعبه جدا وتحتاج الي مزاوله علشان يعتادون اللاعبين عليها
لان طريقتنا في الهلال او الكره العربيه المعروفه ... اني العب الكره لك في المركز الفاضي اللي هو مركزك وانت تجي منطلق وتاخذ الكره وتكمل طريقك
مع طريقة دول لا
التفت وامررها لاقرب واحد مني لاني ماعرف مركز اللي جنبي وين صار
يعني الفريدي يبي يمررها للاعب اللي جنبه ... مايدري من اللي جنبه هو الشلهوب والا العابد والا هرماش بسبب اللا مركزيه هذي
هذي طريقه خطيره جدا في حال انه الفريق مااتقنها لانه اغلب الكرات في الوسط بتنقطع بسهوله بسبب انه لاعبينا مايدرون وين اخوياهم
لكن في حال انه الفريق زاولها باستمرار واتقنها ... راح يكون فريق مرعب .. وعلى سبيل المثال لفريق يطبق هالطريقه " برشلونا "
لكن برشلونا معوّد لاعبينه على الطريقه ذي في الاكاديميه من يوم كان عمرهم 11 سنه ... تلقاه يوصل الفريق الاول وهو فاهم كيف يلعب
تابعوا ميسي والا تشافي والا انيستا .. مالهم مركز معين يتحركون بحريه ... هذي طريقتهم وهي نفسها الطريقه اللي يبي يطبقها دول ... انت رحت ياانيستا .. خلاص تشافي يجي يسد مكانك بدون نقاش وهكذا
امس شفنا هرماش قدام قوس الـ 18 للاتحاد اكثر من مره .. واللي يقطع الكره مكان هرماش في مركز المحور هو سلمان الفرج !! تكتيك غريب لكن لو اتقنوه اللاعبين بيطلع فريق قوي جدا جدا جدا
حتى في كاس العالم 2010 لو تلاحظون طريقة لعب المانيا ... توماس مولر انا مدري للحين هو مهاجم والا صانع لعب والا جناح والا مهاجم خلف المهاجمين والا وش يبي
هذي طريقة اللعب الالمانيه واللي يبي يطبقها توماس دول .. مع احترام الفروقات الفكريه بين لاعبينا وبين توماس مولر
عدم وجود راس حربه صريح.
وهالطريقه بالتمام نشوفها في برشلونا
ماعندهم راس حربه صريح
فابريقاس يسجل فيا يسجل ميسي يسجل انيستا يسجل تشافي يسجل كيتا بيكي كلهم يسجلون
ومافيه راس حربه صريح .. علشان كذا بي بي ينطرد واجد لانه مايدري من يراقب
هالطريقه تقريبا اشوف توماس دول يحاول يطبقها صحيح تحتاج وقت كبير ... بس لو اتقنها الفريق راح يكون كلام ثاني
يعني العربي امس شفته في الجناح وشفته صانع لعب وشفته قلب هجوم وعيسى كذلك
عدم الاعتماد نهائيا على قدارت اللاعب الشخصيه.
ماتلاحظون انه من جاء دول ... صار الكلام انه نامي نقطة ضعف وانه الزوري نكبه والمرشدي مو زين كلام غير صحيح !؟
اللي لاحظته واستغربت بصراحه خصوصا بعد مباراة النصر ... انه الفريق يلعب كـ كيان وليس كأفراد ... ولها السبب اختفى ايمانا اللي بريقه يعتمد على مهارات فرديه اكثر من الجماعيه
فعلا ماصرنا نشوف اخطاء على نامي حتى سلمان الفرج امس وهو يلعب في مركز مهوب مركزه مبدع امس
المرشدي على كثر ما كنا نسميه نكبه ... امس كان وحش ... اللهم سحبة نايف هزازي فيه سووا نفسكم ماشفتوها
الفريق صار يلعب بالفكر الالماني ... صار الفريق كأنه منتخب المانيا ...
بمعنى ... انت مهاري .. فنان ... يوسف الثنيان ... اي شي .. مهارتك خلها لك .. انا ابيك تستلم وتسلم بسرعه
وهذا اللي يبرر فشل بعض النجوم عندنا امثال ايمانا والعابد وهبوط مستوياتهم لانهم لاعبين يعتمدون على مهاراتهم الفرديه بشكل كبير جدا ... لو تلاحظون العابد امس اكثر من 80% من تمريراته خاطئه ... على عكس الفرج ... لاختلاف الفكر
هذي طريقة اللعب الالمانيه وفعلا لو اتقنها الفريق راح يكون شي خطير جدا
ظهور شخصيه جديده للفريق.
مدري هل انا اللي لاحظت هالشي والا فيه غيري لاحظ هالكلام ... الفريق لما يدخل مباراه كبيره ماصرت اخاف زي اول
اول نخاف انه باولو جورج يمسح بنامي الارض
والا نور يجرجر الزوري على وجهه وزيايه يحوس مرير المرشدي ...الحين صار مافيه هالشي جد
لان الفريق يلعب ككيان وهذا شي جدا ممتاز للفريق.
لو تلاحظون كل مباراه نلعبها ويكون لعبنا ممتاز .. يكون ايمانا احتياط .. او الكوري مصاب ... او عيسى مصاب !!
فعلا صار الغياب مايأثر فينا
امس مع الاتحاد نلعب ناقصين ايمانا .. وناقصين الكوري يعني نلعب بأثنين اجانب .. وناقصين اظهره " نامي + الزوري " والفريق يقدم الاداء المميز هذا ..!! انا بديت احس بالفرق في الفريق بصراحه
على فكره .. الكلام والطريقه اللي لخصتها فوق واللي يسعى دول لتطبيقها ... طبقها فريق واحد في اسيا .. وصار فعلا بعبع .. السنه الماضيه اخرج الاتحاد من اسيا
هو فريق جيونبوك ... كان فريق يلعب زي برشلونا ... فريق لعبه غريب جدا
طيب بعد هالهذره ... بينجح دول والا لا ؟
على حسب ماشفت في الجولات الماضيه ...
1- دول لو توفر له اللاعبين اللي يطبقون طريقة لعبه بشكل صحيح ... وجلب بدلاء لبعض اللاعبين واخص بالذكر ايمانا ... المرشدي ..لي يونغ ... طبعا مع وجود البيشي بديل لنامي وشافي او الفرج مكان الزوري راح يكون الفريق شي كبير
يعني بالعربي نبي لاعبين Flexible مرنين ... المرشدي امس كويس وطريقه دخوله ع الكره ممتازه لكن يعيبه " البطئ + عدم المرونه ولنا في جرة نايف هزازي اقرب دليل على عدم المرونه
.. في المقابل اسامه هوساوي يوم جره ويندل ... التف على نفسه وقدر يلحق اللاعب ويضايقه .. هذي المرونه اللي ماهي في ماجد .. لانه ماجد لو سواها ممكن يطيح على خشته
"
2- الصبر على دول فتره اطول
الفريق للأمانه قدام محك مهم
* قرار الصبر لازم يكون على قدر كبير من المسؤوليه يعني بتصبرون اصبروا صح وخلوا المدرب 4 سنوات ... والا لاتصبرون .
اما نصبر على المدرب موسم واحد ... ويوم قرب الفريق ينسجم نشوته بنخسر اننا صبرنا ونخسر اننا راح نفقد الانسجام اللي كان قريب
* او قرار الاقاله من الان وجلب جهاز تدريبي بديل
وانا بصراحه مع القرار الاول اللي هو الصبر ..
بالاضافه الي
- جلب لاعبين محليين واجانب يخدمون طريقة دول وغير مهاريين اطلاقا بل اصحاب فكر عالي ولمسه واحده زي عادل هرماش تماما .
لاعب مستحيل يبرز كلاعب مهاري او فنان ... لكن يخدم الفريق بنسبة 90% بدون ان يلاحظ ذلك الجمهور
والاهم انه اللاعبين يطبقون كلام المدرب وهذا الشي اللي مخلي فريقنا يظهر بشكل غبي قدام الفرق الصغيره لانهم مايبطقون كلام دول بحذافيره وعلى العكس قدام الفرق الكبيره تلقاهم يطبقون الكلام بحذافيره لاحترامهم للمنافس ..
يعني امس بصراحه هرماش كان افضل لاعب بلا منازع
في النهايه اتمنى انه تحليلي المتوا
زع يكون صح
.. وفعلا اتمنى شي مهم
اذا بيرحل دول .. يروح من يناير ويفكنا
او يبقى الين 3 مواسم قدام وهذا الحل الاجدر بصراحه + توفير لاعبين يخدمون خطة دول + وجود طبيب نفسي
تحياتي للجميع وبالتوفيق للهلال في جميع المحافل بإذن الله
الوضع المتطور
