[ببسي قوارير]

بسم الله الرحمن الرحيم

مدري من وين ابتدي ومن وين انتهي في داخلي زحمه حكي وخاطري بالحيل مقهور ومكسور

ماعرف للمقدمات والنهايات لكن بختصرها بجمله ماتعودنا نقولها كثير ( هارد لكم والجاي بأذن الله احسن من اللي راح)


الامور الفنيه كثير تكلمو فيها في كل مكان برامج وجرايد ومنتديات عشان كذا مابي ادخل فيها بالتفاصيل



بدايه الكل اشاد فينا هالموسم بأفضليه البطولتين وتحقيقها لكن الملاحظ واللي يرجع لبدايه الموسم كامل بيلاحظ

ان المستوى اللي كنا نتغنى به مع كل فوز وبطوله في الموسم السابق اختفى بشكل مخيف مباريات معدوده على الاصابع كان فيها المستوى مقنع .


للعلم ياأخواني الظروف اللي مرت هالموسم من بدايته لو عرف فيها اي واحد من البدايه اتوقع يقول المركز الثالث بالدوري

واللي من خلاله بيكون لنا مقعد اسيوي في 2012 شي حلو .. على اعتبار انه افضل شي بيتحقق وسط التغيرات والظروف اللي مرينا فيها

من خروج اسيوي كان صدمه بخسارتين ذهابا وايابا اسيويه وخيانه مدرب راح وتركنا للمغرب .. يعني فريق منهار نفسيا ومعنويا وبدون مدرب ومع ذالك بطولتين !!



.. لكن ولله الحمد بعد توفيقه وثم ان عندنا أداره على رأسها ابو فيصل عسى الله يطول سنينه اكبر همه اارضاء المشجع الهلالي قبل كل شي

هذا اللي خلانا كـ هلاليين ننسى ألم الخروج الاسيوي في النصف الأول من هالموسم بسرعه وماتوقفنا عند هالخروج كثير هذا الشي لحاله اعتبره انجاز وبطوله بحد ذاته .



كان ودي اني ماكتب شي واصير كـ العاده متفرج من الملعب اشجع وأدعم الفريق في مبارياته الكثيره وهذا شي طبيعي لكل محب لهذا الكيان لكن هالمره

بطلع اللي بخاطري لو مره عسى هالمره تكون الاخيره لي كـ كتابه ...

.. بدايه في اللاعبين الاجانب مايحتاج نتكلم عن لاعبينا الاجانب والافضليه اللي هم فيها لكن نتكلم بواقعيه شوي انا اشوف أن الافضل فيهم رادوي بحكم

كثره الاصابات( الغنام . البرقان ) واستعباط (خالد عزيز) في مركز المحور , لكن رادوي يبي يروح عسى الله يسهل له دروبه في كل خطواته ويشرح صدره للأسلام


وأحمد علي غالبا بيروح مع ان الظروف ماساعدته لكن سوا شي يشكر عليه .. لي يونق لاعب ماسك الخانه وجيد بس مشكلته كبير بالعمر.. ويليهامسون يكفي ثبات مستواه طول هالمواسم


.. اللي ابي اوصله اللاعب الجيد تعرفه في المباريات القويه والحاسمه وهالموسم اغلب اللاعبين الاجانب ماقدمو شي يذكر اللاعبين في الاسيويه اهم مباراتين ماقدمو شي يذكر

( اتكلم عن اللاعبين الاجانب فقط) بالعكس يمكن احد اسباب الخروج الاسيوي الاجانب . ماتكلم انهم سيئين او انهم مايفيدون لكن اللي ابي اوصل له


انه خلاص قدمو كل اللي عندهم وماتوقع بيقدمون افضل في المواسم الجايه .. اتمنى من الاداره صراحه بما ان الموسم القادم بيكون اول مبارياته دوري , والاسيويه بتكون في منتصف

الموسم اننا نبدى بمحترفين أربعه جدد في المراكز المطلوبه ومع الوقت بأذن يتأقلمون حتى موعد الحسم في البطولات المحليه والاسيويه ..


مازلت احس اني ماعبرت عن اللي بداخلي لكن اكبر قهر لأي هلالي انك تخسر مبارتين من نفس الفريق وبنتايج موجعه في مبارتين مفصليه وتخرجك من بطولتين تهم كل هلالي

والقهر لامستوى ولا نتيجه وش فايده الاستحواذ وانت ماتهدد مرمى الخصم اي هلالي لو فيه مستوى ماتألم وانقهر, كل هلالي يهمه الفوز أو الخساره ( بشرف )



في الكوره اضلاع اربعه ( أداره , جهاز فني , لاعبين , جمهور ) هذي هي بأختصار وكلها مكمله لبعضها البعض ان قل عطاء احد هالاضلاع عوضت البقيه عنه



فيه نقطه وهي أهم شي (الروح او الحماس او القتاليه) , بأي تسميه كانت .. في كل مبارياتنا المهمه هالموسم اختفت بشكل مخيف وهذي لا اداره تفيد ولامدرب يقدر يسوي شي

مالفت انتباهي روح لاعبين الاتحاد لا اداره عندهم ووضعهم حوسه ولاعبينهم كبار في السن بس فازو مرتين علينا وبسهوله تدرون ليه ؟؟

شوفو هدف الاتحاد الثالث في مباراه جده الاسيويه وتعرفون ليه .. أهم شي في أي فريق بالعالم ( الكابتن القيادي الحماسي ) هذي للأسف مب موجوده عندنا في الهلال

من بعد سامي ,, وهذي موجوده في الاتحاد فقط حاليا في نور , نور فيه ميزه كانت في النعيمه والثنيان وسامي , في وقت الجد يررررفع الفريق معنويا قبل المباراه

اعلاميا وداخليا في المعسكر وبوقت المباراه قيادي يوجهه ويحمس اللاعبين .. لكن في الهلال حاليا ؟؟ لاتعليق

ينقص الهلال حاليا ومستقبلا كابتن حماسي قيادي يوجه اللاعبين يرفع المعنويات بوسط المباريات حتى لو غاب فنيا يعوضها بالقياده وحب الشعار وشحذ همم زملائه اللاعبين

والكلام يطول في هالموضوع لكن اختصارا شاهدو مباريات الهلال ( الحاسمه والنهائيه ) وكيف الاصرار و ( القياده ) هي السبب بعد الله في زعامتنا





اتمنى من الله التوفيق للهلال العشق الابدي في كل المواسم ~~


تحياتي لكم يا من بحب الهلال تشاركوني